Read lubukusu 1 Sam. 22 Bible Online

1 Sam. 22 - lubukusu bible

1 Sam. 22

¹ Daudi arura Katihi mala elukhila mu libina lia Adulamu. Nga bawandaaye ne be enju eya raraawe boosi baulila bali aliyo, bacha niio aba.

²Buli mundu owaba mu butinyu ne buli mundu owaba ne likobi namwe bakhasiimisibwa tawe boosi bebuusia niio Daudi aba. Ne aba omwimeelesi wabwe. Babaandu ba baaba ne naye baba chimia chine.

³Daudi ama abwenao acha e Misipa mu Moabu. Aboolela omwami owa Moabu ali, “Nosiima lekha paapa wase ne maayi wase beche bamenye ne nawe khukhwola nga ne manya nisio Wele alikho acha khukhukholela.”

⁴Ne Daudi alekhela omwami owa Moabu raraawe ne maayi wewe. Mala bamenyayo siise sioosi nisio Daudi aba ne ekisile mu libina.

⁵Nio omung'oosi Kati aboolela Daudi ali, “Okhamenya mu libina tawe. Rekukha mala oche mu sibala sia Yuda.” Nono Daudi arekukha mala acha mu musiru kwa Hereti.

⁶Nono Saulo aulila ali Daudi ne babaandu bewe ba baaba ne naye banyoolekhe. Saulo aba ekhaale e Kibea a murongooro kumutamarisiki ne bakholi bewe baba bamwimileo siimbi. Aba atilile lifumo.

⁷Ne Saulo areeba bakholi bewe ali, “Ulila babaandu ba Benjamini, mwibaasia muli okhwa Chesi akhamuelesie enywe mweesi kimikuunda ne kamaruuti ke kimisabibu? Mwibaasia muli Daudi akhamukhole enywe khuba banamae babemeelesi be babaandu bewe chielefu namwe chimia?

⁸Enywe mweesi se munjenyela bulayi tawe. Mbao oumboolela omwana wase ne akhola endakaano ne okhwa Chesi tawe. Se aliio oukholela siisa namwe amboolela ali omwana wase achongele omukholi wase anjibuulile endaalo yino tawe.”

⁹ Ne Toeki Omuedomu aba emile siimbi ne bakholi ba Saulo. Mala akobosia Saulo ali, “Naboone okhwa Saulo ne acha Nobu khu Ahimeleki okhwa Ahitubu.

¹⁰Ahimeleki areeba Wele Omunyali Owa Bioosi khulwa Daudi. Ne aelesia Daudi biakhulia ne embalu yaba eya Koliati Omufilisiti.”

¹¹Nio omwami Saulo arumania bareere omusaayi Ahimeleki nende be enju yewe boosi ba baaba bosi basaayi mu Nobu mala becha khu Saulo.

¹²Saulo aboolela Ahimeleki ali, “Rekeeresia nono okhwa Ahitubu.” Ahimeleki amukobosia ali, “Omwami narekereesie.”

¹³Ne Saulo amureeba ali, “Siina sikila ewe ne okhwa Chesi ne mukhanjenyela bulayi tawe? Siina sikila ne omuelesie biakhulia ne embalu mala wamusabila khu Wele? Luno angalukhanekho mala anjibuulile?”

¹⁴Ahimeleki akobosia omwami ali, “Naanu mu bakholi bowo boosi oli omweyikinwa nga Daudi? Naanu niye musaani owo mwami ne omunamae omwimeelesi owe banamae bowo? Naanu oli ne lukoosi munju yowo?

¹⁵Luno luli lwe khunyoa ese khureebera Daudi khu Wele ku? Tawe! Omwami akhebaasia kamabi kosi kosi khu mukholi wewe namwe khu nju yoosi eya Paapa wase tawe. Sikila omukholi wowo se amanyilekho siosi siosi khu kekholekhe tawe.”

¹⁶Ne omwami aboolela Ahimeleki ali, “Ahimeleki! Ewe ne be enju eya raraao ng'ali mulafwa.”

¹⁷Ne omwami aboolela omunamae omuliindi owaba ne amwimileo ali, “Cha mala wire basaayi ba Wele Omunyali Owa Bioosi. Sikila bauliilisiana ne Daudi. Lundi bamanya bali Daudi elukha mala se bamboolela tawe.” Ne kakhali bakholi bo mwami baloba khukhwira basaayi ba Wele Omunyali Owa Bioosi.

¹⁸Ne omwami aboolela Toeki ali, “Ewe cha mala wire basaayi.” Ne Toeki Omuedomu acha mala eera basaayi. Endaalo eyo eera babaandu kamakhumi munane ne baraano ba baaba ne befwarire efodi.

¹⁹Lundi akhaba mu lukoba lwe basaayi lwa Nobu, eramo babaandu. Era baseecha ne bakhasi, babaana ne banuuna. Era akhaba chikhaafu ne chipunda ne kamakheese khulwe khurumikhira embalu.

²⁰Abiatari mulala khu baana ba Ahimeleki elukha aona. Acha mala aambana ne Daudi.

²¹Abiatari aboolela Daudi ali, “Saulo eriire basaayi ba Wele Omunyali Owa Bioosi.”

²²Ne Daudi aboolela Abiatari ali, “Nga ne nabona Toeki e Nobu endaalo eyo namanya ndi ng'ali alaboolela Saulo. Ese niye okilile nio babaandu be enju eya raraao boosi bafwa.

²³Menya ne nase mala okharia tawe. Sikila oyo oyima bulamu bwase ayima ne bubwowo. Ne oli ne nase, olaona.”