Read lubukusu 1 Sam. 17 Bible Online

1 Sam. 17 - lubukusu bible

1 Sam. 17

¹Nono Bafilisiti babuusia banamae babwe alala bapane liie. Bebuusia e Soko, lukoba lwa Yuda, mala baapa ekambi a Efesi-tamimu akari wa Soko ne Aseka.

²Ne Saulo ne babaandu ba Isiraeli babuusiana mala baapa Ekambi mwitooma lia Ela mala berekekha khu khuupana ne Bafilisiti.

³Bafilisiti bema khu lukulu lubeka lulala ne Baisiraeli bema khu lukulu lubeka luluundi. Litooma liaba akari we Baisiraeli ne Bafilisiti.

⁴Ne omunamae mulala bali Koliati khukhwama mu lukoba lwa Katihi arura mu kambi eye Bafilisiti. Koliati aba embi chimita chitaru buleeyi.

⁵Afwaranga ekofio eye kumukasa khumurwe. Lundi efwaranga engubo eye kimikasa ne busiro bwayo bwaba bulekhaana ne bitonyi chielefu chiraano bie kumukasa.

⁶Afwaranga bikhiingililo bie kumukasa khu bikele biewe, mala aba arechanga khu mabeka kewe lifumo lie kumukasa.

⁷Kumutalaachi kwe lifumo liewe kwaba nga lusaala lwo munabi. Ne lifumo liewe liaba embi busiro bwe chishekeli chimia sita che sichuuma. Omusuti owe engabo arangiranga ebweeni wewe.

⁸Koliati eema mala ayokelela banamae be Baisiraeli ali, “Siina sikila ne mururire mwecha mwiie? Ese ndi omufilisiti, ne enywe muli bakholi ba Saulo. Robora omundu mala eche niio ese ndi.

⁹Aaba ne anyala khu khuupana ne nase mala anjira, aba khulaba banasioobi benywe. Ne ese namuula niye, aba enywe mulaba banasioobi befwe mala mu khukholele.”

¹⁰Nio Koliati aloma ali, “Ese ndikho efwochola banamae ba Isiraeli luno. Mbelesie omundu niye khunyala khwapana naye.”

¹¹Nga Saulo ne Isiraeli yoosi baulila kamakhuwa ko mufilisiti oyo, kamaani kabawamo mala bareenga lukali.

¹²Nono Daudi aba okhwa Chesi Omuefurati khukhwama Betelehemu mu Yuda. Chesi aba ne babaana munaane. Mu ndaalo cha Saulo, Chesi aba asaakhuluwe.

¹³Babaana bewe bataru baba baloonda khu Saulo mwiie. Basoleeli bewe bataru abo baba Eliabu omubele, Abinatabu okhola khabili ne Shama okhola khataru.

¹⁴Daudi aba omutua. Basoleeli bataru baloonda khu Saulo.

¹⁵Ne kakhali Daudi achichanga niio Saulo aba ne akobola engo khukhwaya kamakheese ka raraawe e Betelehemu.

¹⁶Khu ndaalo kamakhumi kane Koliati echanga ebweeni ne abukula bubweyaangu bwewe, ekolooba ne kumutikhinyi.

¹⁷Chesi aboolela Daudi omusoleeli wewe ali, “Bukula siikula silala sie biakhulia bibiosie ne kimikaati ekhumi kino mala oyilile bawandaayo khangu mu kambi.

¹⁸Lundi bukula bitonyi bie kamaboonda oyilile komanda owe banamae. Lola nga bawandaayo ne bali, mala oreere simanyisio sisiekesia sili obabone mala bali balamu.”

¹⁹Nono Saulo Ne basoleeli ba Chesi ne banamae boosi baba bali mu Litooma lia Ela, balikho bapana ne Bafilisiti.

²⁰Daudi enyokha makhelebeende mala alekhela omundu okundi bubwaayi bwe kamakheese. Abukula biakhulia mala acha nga Chesi ne amulaka. Nga ola mu kambi, banamae baba balikho bacha khubukula bubweyaangu bwe liie. Baba balikho bayokela ne beyasila liie.

²¹Nio Isiraeli ne Bafilisiti becha mu bweyaangu bwabwe bwe liie, omunamae khu kundi.

²²Daudi alekhela biakhulia omuliindi we bibiindu, atima engila mu banamae be liie, mala acha akheesia bawandaaye.

²³Nga aba ne alikho alomaloma ne nabo, omukhili Koliati omufilisiti owa Katihi arura khukhwama mu banamae be Bafilisiti mala aloma kamakhuwa niko aba ne alomilenge khale. Mala Daudi aulila.

²⁴Babaandu ba Isiraeli boosi nga babona Koliati, baria mala belukha.

²⁵Nio babaandu ba Isiraeli baloma bali, “Se mwabone omundu owichile yuno? Ng'ali echile khufwochola Isiraeli. Omwami alaelesia omundu owira Koliati buyiinda bukali. Lundi omwami alaelesia omundu oyo omukhaana wewe abe omukhasi wewe. Lundi enju eyo omundu owira Koliati se eliruunga busuuru[15] mu Isiraeli tawe.”

²⁶Daudi areeba babaandu ba baaba siimbi ne naye ali, “Omundu owira Omufilisiti yuno, ne khuana bulekhuule khu Isiraeli khukhwama mu soni chino, alanyoola siina? Omufilisiti, omusinde yuno niye naanu nio afwochole banamae ba Wele omenyile mindali?”

²⁷Ne babaandu bamukobosia mu ngila eyo ne eng'ene. Baloma bali, “Nio kaliekholekha busa kario khu omundu owira Koliati.”

²⁸Eliabu, wandaaye owa Daudi omukhulu aulila Daudi ne aloma ne babaandu. Eliabu aambwa lirima khu Daudi ne aloma ali, “Siina sikila ne wichile eno? Ne olekheele naanu kamakheese matiiti ako mu sichiimi? Emanyile lukhole lwowo ne bumayaanu bwe kumwoyo kwowo. Wichile ano khuloleelela liie.”

²⁹Nio Daudi amureeba ali, “Nono nakholile siina? Ndeebire busa.”

³⁰Daudi alekha wandaaye mala acha khu mundu okundi amureeba lireeba elio ne liliene. Ne babaandu bamukobosianga busa nga lwe khunyoa.

³¹Nga babaandu ne baulila kamakhuwa niko Daudi alomaloma, baboolela Saulo. Ne arumania bamulaanga.

³²Daudi aboolela Saulo ali, omwami, omundu yesi yesi se akhoyeele arie Omufilisiti yuno tawe! “Omukholi wowo alacha apane ne naye.”

³³Ne Saulo akobosia Daudi ali, “Tawe, ewe se onyala khu khuupana ne Omufilisiti yuno tawe. Ewe oli omuele, ne niye aba omunamae khukhwama mu buele bwewe khukhwola luno!”

³⁴Ne kakhali Daudi aboolela Saulo ali, “Omukholi wowo ayanga kamakheese ka raraawe. Buli lwosi nga etalang'i ne yiicha namwe ling'u ne libukula limeeme khukhwama mu lituuli nalitimanianga.

³⁵Naloondangakho niira, mala esikula limeeme khukhwama mu munwa kwalio. Ne yaba etalang'i namwe ling'u ne linjunukhila nakwichanga khu mayeeye mala nipa niira.

³⁶Omukholi wowo eera chitalang'i ne kamang'u. Ne Omufilisiti omusiinde yuno alaba nga chisaang'i echo, sikila afwochoole banamae ba Wele omenyile mindali.”

³⁷Ne Daudi aloma ali, “Wele Omunyali Owa Bioosi owasikula ese khukhwama mu matere ke etalang'i ne mu meno ke ling'u alasikula khukhwama khu mufilisiti yuno.” Nio Saulo aboolela Daudi ali, “Cha mala Wele Omunyali Owa Bioosi abe ne nawe!”

³⁸Saulo afwara Daudi bulwaani bwewe, amufwara ekofio ye kumukasa khu murwe, ne likooti lie mwiie.

³⁹Daudi akisa embalu yeewe khu ngubo eye liie mala akhaka khukeenda mala khunyala tawe, sikila aba se anala khufwara ario tawe. Nio Daudi aboolela Saulo ali, “Se nyala khucha nende bino tawe, sikila se nabinala tawe.” Nio Daudi abifuula.

⁴⁰Abukula esiimbo yewe, mala acha mu khechi khatiiti angalamo kamabaale kamamiufu karaano akara mu mufuko kwewe kwe bubwaayi. Aba ne lusia luchukucha kamabaale mu mukhono kwewe. Nio acha khukhwakaanana Koliati.

⁴¹Ne Koliati acha niio Daudi aba, ne omusutila engabo aba ebweeni wewe.

⁴²Nga Koliati ne alola mala abona Daudi, arakikha khumufwochola, sikila Daudi aba omuele omulayi lundi omubesemu.

⁴³Koliati areeba Daudi ali, “Ese embwa nio unjichekho ne chisaala?” Koliati alaama Daudi khulwe khurumikhira kamasina ke bawele bewe.

⁴⁴Koliati aboolela Daudi ali, “Yiicha mala endaelesia kumubili kwowo khu nyuni che mungaaki ne chisaang'i che mu mikuunda.”

⁴⁵Nio Daudi akobosia Koliati ali, “Ewe olikho wicha khu khuupana ne nase ne embalu ne lifumo, ne ese nicha khu khuupana ne nawe mu lisina lio Omwami Wele Omunyali Owa Bioosi, Wele owe bunyali, Wele owe banamae ba Isiraeli niye ewe ofwocholile.

⁴⁶Endaalo yino Wele Omunyali Owa Bioosi alakhura ewe mu bunyali bwase, ne ndakhwiira mala ndakhukhala kumurwe. Ne ndakabila kimibili kie banamae bafu be Bafilisiti chinyuni che mu ngaaki ne chisaang'i che mundaa. Nio liloba lioosi limanye lili Wele alio mu Isiraeli.

⁴⁷Ne lundi buli mulala oli ano amanye ali Wele Omunyali Owa Bioosi se aonianga khulwe khurumikhira embalu namwe lifumo tawe. Liie lili lia Wele Omunyali Owa Bioosi ne niye alamura enywe mu bunyali bwefwe.”

⁴⁸Koliati enyokha mala echa khukhwakaanana ne Daudi. Daudi atima khangu mwiie khucha khumwakaanana.

⁴⁹Daudi ara kumukhono kwewe mu mufuko nikwo aba nakwo, abukulamo libaale, ara khu lusia mala alifuruusia khu Koliati. Liaara Koliati siaanga mala liengila mu bwongo mukari. Koliati akwa asi mafumama.

⁵⁰ Nono Daudi aula Koliati ne khumwiira khulwe khurumikhira lusia ne libaale. Amwiira, ne Daudi se aba ne embalu mu mukhono kwewe tawe.

⁵¹ Nio Daudi atima eema khu Koliati. Abukula embalu yewe, mala akirusia mu sibaabi siayo. Eera Koliati ne khukhala kumurwe kwewe khulwe khurumikhira embalu eyo. Nga Bafilisiti ne babona bali omunamae wabwe omukhulu afwiile, belukha.

⁵²Nio Babaandu ba Isiraeli ne Yuda beyasa ne batimania Bafilisiti. Babatimania khukhwola e Katihi ne khu bilibwa bia Ekironi. Bafilisiti babaumiia bakwichanga khu ngila khukhwama Sharaimu, ne khukhwola Katihi ne Ekironi.

⁵³Baisiraeli bakobola khukhwama mu khutimania Bafilisiti mala bayaaya bie mu kambi ye Bafilisiti.

⁵⁴Ne Daudi abukula kumurwe kwa Koliati akuyila Yerusalemu. Ne kakhali abiikha bulwaani bwa Koliati mu liiema liewe.

⁵⁵Nga Saulo ne abona Daudi ne acha khu khuupana ne Koliati, areeba Abuneri komanda owe banamae ali, “Abuneri, omwana yuno owa naanu?” Abuneri amukobosia ali, “Omwami, nga ne omenya, se anyala namanya tawe.”

⁵⁶Saulo alaka Abuneri ali, “Reberesia omanye omwana owa naanu niye.”

⁵⁷Nio nga Daudi ne akobola enyuma we khukhwira Koliati, Abuneri amubukula amuyila khu Saulo. Daudi aba asisutile kumurwe kwa Koliati.

⁵⁸Ne Saulo amureeba ali, “Musoleeli, ewe omwana owa naanu?” Daudi amukobosia ali, “Ese omwana wo mukholi wowo Chesi khukhwama Betelehemu.”