Read lubukusu 1 Sam. 26 Bible Online

1 Sam. 26 - lubukusu bible

1 Sam. 26

¹ Nio Basifu becha khu Saulo e Kibea ne bamuboolela bali, “Daudi ekisile mu sikulu sia Hakila sisialoleelelana ne Yesimoni.”

²Saulo ekha khangu mu sichiimi sia Sifu, alala ne babaandu ba Isiraeli chielefu chitaru nibo arobora. Bacha khuyima Daudi mu sichiimi sia Sifu.

³Ne Saulo apa ekambi mu sikulu sia Hakila sili siimbi ne kumuyila kuli ebukwe owa Yesimoni. Ne kakhali Daudi arama mu sichiimi. Nga Daudi ne amanya ali Saulo echile mu sichiimi khumuloondakho, Daudi arumania bayooti,

⁴mala anyoola bung'ali ali Saulo echile.

⁵Nio Daudi enyokha acha niio Saulo aba ne apile ekambi. Daudi abona abuundu niio Saulo ne komanda owe kamae wewe, Abuneri okhwa Neri baba ne bakonile. Saulo aba akonile mu kambi mukari ne banamae baba bamusirire.

⁶Nio Daudi areeba Ahimeleki omuhiti ne Abisai okhwa Seruya (Abisai aba wandaaye owa Yoabu) ali, “Naanu olekha ne nase mu kambi niio Saulo ali?” Ne Abisai amukobosia ali, “Ese ndacha ne nawe.”

⁷Nono Daudi ne Abisai bacha niio banamae baba mala banyoola Saulo akonile mu kambi. Lifumo lia Saulo liaba liasimiikhwe amurwe kwewe. Ne Abuneri ne banamae baba bakonile bamubotookhelele.

⁸Nio Abisai aboolela Daudi ali, “Wele areere omusiku wowo mu bunyali bwowo endaalo yino. Nono, lekha ese emuune ne lifumo mu liloba lulala ne se ndamuuna khabili tawe.”

⁹Ne kakhali Daudi aboolela Abisai ali, “Okhamubunia tawe. Mbao onyala ara kumukhono kwewe khu muchukhekho kamafura owa Wele mala alekha khuba ne kamamayaanu tawe.”

¹⁰Ne Daudi achiililila ali, “Nga Wele Omunyali Owa Bioosi ne amenyile mindali, Wele Omunyali Owa Bioosi akhamwire namwe siise siewe siikhoole mala akhafwe namwe akhache mwiie mala abune.

¹¹ Wele Omunyali Owa Bioosi ambeele ekhatilakho khu muchukhekho kamafura owa Wele Omunyali Owa Bioosi tawe. Ne kakhali nono bukula lifumo lili amurwe kwewe ne sibuumba sie kameechi mala khuche.”

¹²Nono Daudi abukula lifumo ne sibuumba sie kameechi khukhwama amurwe owa Saulo mala bacha. Mbao omundu owabona namwe amanya tawe. Mbao omundu owenyokha tawe. Boosi baba bakonile sikila Wele Omunyali Owa Bioosi abaelesia liilo lisiro.

¹³Nio Daudi acha lubeka luluundi aleeyi eema khungaaki khwe sikulu. Sibaanga siabao siboofu akari wabwe.

¹⁴Daudi ayokelela banamae ne Abuneri okhwa Neri ali, “Abuneri, olikho ocha khu ngobosia ku?” Ne Abuneri akobosia ali, “Ewe naanu nio olange omwami?”

¹⁵Ne Daudi areeba Abuneri ali, “Ewe se oli omusaani? Naanu oli nga ewe mu Isiraeli? Siina sikila nono ne okhaliindile omwami wowo tawe? Sikila omundu mulala echile khubunia omwami wowo.

¹⁶Nilio okholile lino se lili lilayi tawe. Nga Wele Omunyali Owa Bioosi ne amenyile mindali, wenyekha khufwa sikila se oliindile omwami wowo tawe, omuchukhekho kamafura owa Wele Omunyali Owa Bioosi. Nono lola niio lifumo lio mwami lili, ne sibuumba sie kameechi sibeele amurwe kwewe.”

¹⁷Saulo amanyilisia kumumilo kwa Daudi mala areeba ali, “Daudi mwana wase, okwo kumumilo kwowo?” Ne Daudi akobosia ali, “Ee, kuli kumumilo kwase mwami wase.”

¹⁸Mala amureeba ali, “Siina sikila omwami wase ne atima khu mukholi wewe? Nakholile siina? Mamayaanu siina niko nakholile?

¹⁹Nono, lekha omwami wase arekeeresie kamakhuwa ko mukholi wewe. Kaaba bali Wele Omunyali Owa Bioosi niye owakhukholile ewe wambiile ese, akhoya afukiilile siianwa. Ne baba ne bali babaandu, bakhoya balaamwe ebweeni wa Wele Omunyali Owa Bioosi. Sikila bamboonile ese endaalo yino nio khanyoolakho kumukabwa kwa Wele Omunyali Owa Bioosi tawe. Balomile bali, ‘Cha, kholela bawele babaandi.’

²⁰Nono, okhandekha ese nafwila aleeyi khukhwama khu Wele Omunyali Owa Bioosi tawe. Sikila omwami owa Isiraeli echile khu khumbenja busa oli oaaya enyuni esiindu mu chingulu.”

²¹Saulo aloma ali, “Nakholile bubi. Daudi mwana wase, kobola. Se ndikhuumisia lundi tawe sikila luno ewe oriire bulamu bwase. Nabele omusilu lundi nekhiikhile lukali.”

²²Ne Daudi amukobosia ali, “Omwami wase, lifumo liowo nilio eli. Lekha mulala khu baandu bowo baele eche alibukule.

²³Wele Omunyali Owa Bioosi aananga kumuruuru khu buli mundu khulwe bung'ali bwo mundu oyo ne bubweyikinwa bwewe. Endaalo yino Wele Omunyali Owa Bioosi akhurere ewe mu bunyali bwase. Ne kakhali se ndililekho kumukhono kwase khu muchukhekho kamafura owa Wele Omunyali Owa Bioosi tawe.

²⁴Nga bulamu bwowo ne bubeele bwe bukhala khwise, Wele Omunyali Owa Bioosi yesi akhoya akhola bulamu bwase bwaba bwe bukhala mala ambonia khukhwama mu butinyu bwoosi!”

²⁵Nio Saulo alomalomela Daudi ali, “Ewe oli omubiite chikhabi, mwana wase Daudi. Okhakhole bibiindu bikali mala okhakhile.” Nio Daudi acha khu bwewe, ne Saulo akobola engo.