Read lubukusu 1 Sam. 14 Bible Online

1 Sam. 14 - lubukusu bible

1 Sam. 14

¹Endaalo ndala Yonasani, okhwa Saulo aboolela omuele owamusutilanga bulwaani bwewe ali, “Khuche mu kambi eye banamae be Bafilisiti eeli lubeka olwo.” Ne kakhali Yonasani se aboolelakho raraawe tawe.

²Saulo amenyanga a lwakha lwe lukoba lwa Kibea, a murongooro kumukomanga kuuli e Mikironi. Babaandu nibo aba ne nabo baba chimia sita.

³Ne Ahiya yesi abayo. Aba efwarire Efodi. (Ahiya aba okhwa Ahitubu, Ahitubu aba wandaaye owa Ikabodi. Ikabodi aba okhwa Fineasi. Ne Fineasi aba okhwa Eli, omusaayi owa Wele Omunyali Owa Bioosi e Shilo). Ne babaandu se bamanya bali Yonasani aba achile tawe.

⁴Sibaanga nisio Yonasani ayima khubirira ache mu kambi eye banamae be Bafilisiti, siabamo kamabaale kamaleeyi kamooki chimbeka chombi. Libaale lilala lilangaangwa bali Bosesi ne liliindi bali Sene.

⁵Bubwooki bulala bwalola ebunaswa ebweeni wa Mikimashi ne bubuundi bwaloleelela ebunafubo ebweeni wa Keba.

⁶Ne Yonasani aboolela omuele wewe owasutanga bulwaani bwewe ali, “Yiicha khuche mu kambi eye banamae basiinde bano. Wakana Wele Omunyali Owa Bioosi alakhuyeeta. Sikila mbao sinyala siakhiingilila Wele Omunyali Owa Bioosi khuonia khulwe khurumikhira batiiti namwe bakali tawe.”

⁷Ne owamusutilanga bulwaani oyo amukobosia ali, “Khola bioosi nibio wibaasia khukhola. Ese ndi ne nawe. Kamebaasio kowo niko kakaase.”

⁸Nio Yonasani aaloma ali, “Khulambukha khuche niio babaandu abo bali mala khweyekesie fwabene khu nibo.

⁹Baaba ne bakhuboolela bali, ‘Liinda khukhwola nga khumwolakho’ aba khulema niio khuli ne se khulacha niio nibo bali tawe.

¹⁰Ne baaba ne bakhuboolela bali, ‘Yiicha niio khuli’ ne efwe khucha. Sikila aba Wele Omunyali Owa Bioosi akhuele efwe bukhili khu nibo. Ne sino silaba simanyisio khwifwe.”

¹¹Nono boombi bacha beyokesia ebweeni we banamae be Bafilisiti. Ne Bafilisiti baloma bali, “Lola, Baeburania balikho becha khukhwama mu maloo nimwo bekisilenge!”

¹²Ne babaandu be kambi balaanga Yonasani ne omusuti owe bulwaani bwewe bali, “Yiicha niio khuli mala khulamwekesia sisiindu.” Ne Yonasani aboolela omusuti owe bulwaani bewe ali, “Nondekho, sikila Wele Omunyali Owa Bioosi aele Isiraeli bukhili khu nibo.”

¹³Nio Yonasani aaniina aacha khulwe khurumikhira kamakhono ne bikele ne omusuti wewe owe bulwaani aba amuloondilekho. Ne Bafilisiti bakwa ebweeni wa Yonasani mala omusuti owe bulwaani bwewe aloondakho abeera.

¹⁴Ne liliira lie khunyoa elio nilio Yonasani ne omusuti owe bulwaani bwewe bakhola, liaba lie babaandu embi kamakhumi kabili. Liriira elio liakholekhela mu sitonyi sie bulime.

¹⁵Ne liabao lireenga mu kambi, mu mikuunda ne mu baandu boosi. Ekambi eye banamae ne banuuli bosi banikina. Sibala siareenga, mala liaba lireenga liboofu.

¹⁶Ne baliindi ba Saulo Kibea mu sibala sia Benjamini balola mala babona sipupu silikho sisalaanila eyi ne eyi.

¹⁷Nio Saulo aboolela babaandu ba baaba ne naye ali, “Bala mala mumanye naanu okhulekhile.” Ne nga bamala khubala, Yonasani ne omusuti owe bulwaani se babao tawe.

¹⁸Nio Saulo aboolela Ahiya ali, “Reera ano Lisanduku lie ndakaano eya Wele.” Sikila Lisanduku lie ndakaano eya Wele liaba mu baandu ba Isiraeli mu biise ebio.

¹⁹Nga Saulo ne aba ne alikho alomaloma ne omusaayi khurangararwa khukali khwatasikha mu kambi eye Bafilisiti. Ne Saulo aboolela omusaayi ali, “Rusiayo kumukhono kwowo.”

²⁰Nio Saulo ne babaandu boosi ba baaba ne naye bebuusia alala mala bacha mwiie. Banyoola Bafilisiti baba balikho bapana babene ne babene mala baba ne likoyaana likali.

²¹Baeburania balala baba lubeka lwe Bafilisiti biise bibiaba ne bibirire mala bacha mu kambi ne Bafilisiti. Baeburania abo bosi bakaluukhana mala baambana ne Saulo ne Yonasani.

²²Baisiraeli balala baba bekisa mu sibala sie bikulu sia Efuraimu. Boosi nga baulila bali Bafilisiti balikho belukha, baloonda khu Baisiraeli mwiie.

²³Nono Wele Omunyali Owa Bioosi asikula Isiraeli endaalo eyo. Ne liie liachiililila liabira Beta-beni.

²⁴Endaalo eyo babaandu ba Isiraeli bamiinikhwa sikila Saulo aana liliechubo khu baandu ne aloma ali, “Omundu yesi yesi olia siakhulia ne ekhola ekolooba tawe mala ese ne ekheyachile basiku base tawe alaamwe!” Nono mbakhoo omundu owalia siakhulia tawe.

²⁵Ne babaandu boosi bacha mu musiru. Ebweeneyo banyoolayo bubuukhi asi.

²⁶Babaandu nga bengila mu musiru, babona bubuukhi bulikho buchichukha, se aliio omundu owabukhombakho tawe. Sikila babaandu baria liliechubo.

²⁷Ne kakhali Yonasani aba se aulila raraawe ne aelesia babaandu liliechubo tawe. Nono arusia esiimbo niyo aba nayo akironga mu masasara ke bubuukhi mala aakhomba. Ne eulila bulayi.

²⁸Nio omundu mulala amuboolela ali, “Raraao abooleele babaandu mu khutanyilila ali, ‘Omundu oolia siakhulia endaalo yino alaamwe. Nono babaandu se bali ne kamaani tawe.’ ”

²⁹Yonasani aakobosia ali, “Paapa areerire butinyu khu baandu. Lola nga ne niiulila bulayi! Sikila akhoombilekho bubuukhi buno butiiti.

³⁰Abanga babaandu baliile endaalo yino biakhulia nibio banulile khukhwama khu basiku babwe andi babeele bulayi. Lundi andi berire Bafilisiti bakali khukhilakho.”

³¹Endaalo eyo Baisiraeli beera Bafilisiti khukhwama Mikimashi khukhwola Aiyaloni. Mala babaandu baluwa lukali.

³²Babaandu basuna khu nibio baambile babukula kamakheese ne chieeyi ne chimoosi beerera abwene, mala balia chinyama kamalasile ne kasiilimo.

³³ Nio likhuwa lioolela Saulo bali, “Lola babaandu balikho bakhola bubwoni khu Wele Omunyali Owa Bioosi khulwe khulia chinyama chilimo kamalasile.” Ne Saulo aloma ali, “Mwakholile bubwoni. Piringisia libaale liboofu mundeerere ano.”

³⁴Ne aloma ali, “Salaanila mu baandu mala mubaboolele muli lekha buli mundu areere ano eeyi yewe namwe likheese liewe, mubikhonyele ano mala mulie. Ne kakhali mukhakholela Wele Omunyali Owa Bioosi bubwoni khulwe khulia chinyama chilimo kamalasile tawe.” Nio buli mundu areera eeyi siilo esio mala bakhonyela ebweeneyo.

³⁵Ne Saulo ombakhila Wele Omunyali Owa Bioosi alutare. Eyo niyo eyaba alutare eye khunyoa niyo Saulo oombakhila Wele Omunyali Owa Bioosi.

³⁶Nio Saulo aloma ali, “Lekha khwikhe khuloonde khu Bafilisiti mala khubebwaakale mu silo khubanuule khukhwola nga busia. Khukhalekhakho omundu khu nibo tawe.” Babaandu bamukobosia bali, “Khola nilio olola oli lili lilayi khwiwe.” Ne omusaayi aloma ali, “Lekha khureebe Wele nio.”

³⁷Nio Saulo areeba Wele ali, “Nibwaakale Bafilisiti? Olakhukhola khubaule?” Ne kakhali endaalo eyo Wele se akobosia tawe.

³⁸Nio Saulo aloma ali, “Yiicha ano, babemeelesi be babaandu mweesi, mulole mala mumanyilisie bubwoni siina bubwekholeekhe.

³⁹Sikila khukhwola nga Wele Omunyali Owa Bioosi ne amenyile mindali, oosikulanga Isiraeli, akhaba ne ali omwana wase Yonasani, alafwa.” Ne kakhali se abao omundu mu baandu boosi owamukobosia tawe.

⁴⁰Nio aboolela Isiraeli yoosi ali, “Mulaba lubeka lulala. Ese ne omwana wase Yonasani khulaba lubeka luluundi.” Nio babaandu baboolela Saulo bali, “Khola nisio olola oli sili silayi khwiwe.”

⁴¹ Nono Saulo areeba ali, “Wele Omunyali Owa Bioosi, Wele owa Isiraeli, siina sikila ne okhachiiba omukholi wowo endaalo yino tawe? Kaaba bali kamakhiikha kano kali khwise namwe khu omwana wase Yonasani Wele Omunyali Owa Bioosi, Wele owa Isiraeli, yekesia Urimu. Ne kaaba bali kamakhiikha kano ne kali mu baandu bowo Isiraeli, Yekesia Tumimu.” Nio Saulo ne Yonasani babukulwa khubirira mu khuupa chikura ne kakhali babaandu se babukulwa tawe.

⁴²Nio Saulo aaloma ali, “Khupa chikura akari wase ne omwana wase Yonasani.” Nio Yonasani aabukulwa khubirira mu khuupa chikura.

⁴³Nio Saulo areeba Yonasani ali, “Mboolele nisio okholile.” Ne Yonasani amuboolela ali, “Khombilekho busa bubuukhi butiiti buri khulwe khurumikhira esiimbo eye mukhono mwase. Ese niye oyu. Nenyikhane efwe ku?”

⁴⁴Ne Saulo aloma ali, “Wele akhoya ambelesie ese kumunaanio Yonasani waaba bali se ofwa tawe.”

⁴⁵Nio babaandu bareeba Saulo bali, “Yonasani anyala afwe enyuma we khurera bukhili bukali buno mu Isiraeli? Tawe! Nga Wele Omunyali Owa Bioosi ne amenyile mindali, aakhaba lichuune lilala lie khumurwe kwewe se lilakhunyukhakho likwe asi tawe. Niko akholile endaalo yino akholile ne buyeeti bwa Wele.” Nono babaandu basikula Yonasani mala khwirwa tawe.

⁴⁶Nio Saulo aalekha khutimania Bafilisiti, mala bakobola ewabwe.

⁴⁷Nga Saulo ne abukula bubwami bwa Isiraeli, apana ne basiku bewe boosi chimbeka choosi. Apana ne Bamoabu, Baamoni, ne Baedomu. Apana akhaba ne babaami ba Soba, ne Bafilisiti. Buli abuundu niio apana akhilanga.

⁴⁸Apana ne bunyindaafu mala eera Baamaleki. Asikula Baisiraeli khukhwama khu abo ba babanuulanga.

⁴⁹Nono ba okhwa Saulo baba: Yonasani, Isibi ne Malikishua. Lisina lio mukhaana wewe omubele liaba bali Merabu ne omuro aba bali Mikali.

⁵⁰Ne lisina lio mukhasi owa Saulo liaba bali Ahinoamu, omukhaana owa Ahimasi. Ne lisina lia komanda owe banamae bewe liaba Abuneri okhwa Neri. (Neri aba raraawe owa Saulo omuro.

⁵¹Kishi aba raraawe owa Saulo. Ne Neri raraawe owa Abuneri, aba okhwa Abieli.)

⁵²Mu bulamu bwa Saulo bwoosi bukhupani burafu ne Bafilisiti bwabao. Ne buli lwosi nga Saulo ne abonanga omundu we kamaani namwe omunyindaafu amubukulanga amukholela niye.