Read lubukusu 1 Sam. 2 Bible Online

1 Sam. 2 - lubukusu bible

1 Sam. 2

¹ Hana lundi asaba ne aloma ali, “Kumwoyo kwase kwasangaala lukali mu Wele Omunyali Owa Bioosi; kamaani kase katasikha mu Wele Omunyali Owa Bioosi. Njekheelela basiku base, sikila esangaalila buonia bwa Wele Omunyali Owa Bioosi.

²Se aliio ooli omutakatifu nga Wele Omunyali Owa Bioosi tawe, se aliio okundi ne okhali ewe tawe; se luliio lulwanda nga Wele wefwe tawe.

³Mukhalomalomakho ne lilielola tawe, lilomaloma lie lilielola likhaamakho mu minwa kienywe tawe, sikila Wele Omunyali Owa Bioosi ali Wele owe limanya, ne khubirira khu niye bikholwa bikelwa.

⁴Buyiingo bwaabo be kamaani bwafuniikhe ne kakhali batekhele banyoolile kamaani.

⁵Abo ba baaba ne nabio luno babeele bakholi nio banyoole siakhulia. Ne abo ba baaba ne enjala luno se bali ne nayo tawe. Omukuumba asaalile babaana saba, ne kakhali oyo ooli ne babaana bakali ali busa.

⁶Wele Omunyali Owa Bioosi eraanga lundi alamusia; areeranga babaandu emakoombe lundi abakobosia.

⁷Wele Omunyali Owa Bioosi akholanga babaandu balala baba batambi ne babaandi baiinda, aboombianga, balala ne babaandi abaniinia.

⁸Aniinianga batambi khukhwama mwipukhuulu; aniinianga babanani khukhwama mwikokhe, khubakhola bekhale ne babaami, mala banyoole kumukabwa kwe ndebe eye lukoosi. Sikila chinjeko che liloba chili cha Wele Omunyali Owa Bioosi, ne khu nicho arakho sibala.

⁹Akhaliinde bikele bia abo baali babeyikinwa bewe, ne kakhali bamayaanu bakhabunile mu siilima; sikila omundu se akhakhile khulwe kamaani kewe tawe.

¹⁰Basiku ba Wele Omunyali Owa Bioosi bakhatonyekhe mu bitonyi; Wele owe Angaaki Lukali akhabakukumile nga lueni khukhwama mwikulu. Wele Omunyali Owa Bioosi akhakhalakile chimbeka choosi che sibala, akhaelesie omwami wewe kamaani, mala aniinie kamaani ko oyo niye aakha kamafura.”

¹¹Nio Elikana akobola engo e Rama. Ne omwana Samweli aakholela Wele Omunyali Owa Bioosi asi wo musaayi Eli.

¹²Nono, ba okhwa Eli baba be sipoli. Balekelesianga Wele Omunyali Owa Bioosi.

¹³Kumwiima kwe basaayi ne babaandu kwaba kuri; omundu yesi yesi ne aana embosio, omukholi owo musaayi eecha ne euma eye kameno kataru enyama ne esiitutuba,

¹⁴omukholi oyo aabukulanga euma eyo akiuna mu sifuria namwe epinika namwe mu ningilo, namwe mu saachi. Bioosi nibio euma yarusiangamo omusaayi ebukulilanga. Bakhola kano e Shilo khu buli Muisiraeli owechayo.

¹⁵Khutasa khwako, kiminawa ne kikhaaya tawe, omukholi owo musaayi echanga mala aboolela omundu olikho oaana embosio ali, “Mbelesie enyama eyo omusaayi ache oosie. Se alafukiilila enyama endeekhe khukhwama khwiwe tawe ne ekhali embisi yong'ene.”

¹⁶Ne omundu oyo amuboolela ali, “Lekha khwosie kiminawa nio, ne onyala wabukula sikelo nisio wenya,” omukholi wo musaayi amuboolelanga ali, “Tawe! Mbelesie siise sino. Ne okhambelesia tawe ndakibukula ne kamaani!”

¹⁷Nono bumayaanu bwe basoleeli ba Eli bwaba bukali lukali mu moni cha Wele Omunyali Owa Bioosi sikila babaandu abo se babechanga ne buuri khu siianwa sia Wele Omunyali Owa Bioosi tawe.

¹⁸Samweli akholelanga Wele Omunyali Owa Bioosi. Afwaranga engubo bali efodi eya katani.

¹⁹Buli mwiiko maawe amunabilanga engubo endiiti ne amuyilila. Akholanga ario nga ne aniinanga ne omuseecha wewe e Shilo khuaana embosio eya buli mwiiko.

²⁰Ne Eli abiitanga Elikana ne omukhasi wewe chikhabi ne aloma ali, “Wele Omunyali Owa Bioosi akhue ewe babaana khubirira mu mukhasi yuno mu bweyaangu bwo mwana niye aana khu Wele Omunyali Owa Bioosi.” Enyuma wako bakobolanga engo.

²¹Wele Omunyali Owa Bioosi aakhebulila Hana, mala Hana asaala babaana babaandi basoleeli bataru ne bakhaana babili. Omusoleeli Samweli achoela mu bukhalabani bwa Wele Omunyali Owa Bioosi.

²²Nono, Eli aba akorire lukali. Ne aulila koosi niko babaana bewe bakholelanga Isiraeli yoosi. Lundi aulila nga ne bakonaanga ne bakhasi babakholanga a silibwa sie liiema lie kumuse.

²³Nio aabareeba ali, “Siina sikila ne mukhola bibiindu birio? Nauliile bikholwa bienywe bimayaanu khukhwama khu baandu boosi.

²⁴Tawe baana base. Nilio mbuliile babaandu ba Wele Omunyali Owa Bioosi ne baloma se lili lilayi tawe.

²⁵Omundu ne akholela omundu okundi bumayaanu, Wele anyala amusoola, ne omundu ne akholela Wele Omunyali Owa Bioosi bumayaanu, naanu onyala amusoola?” Ne se baulila kumumilo kwa Paapa wabwe tawe. Sikila liaba lilienya lia Wele Omunyali Owa Bioosi ali abeere.

²⁶ Nono omwana Samweli achiililila khuchoa ne asiimisia Wele Omunyali Owa Bioosi ne babaandu.

²⁷Omundu owa Wele echa khu Eli mala amuboolela ali, “Wele Omunyali Owa Bioosi alomile ali, ‘Nemanyisia samwene khunju eya raraao nga baba ne basiili e Misiri. Baba bali banasioobi be enju eya Farao.

²⁸ Mala narobora enju eya raraao khukhwama mu kholo choosi cha Isiraeli khuba basaayi base. Nenya nibo baniine khu alutare khukhwosia bupani. Lundi bafware efodi[7] ebweeni wase. Ne naelesia enju eya Raraao biianwa biase khubirira mu mulilo khukhwama khu baandu ba Isiraeli.

²⁹Siina sikila nono, ewe ne olola biianwa biase ne chimbosio nibio nalaka ne chimoni che kumuliuliu? Siina sikila ne oelesia babaana bowo lukoosi khukhila ese ne munerera bitonyi bilayi bie biianwa birobore bie babaandu base?’ ”

³⁰Nio Wele Omunyali Owa Bioosi owa Isiraeli aloma ali, “Nalaka ndi enju eya raraao ninywe mumukholela ese mindali na mindali.” Ne kakhali luno Wele Omunyali Owa Bioosi aloma ali, “Elio likhoya liaba aleeyi ne nase.” Ndaana lukoosi khwaabo ba bambelesianga ese lukoosi, ne kakhali abo ba bandekelesia ndibalekelesia.

³¹Siise silikho siicha nisio khakhubunie ewe lundi mbunie nju eya raraao. Nio se akhabeo omundu okhamenye abe omusaakhulu khukhwama munju yowo tawe.

³²Mu munaanio kwowo okhakhendekhele bukhili bwoosi bukhabe khu Isiraeli. Ne omundu omusaakhulu se akhabekho munju yowo khulwa mindali na mindali tawe.

³³Omundu[8] oyo okhachiililile khukhola kimilimo khu alutare yase akhanyoole biililo ne bubeeleli mu mwoyo kwewe. Baali munju mwowo boosi bakheerwe ne embalu.

³⁴ Ne lino nilio likhekholekhe khu basoleeli bowo babili, Hofini ne Fineasi. Bakhabe simanyisio khwiwe. Bombi bakhafwe khu ndaalo ndala.

³⁵Ese kharobore omusaayi omweyikinwa, okhakhole khuloondekhana nende kali mu mwoyo kwase ne munganakani chase. Lundi khakhole lisaaye liewe lichiililile. Akhakhole ebweeni wo omwami wase omurobore mindali na mindali.

³⁶Ne yesi yesi okhasikale munju yowo aliicha khu musaayi oyo amusabe efwesa namwe kumukaati. Lundi akhalome ali, “Khole mbe mulala khu basaayi nio ndieekho sitonyi sie kumukaati.”