Read lubukusu 1 Sam. 25 Bible Online

1 Sam. 25 - lubukusu bible

1 Sam. 25

¹Nono Samweli afwa, mala Baisiraeli boosi bebuusia alala bamulila. Ne bamusiikha mungo mwewe e Rama. Nio Daudi acha mu sichiimi sia Parani.

²Abao omundu mu Maoni aba ne kimiaandu kiewe mu Karimeli. Omundu oyo aba omuiinda lukali. Aba ne kamakheese chielefu chitaru ne chimbusi eelefu ndala. Aba alikho akhala bufuumbo bwe kamakheese kewe mu Karimeli.

³Lisina lio mundu oyo liaba bali Nabali ne lisina lio mukhasi wewe liaba Abikaili. Omukhasi wewe aba ne limanya lilayi ne lukoondo lulayi. Ne omuseecha wewe aba owe lirima likali ne kimiima kimibi. Omundu oyo aba owe ekholo eya Kelabu.

⁴Nga Daudi aba mu sichiimi aulila ali Nabali alikho akhala bufuumbo bwe kamakheese kewe.

⁵Nono Daudi aruma basoleeli baele ekhumi. Ababoolela ali, “Cha e Karimeli mala mukheselie Nabali.

⁶Ne mulamukheesia muli, ‘kumuleembe kube khwiwe ne khunju yowo ne khu bioosi nibio oli ne nabio.

⁷Mbulila bali oli ne bakhali be bufuumbo bwe kamakheese. Nono babaayi bowo babeele ne nafwe ne se khwabakholile libi tawe, ne se batambile sisiindu siosi siosi tawe siise sioosi nisio babele e Karimeli.

⁸Bareebe mala balakhuboolela. Nono kholela basoleeli base siisa mu moni chowo sikila khwechile endaalo eya naikara. Khu khusaba oeleesie bakholi bowo ne omusoleeli wowo Daudi siosi siosi nisio oli ne nasio.’ ”

⁹Nga babaandu ba Daudi ne becha, baboolela Nabali nga Daudi ne abaruma mala baliinda.

¹⁰Nabali akobosia babaandu ba Daudi ali, “Daudi niye naanu? Okhwa Chesi niye naanu? Bakholi leelo bakhilile babelukha khukhwama khu baami babwe.

¹¹Siina sikila embukule kumukaati kwase ne kameechi kase ne chinyama chase embelesie babaandu nibo ekhamanyile tawe? Bino bili bie babaandu base babeka bufuumbo bwe kamakheese.”

¹²Babaandu ba Daudi bakobola niio Daudi aba mala bamuboolela niko Nabali aba ne alomile.

¹³Ne Daudi aboolela babaandu bewe ali, “buli mundu aboe embalu yewe!” Ne buli mundu aboa embalu yewe. Daudi yesi aboa embalu yewe. Ne babaandu embi chimia chine baloonda khu Daudi ne babaandi chimia chibili basikala khuliinda bibiindu.

¹⁴Ne kakhali mulala khu bakholi ba Nabali aboolela Abikaili omukhasi owa Nabali ali, “Lola Daudi aruma barumwa bewe balala khukhwama mu sichiimi bakheesie omwami wefwe mala omwami abakhoma.

¹⁵Ne kakhali nibo baba balayi lukali khwifwe se bakhuumisiakho efwe tawe. Ne efwe se khwatambakho sisiindu siosi siosi tawe nga ne khwaba mu lukoongo siise sioosi nisio khwaba ne nabo.

¹⁶Baba nga lisiisi khwifwe silo ne kumuusi buli lwosi nga ne khwaba ne khwaya kamakheese ne nabo.

¹⁷Nono luno manya lino mala wibaasie nilio onyala wakhola. Sikila sinyala khuba siieli khu mwami wefwe ne khu be enju yewe boosi. Ali omundu owe liba libi, se anyala arekeeresia ko mundu yesi yesi tawe.”

¹⁸Nio Abikaili akhola khangu abukula kimikaati chimia chibili mala echusia chioochwa chibili che ndali ne kamakheese ne bikelo biraano bie biakhulia bibiosie bie likesa. Abukula ne bisusuuchu emia ndala ne chinduli chinyomu chimia chibili mala abiboa khu punda.

¹⁹Nio Abikaili aboolela bakholi bewe ali, “Rangira muche ne ese ndamuloondakho.” Ne se aboolelakho omuseecha wewe Nabali tawe.

²⁰Ne nga Abikaili ne aba khu punda yewe ne alikho abotookha lukulu, khangu busa Daudi ne babaandu bewe becha niio aba mala abakaanana.

²¹Nono Daudi aba alomile ali, “Nakhola kia busa naliinda kimiaandu kio omundu oyo mu sichiimi. Nono se silikhoo sisiindu siewe sisiatamba tawe. Ne niye andungire ese bubi khulwe Bulayi nibwo namukholela.

²²Wele akhoya ambelesie ese kumunaanio naaba bali endekhakho omundu wewe owe siseecha yesi yesi khukhwola kumutikhinyi.”

²³Nga Abikaili ne abona Daudi, ekha khangu khukhwama khu punda. Ne akwa ebweeni wa Daudi enama asi.

²⁴Akwa mu bikele biewe ne aloma ali, “Omwami wase, bubi buli khwise seng'ene. Khusaba, lekha omukholi wowo alomalome ne orekereesie mala oulile.

²⁵Omwami wase okhaulilakho ka Nabali omundu owe liiba libi oyo tawe sikila ali busa nga lisina liewe ne liloma. Sifuno sie lisina liewe sili bali Omusilu ne busilu bwamuloondakho. Ne ese omukholi wowo se nabona babaandu bowo nibo waruma tawe mwami wase.

²⁶Nono mwami wase, nga Wele Omunyali Owa Bioosi ne amenyile mindali ne lundi nga wesi ne omenyile; Wele Omunyali Owa Bioosi akhukhiinga ewe khukhwama khu mamayaanu ke sifuki ne lundi akhukhiingilila wamwene khukhwiyacha. Nono lekha basiku bowo ne abo bayiima khukholela omwami wase kamabi babe nga Nabali.

²⁷Nono sino nisio siianwa nisio endereere omwami wase. Lekha sielesibwe khu basoleeli bali baloondi bo mwami wase.

²⁸Ekhusaba umbeele kamakhiikha kase, sikila Wele Omunyali Owa Bioosi alirakikhisia bubwami bwowo bwa mindali na mindali. Ewe olikho upana liie lia Wele Omunyali Owa Bioosi. Ne bubi se bulikhunyoolekhakho mu limenya liowo lioosi tawe.

²⁹Ne babaandu ne bakhutimakho ne bayiima khukhwira, bulamu bwowo bukhabe mu liboo lie balamu bali mu buliindi bwa Wele Omunyali Owa Bioosi, Wele wowo. Ne akhamwaate bulamu bwe basiku bowo oli omwaata khukhwama mu khoroto.

³⁰Wele Omunyali Owa Bioosi akhamale khukhola kamalayi koosi niko akhulaka. Akhakhukhole ewe obe omwimeelesi owa Isiraeli.

³¹Nio se oleendekhelela namwe onaanisibwe khulwe khukhwira babaandu bakhali ne kamabi tawe. Ne Wele Omunyali Owa Bioosi ne akhuelesie bulayi, khebulila omukholi wowo.”

³²Nio Daudi aboolela Abikaili ali, “Wele Omunyali Owa Bioosi afume, Wele owa Isiraeli okhurumire ewe endaalo yino khukhunjakaanana!

³³Kamebaasio kowo kamalayi kabiitwe chikhabi ne wamwene obiitwe chikhabi sikila wakhiingilile ese khukhwira endaalo yino ne khukhwiyacha samwene.

³⁴Nga Wele Omunyali Owa Bioosi, Wele owa Isiraeli ne amenya, akhiingilile ese khukhuumisia ewe. Abanga se okholile khangu khukhwicha khu khunjakaanana tawe, ng'ali khukhwola kumutikhinyi se akhabelekhowo omundu owa Nabali owe siseecha akhaba mulala olekhilwe tawe.”

³⁵Nio Daudi akaanila nisio Abikaili aaba ne amurereere. Ne aboolela Abikaili ali, “Cha engo wowo mu muleembe. Nauliile kamalilo kowo mala ndakhola nga lilienya liowo.”

³⁶Nga Abikaili ne akobola engo khu Nabali, Nabali aba ali ne naikara munju yewe. Yaba oli naikara yo mwami. Ne Nabali aba omusangaafu mu mwoyo sikila aba amelile lukali. Nono Abikaili se aboolelakho Nabali sisiindu siosi siosi tawe khukhwola nga enje ne bwasia.

³⁷Ne kumutikhinyi nga kwola, Nabali aba amelulukhe. Omukhasi wewe amuboolela koosi kakaba ne kekholekha. Nabali afwa kumwoyo mala ekela nga libaale.

³⁸Enyuma we chindaalo ekhumi, Wele Omunyali Owa Bioosi aapa Nabali mala afwa.

³⁹Nga Daudi ne aulila ali Nabali afwiile, aloma ali, “Wele Omunyali Owa Bioosi afume! Niye oweyachile Nabali nga akhomile. Lundi Wele Omunyali Owa Bioosi akhiingilile omukholi wewe khukhola kamamayaanu. Wele Omunyali Owa Bioosi aruungire Nabali kamamayaanu kewe omwene.” Nio Daudi arumania khureeba Abikaili abe omukhasi wewe.

⁴⁰Nga bakholi ba Daudi ne becha khu Abikaili e Karimeli, bamuboolela bali, “Daudi akhurumire efwe khwiwe khukhubukule khukhuyile khu niye obe omukhasi wewe.”

⁴¹Ne Abikaili enyokha mala enama bubweeni bwewe bwetiila asi. Aloma ali, “Lola, omukholi wenywe ali omukholi osiinga bikele bie bakholi bo mwami.”

⁴²Abikaili akhola khangu mala enyokha aniina khu punda. Abikaili abukula bakholi bewe be siikhasi baraano, bamuliinda mala aloonda khu barumwa ba Daudi. Nio Abikaili aba omukhasi owa Daudi.

⁴³Daudi lundi abukula Ahinoamu khukhwama Yesireeli. Nono boombi bekela bakhasi bewe.

⁴⁴ Saulo aba aelesie Mikali omukhaana wewe, owaba mukha Daudi khu Paliti okhwa Laishi. Paliti aba owe lukoba lwa Kalimu.