Read lubukusu 1 Sam. 23 Bible Online

1 Sam. 23 - lubukusu bible

1 Sam. 23

¹Nono baboolela Daudi bali, “Bafilisiti balikho bapana ne lukoba lwa Keila mala balikho banuula biakhulia khukhwama abiuulilo.”

²Nono Daudi areeba Wele Omunyali Owa Bioosi ali, “Nje nibwaakale Bafilisiti?” Wele Omunyali Owa Bioosi akobosia Daudi ali, “Yee, cha wibwaakale Bafilisiti mala oonie Keila.”

³Ne kakhali babaandu ba Daudi bamuboolela bali, “Efwe khuli ne buuri ne khuli mu Yuda muno. Ne aba khularia khuriena, khwaaba ne khucha Keila khukhwibwaakala banamae be Bafilisiti?”

⁴Ne lundi Daudi areeba Wele Omunyali Owa Bioosi. Ne Wele Omunyali Owa Bioosi amukobosia ali, “Yiikha oche Keila. Sikila ese nja khukhukhola oule Bafilisiti.”

⁵Nio Daudi ne babaandu bewe bacha Keila mala bapana ne Bafilisiti. Bakobosia chikhaafu chabwe. Daudi eera Bafilisiti bakali mala aonia babaandu ba Keila.

⁶Nga Abiatari okhwa Ahimeleki ne elukha acha niio Daudi aba e Keila, acha ne efodi mu makhono kewe.

⁷Nono Saulo aboolelwa ali Daudi achile Keila. Ne Saulo aloma ali, “Wele areere Daudi mu bunyali bwase. Daudi omwene erekire khulwe khukhwingila mu lukoba lwe bilibwa ne kimiliango kimisiro.”

⁸Saulo alaanga babaandu boosi bacha mwiie mala bache Keila botookhelesie Daudi ne babaandu bewe.

⁹Daudi amanya ali Saulo alikho arekekha kamamayaanu khu niye. Ne aboolela Abiatari omusaayi ali, “Reera ano efodi.”

¹⁰Nio Daudi aloma ali, “Ee Wele Omunyali Owa Bioosi, Wele owa Isiraeli, omukholi wowo ng'ali aulile ali Saulo alikho arekekha khukhwicha Keila mala onake lukoba sikila ese.

¹¹Babaandu ba Keila balanjakanisia ese khu Saulo? Saulo alecha Keila nga omukholi wowo ne aulile? Ee Wele Omunyali Owa Bioosi, Wele owa Isiraeli ekhwikongochela mboolele ese omukholi wowo.” Wele Omunyali Owa Bioosi akobosia Daudi ali, “Saulo alecha”

¹²Daudi areeba ali, “Babaandu ba Keila balanjakanisia ese ne babaandu base khu Saulo.” Wele Omunyali Owa Bioosi akobosia ali, “Balakhola bario.”

¹³Nio Daudi ne babaandu bewe ba baaba embi chimia sita benyokha barura mu Keila, mala bacha niio banyala khucha. Nga Saulo ne aulila ali Daudi elukhe khukhwama mu Keila, alekha lirekekha liewe.

¹⁴Daudi amenya mu libina mu sibala sie lukulu mu sichiimi sia Sifu. Ne Saulo amuyiima buli nyanga, ne kakhali Wele Omunyali Owa Bioosi se ara Daudi mu bunyali bwa Saulo tawe.

¹⁵Ne Daudi aria Sikila Saulo aba arurire khuyima bulamu bwewe. Daudi aba mu sichiimi sia Sifu e Horeshi.

¹⁶Ne Yonasani okhwa Saulo enyokha acha niio Daudi aba e Horeshi mala atasa Daudi bubweyikinwa bwewe mu Wele.

¹⁷Ne Yonasani aboolela Daudi ali, “Okharia tawe, paapa wase Saulo se akhakhutilekho tawe. Ewe okhabe omwami owa Isiraeli. Ne ese ekhabe siimbi ne nawe. Paapa wase Saulo yesi amanyile lino.”

¹⁸ Ne boombi bakhola endakaano ebweeni wa Wele Omunyali Owa Bioosi mala Daudi asikala Horeshi ne Yonasani akobola engo.

¹⁹ Nio Basifu bacha khu Saulo e Kibea mala bamuboolela bali, “Daudi ekisa mwifwe mu libina e Horeshi khu sikulu sia Hakila, siili ebunafubo wa Yesimoni.

²⁰Nono omwami waaba ne wenya khukhwiikha wiche ne kumwoyo kwowo kwoosi, yiikha wiche. Kimilimo kiefwe kilaba khukhwakanisia Daudi khwiwe.”

²¹Ne Saulo abakobosia ali, “Wele Omunyali Owa Bioosi amubiite enywe chikhabi khulwe khu khukholela siisa.

²²Cha mu manyilisie mala mubone abuundu niio ali, lundi mumanye naanu omuboone ebweeneyo. Sikila naulila bali ali omubacha lukali.

²³Lola nono mala mumanyilisie abuundu oosi niio ekisanga mala mukobole mumboolele bung'ali. Nio ekhache ne nanywe. Ne aaba ne ali mu lukoongo, aba ekhamuyime mu baandu boosi ba Yuda.”

²⁴Nio Basifu benyokha mala bacha ebweeni wa Saulo e Sifu. Nono Daudi ne babaandu bewe baba mu sichiimi sia Maoni mu Araba, ebunafubo owa Yesimoni.

²⁵Ne Saulo ne babaandu bewe bacha khuenja Daudi mala Daudi aulila. Nono Daudi ekha khu lwanda luli mu sichiimi sia Maoni. Ne nga Saulo ne aulila ako aloonda khu Daudi mu sichiimi sia Maoni.

²⁶Saulo ne babaandu bewe bakeendanga ne bacha lubeka lulala lwe lukulu ne Daudi ne babaandu bewe bacha lubeka luluundi. Ne Daudi akeendanga khangu, khukhwilukha Saulo ne babaandu bewe ba baaba ne bembiie Daudi ne babaandu bewe khubatiila.

²⁷Abwene ao, omurumwa echa khu Saulo ne aloma ali, “Khola khangu wiche. Bafilisiti balikho bebwaakala sibala.”

²⁸Nono Saulo alekha khuloonda khu Daudi mala acha khu khuupana ne Bafilisiti. Nono abuundu ao alaangwa ali, lulwanda lwe khukhwilukha.

²⁹Ne Daudi aniina khukhwama abwenao mala amenya mu libina e Engedi.