Read lubukusu 1 Sam. 20 Bible Online

1 Sam. 20 - lubukusu bible

1 Sam. 20

¹Nio Daudi elukha khukhwama Naoti mu Rama mala acha areeba Yonasani ali, “Siina nisio ekholile? Bumayaanu bwase buli siina? Bumayaanu siina nibwo nakholeele raraao nio ayiime khu khunjira?”

²Yonasani amukobosia ali, “Tawe! Se olafwa tawe. Paapa wase se akholanga sisiindu siakhaba siboofu namwe sitiiti ne akhambooleele ese tawe. Ne siina sikila Paapa akise liliene elio khwise? Se kali kario tawe.”

³Ne kakhali Daudi akobosia ali, “Raraao amanyile bulayi bwene ali ewe wasiima ese. Ne ebaasia ali, ‘Yonasani akhoya alekha khuulila khu lino tawe, ne busa anyala abeelela.’ Ne bulayi bwene nga Wele Omunyali Owa Bioosi ne amenyile mindali, ne wesi nga ne omenya ese ndi busa sikele silala khukhwama khu lifwa!”

⁴Nio Yonasani aboolela Daudi ali, “Nilio oloma liosi liosi, ndakhola.”

⁵ Daudi aboolela Yonasani ali, “Muchuli eli Naikara eye kumwesi kumuyia. Mala nenyekha endie ne omwami. Nono lekha enje nikise mu lukoongo khukhwola ekolooba eye endaalo eye khataru.

⁶Raraao ne akhambonao tawe, muboolele oli, ‘Daudi anjikoonjelele mulekhuule atambeo, ache mu lukoba lwewe e Betelehemu. Sikila sili siise sie khuaana embosio eya buli mwiiko eye be luuya lwewe boosi.’

⁷Aaba ne aloma ali, ‘Bulayi!’ Aba naonile. Ne aaba ne aambwa lirima, manya oli abele enya khukhukholela ese kamabi.

⁸Nono, kholela omukholi wowo bulayi sikila wakholile endakaano endakatifu ne nase. Ne kalio kamakhiikha khwise, njire wamwene. Siina sikila unjile khu raraao?”

⁹Yonasani amukobosia ali, “Tawe! Ese ne emanya ndi paapa wase enya khukhukholela ewe kamabi ne ekhuboolela.”

¹⁰Nio, Daudi areeba Yonasani ali, “Naanu olamboolela ese aaba bali raraao akhukobosia ewe mu burafu?”

¹¹Ne Yonasani akobosia Daudi ali, “yiicha khuche mu lukoongo.” Nono boombi bacha mu lukoongo.

¹²Ne Yonasani aboolela Daudi ali, “Wele Omunyali Owa Bioosi, Wele owa Isiraeli abe omuloli wefwe. Muchuli nga siise sino namwe endaalo eloondakho, ekhareebe Paapa. Liba liewe liaba lilayi khwiwe, ekhakhurumire likhuwa.

¹³Kaaba bali paapa wase alikho arekekha khukhukholela ewe kamabi, Wele Omunyali Owa Bioosi ambelesie ese kumunaanio, naaba ne ekhakhuboolela okamanye tawe, mala khumusie wilukhe. Wele Omunyali Owa Bioosi akhoya abe ne nawe nga ne abeele ne paapa wase!

¹⁴Ne esiliio omulamu, yookesia busiime bwowo bwe bubweyikinwa bwa Wele Omunyali Owa Bioosi. Nio ekhafwa tawe.

¹⁵ Wele Omunyali Owa Bioosi akhabunisilie elala basiku bowo boosi khukhwama khu liloba. Ne akholile ario, okhakamia bubweikinwa bwowo khu be luuya lwase mindali na mindali tawe.”

¹⁶Nono Yonasani akhola endakaano ne Daudi. Ne aloma ali, “Wele Omunyali Owa Bioosi akhoya eyache basiku ba Daudi.”

¹⁷Yonasani lundi echubia Daudi khukhwekesia ali Daudi amusiima. Sikila Yonasani asiima Daudi nga esiima omwene.

¹⁸Nio Yonasani aboolela Daudi ali, “Muchuli ekhabe Naikara eye kumwesi kumuyia. Ne khukhakhutambe sikila endebe yowo ekhabe busa.

¹⁹Ne busiayo, khukhakhutambe lukali. Nono cha wikise abuundu niio wekisa butinyu buno nga bwarakikha, enyuma we situuta sie kamabaale.

²⁰Ne ekhalase buembo butaru lubeka lulala lwe situuta nga olasa sisiindu.

²¹Ekharume omusoleeli wase ayiime buembo. Ne emuboolela ndi, ‘Lola buembo buli lubeka lwowo luno bukula,’ aba ndikho ndoma ndi wiche sikila nga Wele Omunyali Owa Bioosi ne amenyile mindali, buli bulayi khwiwe. Busiku se buliio tawe.

²²Ne naaba ne ndoma ndi, ‘Buembo buli lubeka lwowo luluundi olwo,’ aba cha, sikila Wele Omunyali Owa Bioosi alikho akhuyila alayi.

²³Ne khu ako niko ewe ne nase khulomalomekho, Wele Omunyali Owa Bioosi ali omuloli akari wase ne nawe mindali na mindali.”

²⁴Nono Daudi ekisa mu lukoongo. Nga Naikara eye kumwesi kumuyia yola, omwami Saulo ekhala khulia siakhulia.

²⁵Omwami ekhala khu ndebe yewe nga biise bibiindi bioosi, siimbi ne lisiisi. Yonasani ekhala lubeka luluundi aloleelela Saulo. Ne Abuneri ekhala aloondekhana ne Saulo. Endebe eya Daudi yaba busa.

²⁶Ne Saulo se alomakho sisiindu endaalo eyo tawe. Ebaasia ali, “Wakana sisiindu siekholekhe khu Daudi mala abeele omunyaalu.”

²⁷Endaalo ekhola khabili eya naikara eye kumwesi kumuyia, endebe eya Daudi yaba busa. Ne Saulo areeba Yonasani ali, “Siina sikila okhwa Chesi ne akhechile khu naikara likoloba namwe endaalo yino tawe?”

²⁸Yonasani akobosia Saulo ali, “Daudi anjekoonjelele mulekhuule ache e Betelehemu.

²⁹Alomile ali, ‘Nosiima lekha enje, sikila be luuya lwase bali ne naikara eye embosio mu lukoba mala wandaayase andakile embeyo. Nono luno waaba ne wasiima, lekha enje mala mbone bawandaayase.’ Elio nilio likila ne akhechile mu naikara eyo mwami tawe.”

³⁰Nio Saulo aambila Yonasani lirima likali mala amuboolela ali, “Ewe mwana wo omukhasi omumayaanu ne ekileki! Ewe wibaasia oli se namanyile ndi oli lubeka lwa Daudi tawe? Olikho weambia wamwene chisoni ne maao owakhusaala.

³¹Nga okhwa Chesi ne ali omulamu khu liloba, ewe se oliba omwami namwe obe ne bubwami tawe. Nono rumania Daudi mala omureere. Ng'ali alafwa.”

³²Nio Yonasani akobosia Saulo ali, “Siina sikila afwe? Akholile siina?”

³³Ne kakhali Saulo amuchukucha lifumo ali amwire. Nono Yonasani amanya ali raraawe aba ne sinani khukhwira Daudi.

³⁴Nio Yonasani enyokha khu sialwa mu lirima likali ne se aliakho siakhulia endaalo eye khabili eye kumwesi kumuyia tawe. Sikila abeelela khulwa Daudi nga Saulo ne aambia Daudi chisoni.

³⁵Endaalo eyaloondakho Yonasani acha mu lukoongo nga alakana ne Daudi. Abukula omwana omusoleeli acha ne naye.

³⁶Nio aboolela omusoleeli oyo ali, “Tima, oyiime buembo nibwo ndikho nja khulasa.” Omusoleeli oyo nga ne atima, Yonasani alasa buembo ebweeni wewe.

³⁷Nga omusoleeli oyo ola niio luembo lukwile, Yonasani amulaanga ali, “Luembo luli abwenikho ao!”

³⁸Lundi amuboolela ali, “Khola khangu okhaliinda tawe.” Nono omusoleeli owa Yonasani abuusia buembo mala arerera omwami wewe.

³⁹Ne omusoleeli se amanya sisiindu siosi siosi tawe. Yonasani ne Daudi bong'ene ba bamanya sisiekholekha.

⁴⁰Yonasani aelesia omusoleeli oyo bulwaani mala amuboolela ali, “Suta obukobosie mu lukoba.”

⁴¹Ne nga omusoleeli oyo arekukhe busa ari, Daudi enyokha khukhwama lubeka we situuta sie kamabaale. Asikama mala enama bubweeni bwewe bwetiila khu liloba khukhwola khataru. Daudi ne Yonasani bekwayanila ne balilila alala khukhwola nga Daudi ne aola.

⁴²Nio Yonasani aboolela Daudi ali, “Cha mu muleembe. Khwechubanile ne nawe mu lisina lia Wele Omunyali Owa Bioosi khuli, ‘Wele Omunyali Owa Bioosi akhabe omuloli akari wase ne nawe ne akari we lisaaye liowo ne lisaaye liase mindali na mindali.’ ” Nio Daudi arekukha, ne Yonasani acha mu lukoba.