Read lubukusu 1 Sam. 19 Bible Online

1 Sam. 19 - lubukusu bible

1 Sam. 19

¹Saulo aboolela Yonasani omusoleeli wewe ne bakholi bewe boosi ali bakhoya beere Daudi. Ne kakhali Yonasani omusoleeli owa Saulo asiima Daudi lukali.

²Ne Yonasani aboolela Daudi ali, “Paapa wase alikho ayiima khukhwira ewe. Nono rekeeresia, kumutikhinyi, yikhala niio okhabonekha tawe mala wikiseo.

³Ne ese endarura enje niime siimbi ne paapa wase mu mukuunda mala ndomalome ne naye khwiwe. Ne mbulila liosi liosi, ekhakhuboolele.”

⁴Yonasani alomalomela raraawe bulayi khu Daudi. Aloma ali, “Omwami okhakhola kamakhiikha khu mukholi wowo Daudi tawe. Sikila niye se akhukholelakho kamakhiikha tawe. Lundi bikholwa bia Daudi biabeele bie buyeeti khwiwe.

⁵Daudi aana bulamu bwewe khukhwiira Koliati. Ne Wele Omunyali Owa Bioosi areera bukhili khu Isiraeli yoosi. Ewe wabona mala wasangaala. Siina sikila nono ne wenya khukhola kamamayaanu khu mundu okhali ne kamamayaanu tawe? Siina sikila ne wenya khukhwiira Daudi ne okhali ne sifuno sie khumwiira tawe?”

⁶Saulo aulila kamakhuwa ka Yonasani. Saulo echuba ali, “Nga Wele Omunyali Owa Bioosi ne amenyile mindali, Daudi se aleerwa tawe.”

⁷Nio Yonasani alanga Daudi mala amuboolela bibiindu bino bioosi. Ne Yonasani ayila Daudi khu Saulo, mala Daudi akholela Saulo nga aba ne akholanga.

⁸Ne liie liabao lundi. Daudi acha, mala apana ne Bafilisiti. Aula bakali mala belukha.

⁹Ne roho omubi khukhwama khu Wele Omunyali Owa Bioosi echa khu Saulo. Saulo aba ekhale munju mwewe ne lifumo liewe mukhono. Ne Daudi aba alikho akhupa lituungu.

¹⁰Saulo akhaka khuunila Daudi khu lisiisi ne lifumo liewe. Ne kakhali Daudi ebacha mala lifumo liauna mwisiisi. Daudi atima mala elukha.

¹¹ Siilo esio Saulo aruma barumwa balinde enju eya Daudi mala bamwire kumutikhinyi. Ne kakhali Mikali mukha Daudi aboolela Daudi ali, “Waaba ne okhaonia bulamu bwowo silo sino ta, muchuli okherwe.”

¹²Nono Mikali ekhisilia Daudi mwitirisia, mala Daudi elukha aona.

¹³Mikali abukula sifwaani asialisia khu sitaanda. Asitikiya lisisinwa nilio baruka khukhwama khu bufuumbo bwe chimbusi amurwe kwasio, mala asifumakho chingubo.

¹⁴Ne nga Saulo ne aruma barume khubukula Daudi, Mikali ababoolela ali, “Ali omulwale.”

¹⁵Nio Saulo aruma barumwa bache babone Daudi, ne aloma ali, “Ndeerere ne ali mu sitaanda nio emwiire.”

¹⁶Ne nga barumwa ne bengila munju banyoola sifwaani khu sitaanda basitikiye lisisinwa lie bufuumbo bwe chimbusi emurwe.

¹⁷Saulo areeba Mikali ali, “Siina sikila ne umbeyile mala wamusia omusiku wase?” Mikali akobosia Saulo ali, “Daudi amboleele ali, ‘Njeete nilukhe, ne busa ndakhwiira’ ”

¹⁸Nono Daudi atima, elukha mala acha khu Samweli e Rama. Aboolela Samweli koosi niko Saulo amukholela. Daudi ne Samweli bacha bamenya e Naoti.

¹⁹Ne Saulo aboolelwa ali “Daudi ali Naoti e Rama.”

²⁰Nio Saulo aruma barumwa khucha khubukula Daudi. Barumwa bakaanana ne sipupu sie bang'oosi balikho bang'oola. Samweli aba omwimeelesi wabwe. Nono Roho owa Wele echa khu barumwa ba Saulo mala bosi barakikha khung'oola.

²¹Nga Saulo ne aulila kano, aruma barumwa babaandi, mala bosi barakikha khung'oola. Ne Saulo aruma barumwa lukhola khataru mala bosi bang'oola.

²²Nio Saulo omwene acha e Rama. Ola khu sebele embalaayi eli Seku. Ne areeba ali, “Samweli ne Daudi bali waena?” Omundu mulala amukobosia ali, “Bali Naoti mu Rama.”

²³Ne khukhwama ebweeneyo acha Naoti mu Rama. Ne yesi Roho owa Wele amwichakho mala acha ne ang'oola nabwila ola Naoti mu Rama.

²⁴ Saulo efuula chingubo chewe, mala ang'oola ebweeni owa Samweli. Nio Saulo akona sichula endaalo eyo yoosi ne siilo esio sioosi. Ako kakila babaandu ne bareeba bali, “Saulo yesi ali mulala khu bang'oosi?”