Read lubukusu 1 Sam. 15 Bible Online

1 Sam. 15 - lubukusu bible

1 Sam. 15

¹ Samweli aboolela Saulo ali, “Wele Omunyali Owa Bioosi aanduma ese khukhuchukhakho ewe kamafura obe omwami owe babaandu bewe Isiraeli. Luno nono rekeeresia kamakhuwa ko Omwami Wele Omunyali Owa Bioosi.

² Wele Omunyali Owa Bioosi owe bunyali aloma ali, ‘Khaelesie Baamaleki kumunaanio sikila niko bakholela Baisiraeli nga babakhiingilila ne balikho barura Misiri.

³Nono cha mala wiire Baamaleki mala obunisilie elala buli siindu nisio bali ne nasio. Okhalekhakho sisiindu tawe. Yiira be siseecha nende be siikhasi, babaana nende bang'alia, chieeyi ne kamakheese, chingamia ne chipunda.’ ”

⁴Nono Saulo alaanga babaandu e Telemu mala aababala. Baba babaandu chielefu chimia chibili babakeendelanga khu bikele ne babaandu chielefu ekhumi mu Yuda.

⁵Nio Saulo ne babaandu bewe bacha mu lukoba lwe Baamaleki mala bekisa mwitooma balindiilila.

⁶Ne Saulo aboolela Bakenayi ali, “Cha murure khukhwama mu Baamaleki ne busa ndamubunia enywe alala ne nabo. Sikila enywe mwekesia bulayi khu baandu ba Isiraeli boosi nga ne baba ne bama e Misiri.” Nono Bakenayi bacha barura mu Baamaleki.

⁷Saulo aula Baamaleki khukhwama Habila khukhwola Siuri lubeka lwe bukwe owa Misiri.

⁸Abukula Akaki omwami owe Baamaleki ne ali omulamu mala aabunisilia elala babaandu boosi mu khurumikhira embalu

⁹Ne kakhali Saulo ne babaandu bewe balekha Akaki. Lundi se aabunia kamakheese kamalayi, ne chieeyi chindayi, ne kamameeme namwe bioosi bibiaba bilayi tawe. Babunisilia elala bioosi bibialekwa nende bikhaaba bie bukhala tawe.

¹⁰Likhuwa lia Wele Omunyali Owa Bioosi liecha khu Samweli lili,

¹¹“Nebiiya nga nakhola Saulo aaba omwami. Sikila anjaukhekho mala se anondilekho tawe. Ne se akholile nga kamalaka kase ne kali tawe.” Samweli aambwa lirima mala alilila Wele Omunyali Owa Bioosi siilo sioosi.

¹²Nio enyokha makhelebeende endaalo eyaloondakho mala aacha khukhwakaanana ne Saulo. Ne babaandu baboolela Samweli bali, “Saulo achile Karimeli niio eyombakhile sifwaani mala ayukha aacha e Kilikali.”

¹³Samweli acha niio Saulo ali. Ne Saulo amuboolela ali, “Wele Omunyali Owa Bioosi akhoya akhubiite ewe chikhabi. Nakholile nga Wele Omunyali Owa Bioosi ne aandaka.”

¹⁴Ne Samweli amureeba ali, “Siina sikila ne mbulila kamakheese ne kameleela ne chikhaafu ne chimoloola?”

¹⁵Saulo amukobosia ali, “Babireerire khukhwama khu Baamaleki. Balekhile kamakheese kamanefu ne chikhaafu chinefu babiaane nga embosio khu Wele Omunyali Owa Bioosi, Wele wowo. Ne bibiindi bioosi khubibunisilie elala.”

¹⁶Nio Samweli aboolela Saulo ali, “Sila. Endakhuboolela niko Wele Omunyali Owa Bioosi ambooleele siilo sibirire sino.” Saulo aaloma ali, “Mboolele.”

¹⁷Samweli aaloma ali, “Akhaba ne oli omukeekhe, ewe oli omwimeelesi owe chikholo cha Isiraeli. Wele Omunyali Owa Bioosi akhuchukhakho kamafura obe omwami owa Isiraeli.

¹⁸Ne Wele Omunyali Owa Bioosi akhuruma okhole kimilimo ne aloma ali, ‘Cha obunisilie elala bamayaanu Baamaleki. Khupana ne nabo khukhwola nga ne beerwa boosi.’

¹⁹Siina sikila nono ewe ne okharia Wele Omunyali Owa Bioosi tawe? Siina sikila ne otima khuyaayana bie mwiie, mala ne okhola kaali kamamayaanu mumoni cha Wele Omunyali Owa Bioosi?”

²⁰Nio Saulo amukobosia ali, “Ese nariire Wele Omunyali Owa Bioosi. Nakholile niko Wele Omunyali Owa Bioosi aanduma khukhola. Nareerire Akaki omwami owo Amaleki ne nabunisilie elala Baamaleki.

²¹Ne kakhali babaandu babukule bie mwiie, kamakheese ne chikhaafu ne bibiindu bilayi bibienyekha khubunisibwa, nio babiaane nga embosio khu Wele Omunyali Owa Bioosi, Wele wowo e Kilikali.”

²²Ne Samweli areeba ali, “Siina sisiimisia Wele Omunyali Owa Bioosi lukali? Biianwa bie khukhwosia ne chimbosio, namwe khuria Wele Omunyali Owa Bioosi? Khuria khukhila embosio, ne khuulila khukhila kamamiiku kamanefu.

²³Khulekha khuria khuli nga bumayaanu bwe bulakusi ne sileka sili nga bumayaanu bwe khusaaya bifwaani. Sikila walobile likhuwa lia Wele Omunyali Owa Bioosi, Wele Omunyali Owa Bioosi akhulobile ewe nga omwami.”

²⁴Mala Saulo amukobosia ali, “Nakholile bumayaanu. Sikila nalekeleesie lilaka lia Wele Omunyali Owa Bioosi ne kamakhuwa kowo. Naria babaandu mala nakhola niko benya.

²⁵Nono luno khusaba umbeele bubwoni bwase mala okobole ne nase e Kilikali, nio saaye Wele Omunyali Owa Bioosi.”

²⁶Ne kakhali Samweli aboolela Saulo ali, “Se ndakobolayo ne nawe tawe. Sikila ewe walekile likhuwa lia Wele Omunyali Owa Bioosi. Ne Wele Omunyali Owa Bioosi akhulobile ewe nga omwami owa Isiraeli.”

²⁷ Nga Samweli ayukha khurekukha, Saulo atiila engubo yewe ne kamaani mala yatabukha.

²⁸Ne Samweli amuboolela ali, “Wele Omunyali Owa Bioosi atabuule bubwami bwa Isiraeli khukhwama khwiwe endaalo yino. Ne abuelesie owasio ooli omulayi khukhukhila ewe.

²⁹Wele ooli luyali lwa Isiraeli se akhabee namwe eebiiye tawe. Sikila se ali omundu nio eebiiye tawe.”

³⁰Ne Saulo aloma ali, “Nakholile bubwoni. Ne kakhali mbeekho lukoosi ebweeni we babemeelesi be babaandu base nende Isiraeli yoosi. Kobolayo ne nase, nio ese saaye Wele Omunyali Owa Bioosi, Wele wowo.”

³¹Nono Samweli akobola e Kilikali ne Saulo mala Saulo asaaya Wele Omunyali Owa Bioosi.

³²Nio Samweli aloma ali, “Ndeerere ano Akaki omwami owe Baamaleki.” Ne Akaki acha niio Samweli aba ne busangaafu ne aloma ali, “Ng'ali se efwa lundi tawe!”

³³Samweli aloma ali, “Nga embalu yowo ne yakhola bakhasi bakali bataamba babaana, luno wesi maao alataamba babaana.” Ne Samweli aremakaka Akaki mu bitonyi ebweeni wa Wele Omunyali Owa Bioosi e Kilikali.

³⁴Nio Samweli aacha e Rama. Ne Saulo acha e Kibea mu lukoba lwewe.

³⁵Khukhwola mu lifwa liewe, Samweli se abonakho Saulo lundi tawe. Ne kakhali Samweli abeelela sikila Saulo. Wele Omunyali Owa Bioosi eebiiya nga ne akhola Saulo omwami owa Isiraeli.