Read lubukusu 1 Sam. 27 Bible Online

1 Sam. 27 - lubukusu bible

1 Sam. 27

¹Daudi ebaasia ali, “Endaalo ndala endibunisibwa ne Saulo. Sisiindu siili silayi khwise khukhola sili khukhwilukhila mu maloba ke Bafilisiti. Nio Saulo akhandusiekho kumwoyo kwewe khukhumbenja mu Isiraeli, ne ekhabe aleeyi khukhwama khu niye.”

²Nio Daudi ne babaandu bewe chimia sita ba baaba ne naye barura mu Isiraeli bacha khu Akishi okhwa Moaki, omwami owa Katihi. Daudi ne babaandu bewe nende be mu chinju chabwe bamenya ne Akishi e Katihi.

³Daudi aba ne bakhasi bewe babili: Ahinoamu owama Yesireeli ne Abikaili owama Karimeli, namulekhwa owa Nabali.

⁴Nga Saulo ne aulila ali Daudi elukhile e Katihi, arusiakho kumwoyo khuenja Daudi.

⁵Nio Daudi aboolela Akishi ali, “Waaba ne osiimisiibwe ne nase, mbelesie abuundu mu ngoba chowo lukoba lulalakho lwe khu lukoongo niio enyala namenya. Siina sikila omukholi wowo amenye mu lukoba luboofu ne nawe?”

⁶Nio endaalo eyo Akishi aelesia Daudi lukoba lutiiti lwa Sikilaki. Khwako lukoba lwa Sikilaki luli lwe babaami ba Yuda khukhwama ao khukhwola luno.

⁷Daudi amenya mu sibala sie Bafilisiti kumwiiko mulala ne kimieesi kine.

⁸Nono Daudi ne babaandu bewe baniina bebwaakala babaandu ba Keshuri, Bakirisi ne Baamaleki. Babaandu bano baba bamenya mu sibala sisiama Shuri khukhwola Misiri khukhwama khale.

⁹Daudi apana ne nabo, eera babaandu be siseecha nende be siikhasi mala abukula kamakheese kabwe ne chieeyi, ne chipunda ne chingamia ne chingubo. Nio akobola khu Akishi.

¹⁰Yaba Akishi ne areeba ali, “Onuulile waena luno?” Daudi abeele anyala akobosia ali achile ebunafubo owa Yuda namwe ebunafubo owa Yeraimeeli namwe mu maloba ke Bakenayi.

¹¹Daudi se areerakho omundu yesi yesi omulamu mu Katihi tawe. Ebaasia ali ne areera babaandu ne bali balamu e Katihi, babaandu abo banyala baboolela Akishi bali, “Kano niko Daudi akholile.” Kuno nikwo kukwaba kumwiima kwa Daudi siise sioosi nisio amenya mu maloba ke Bafilisiti.

¹²Nio Akishi eyikina Daudi ne aloma ali, “Daudi omwene akilile babaandu bewe babene Baisiraeli bamubiile lukali. Nono alikholela ese mindali na mindali.”