Read lubukusu 1 Sam. 18 Bible Online

1 Sam. 18 - lubukusu bible

1 Sam. 18

¹Nga Saulo ne Daudi ne bamala khulomaloma, kumwoyo kwa Yonasani okhwa Saulo kwasiima Daudi. Yonasani asiima Daudi nga ne esiima omwene.

²Saulo abukula Daudi endaalo eyo ne se alekhuula Daudi akobola engo tawe.

³Nio Yonasani akhola endakaano ne Daudi, sikila asiima Daudi nga esiima omwene.

⁴Ne Yonasani afuula engubo yewe niyo aba ne afwarire mala aelesia Daudi. Lundi amuelesia akhaba ne mbalu yewe, buyiingo ne kumusiipi kwewe.

⁵Daudi arura acha mala aba ne bukhili buli abuundu niio Saulo amuruma. Nio Saulo amukhola khuba omwimeelesi owe banamae boosi. Lino liasiimisia babaandu boosi ne bakholi ba Saulo.

⁶Enyuma wa Daudi khukhwira Koliati, niye ne babaandu bewe bakobola engo. Baba oli bola, bakhasi barura khukhwama buli mu lukoba lwa Isiraeli khukhwakanila omwami Saulo. Baba balikho bemba kimienya kie khukhwekhoya ne bakhina ne khukhupa chitamburini ne kamatuungu.

⁷ Bakhasi bemba ne baloma bali, “Saulo erire chielefu chewe, ne Daudi chielefu kamakhumi ne kamakhumi.”

⁸Saulo aambwa lirima likali, mala lilomaloma elio liamuumisia lukali. Ne Saulo aloma ali, “Khu Daudi baboola chielefu kamakhumi ne kakaandi ne khwise bali chielefu busa. Siina lundi nisio alanyoola ne bukhali bubwami?”

⁹Mala akhendekhela Daudi khukhwama endaalo eyo ne khuchiililila.

¹⁰Ne endaalo eyaloondakho roho omubi khukhwama khu Wele, echa khu Saulo. Ne Saulo arakikha khulomaloma ne khukhola bibiindu oli omundu owe kamalalu munju mwewe. Daudi aba alikho apa lituungu nga ne akholanga buli endaalo. Ne Saulo aba ne lifumo mukhono mwewe.

¹¹Nio Saulo achukucha lifumo elio ebaasia ali, “Ndaunila Daudi khwisiisi.” Ne kakhali Daudi amwibachakho khukhwola khabili.

¹²Saulo aria Daudi sikila Wele Omunyali Owa Bioosi aba amulekha niye, mala aba ne Daudi.

¹³Nono Saulo arusia Daudi niio aba mala amukhola khuba komanda owe banamae eelefu ndala. Daudi emeelelanga babaandu bewe mwiie.

¹⁴Ne Daudi aba ne bukhili khu koosi niko akholanga, sikila Wele Omunyali Owa Bioosi aba ne naye.

¹⁵Ne nga Saulo ne abona ali Daudi aba ne bukhili bukali, atasa khumuria lukali.

¹⁶Ne kakhali Isiraeli yoosi ne Yuda yasiima Daudi sikila aba omwimeelesi wabwe.

¹⁷Nio Saulo aboolela Daudi ali, “Omukhaana wase omukhulu Merabu niye oyu. Ndakhuelesia ewe omukhwe. Ne kakhali ba omunyindaafu mala upane liie lia Wele Omunyali Owa Bioosi.” Sikila Saulo ebaasia ali, “Ese ekheera Daudi tawe, lekha Bafilisiti bakhole bario.”

¹⁸Daudi akobosia Saulo ali, “Ese ndi naanu, nende be kamafuki kase, luuya lwa Paapa wase nilwo naanu mu Isiraeli nio embe musaani owo mwami?

¹⁹Siise sia Merabu omukhaana owa Saulo nga siola, aebwa Adirieli omumeholati abe omukhasi wewe mu bweyaangu bwa Daudi.”

²⁰Nono omukhaana owa Saulo Mikali asiima Daudi. Mala baboolela Saulo. Likhuwa lino liasangaasia Saulo.

²¹Saulo ebaasia ali, “Lekha mbelesie Mikali khu Daudi, nio ekele kumureko khu Daudi, ne Bafilisiti bamuule.” Nono Saulo aboolela Daudi lukhola khabili ali, “Ewe olaba musaani wase.”

²²Ne alaka bakholi bewe ali, “Lomaloma ne Daudi ne muli mweng'ene mala mumuboolele muli, ‘Omwami akhusiima, ne bakholi bewe boosi bakhusiima. Nono, ba musaani wo mwami.’ ”

²³Bakholi ba Saulo baboolela Daudi kamakhuwa ako. Ne Daudi abakobosia ali, “Enywe mwibaasia muli lili liliangu khwise khuba musaani wo mwami? Ese ndi omutaambi ne se ndi omanyikhaane tawe.”

²⁴Bakholi ba Saulo bamuboolela niko Daudi aloma.

²⁵Nio Saulo ababoolela ali, “Boolela Daudi muli, ‘Omwami se enyakho bukhwe tawe. Ne kakhali enya kamafunga ke Bafilisiti emia ndala nio eyache basiku bewe.’ ” Nono Saulo ebaasia khukhola Daudi eerwe ne Bafilisiti.

²⁶Ne nga bakholi ba Saulo ne baboolela Daudi kamakhuwa kano, Daudi asangaalila khuba musaani wo mwami. Siise sisienyekha ne siikhawa tawe,

²⁷Daudi ne babaandu bewe bacha mala beera Bafilisiti chimia chibili. Daudi areera kamafunga khu omwami mala bamubalila koosi nio Daudi abe musaani wewe. Nio Saulo aelesia Daudi Mikali aba omukhasi wewe.

²⁸Ne kakhali Saulo abona mala amanya ali Wele Omunyali Owa Bioosi ali ne Daudi. Lundi aulila ali Isiraeli yoosi yasiima Daudi.

²⁹Saulo atasa khuria Daudi lukali. Nono Saulo aba omusiku owa Daudi mu limenya liewe lioosi.

³⁰Nio Babemeelesi be Bafilisiti bechanga mwiie. Nga bechanga ne belakho, Daudi aba ne bukhili bukali khukhila bakholi ba Saulo boosi. Nono lisina lia Daudi liamanyikhana lukali.