Read lubukusu 1 Sam. 24 Bible Online

1 Sam. 24 - lubukusu bible

1 Sam. 24

¹Nga Saulo ne akobola khukhwama mu khutimania Bafilisiti, aboolelwa ali, “Daudi ali mu sichiimi sia Engedi.”

²Nio Saulo aabukula babaandu chielefu chitaru babaroborwa khukhwama mu Isiraeli. Ne acha khuyiima Daudi ne babaandu bewe ebweeni we lulwanda lwe chimbusi che mundaa.

³Nga aba ne ali khu lukeendo, oola a biko bie kamakheese. Abwene ao, libina liabao. Ne Saulo engila mu libina elio khucha khukhwiyeta. Nono Daudi ne babaandu bewe baba bekhale mu lusokho lwe libina etaayi.

⁴Ne babaandu ba Daudi baboolela Daudi bali, “Yino niyo endaalo niyo Wele Omunyali Owa Bioosi akhuboolela ali, ‘Khare omusiku wowo mu bunyali bwowo, mala okhamukhole siosi siosi siikhusiimisie.’ ” Nio Daudi enyokha kalaa ne mu bwikisi akhalaka silaka khu ngubo eya Saulo.

⁵Ne enyuma wako, Daudi anaanisibwa kumwoyo sikila aba akhalile engubo eya Saulo.

⁶Ne aboolela babaandu bewe ali, “Wele Omunyali Owa Bioosi akhoya akhiingilile ekhakhola ndio nakhola sisiindu nga esio khu mwami wase tawe. Kumukhono kwase kukhetila khu Saulo tawe sikila ali omuchukhekho kamafura owa Wele Omunyali Owa Bioosi.”

⁷Nono Daudi ekoonjelela babaandu bewe ne kamakhuwa kano ne se abalekhuula bebwaakala Saulo tawe. Ne Saulo enyokha arura mwibina mala arakikha lukeendo lwewe lundi.

⁸Enyuma wako, Daudi enyokha arura mwibina mala alaanga Saulo ali, “Omwami wase!” Ne nga Saulo ne ekhebukha enyuma, Daudi enama bubweeni bwetiila asi ne khukhwekesia liria.

⁹Ne Daudi areeba Saulo ali, “Siina sikila ewe ne orekeeresia kamakhuwa ke babaandu baloma bali, ‘Daudi ayima khukhuumisia?’

¹⁰Endaalo yino chimoni chowo chabone nga Wele Omunyali Owa Bioosi ne akhurere ewe luno mu bunyali bwase mu libina. Ne balala bamboolele khwire, ne kakhali ekhulekhile. Endomile ndi, ‘Se ndeera omwami wase tawe. Ali omuchukhekho kamafura owa Wele Omunyali Owa Bioosi.’

¹¹Paapa wase, lola silaka sie engubo yowo siili mu mukhono kwase. Endabuule silaka sie engubo yowo ne se ekhwirire tawe. Lino liekesia lili sendi ne kamakhiikha namwe se nakhwaukhakho tawe. Ese se nakhukholeele ewe kamamayaanu tawe, akhaba ewe ne oyima khukhunjira.

¹²Wele Omunyali Owa Bioosi akhoya abe omukhalaki akari wase ne nawe lundi Wele Omunyali Owa Bioosi akhoya anjiyachila ewe. Ne kakhali kumukhono kwase se kukhwetilakho tawe.

¹³Lusimo lwe khaale luboola luli, ‘Khukhwama mu makhiikha kamangamo kamakhiikha.’ Ne kakhali kumukhono kwase se kukhwetilakho tawe.

¹⁴ Omwami owa Isiraeli arurire khuloonda khu naanu? Olikho otima khu naanu? Olikho otima khu mbwa efu namwe sichiinji?

¹⁵Wele Omunyali Owa Bioosi akhoya abe omukhalaki, mala akhalake akari wase ne nawe. Akhoya ambabine mala asikule khukhwama khwiwe.”

¹⁶Nga Daudi ne amala khuboolela Saulo kamakhuwa kano, Saulo areeba ali, “Mwana wase Daudi, okwo kumumilo kwowo?” Saulo alila lukali.

¹⁷Aboolela Daudi ali, “Ewe oli owa ng'ali khukhukhila ese. Sikila ewe wakholeele kamalayi, ne ese nakhukholeele ewe kamamayaanu.

¹⁸Ne endaalo yino wekesie nga ne wakholela bulayi sikila se unjirire ese nga Wele Omunyali Owa Bioosi ne andeere mu bunyali bwowo tawe.

¹⁹Omundu ne anyoola omusiku wewe, anyala amulekha acha ne ali omulamu ku? Wele Omunyali Owa Bioosi akhoya akhuruunge ewe bulayi khu niko ukholeele ese endaalo yino.

²⁰Luno nono namanyile ndi ng'ali ewe okhabe omwami. Ne bubwami bwa Isiraeli bukhachiililile asi wowo.

²¹Njechubile nono mu Wele Omunyali Owa Bioosi oli se okheere lisaaye liase tawe nio lisina liase lilekhe khutamba munju eya paapa wase tawe.”

²²Ne Daudi echubila Saulo lino. Nio Saulo acha engo, ne Daudi ne babaandu bewe bakobola mu libina.