Read lubukusu 1 Sam. 28 Bible Online

1 Sam. 28 - lubukusu bible

1 Sam. 28

¹Biise ebio, Bafilisiti babuusia alala banamae babwe khu khuupana liie ne Isiraeli. Ne Akishi aboolela Daudi ali, “Ewe manya oli ewe ne babaandu bowo mulacha ne banamae base mwiie.”

²Ne Daudi akobosia Akishi ali, “Bulayi! Ewe okhamanye niko ese omukholi wowo ndinyala khukhola.” Akishi aboolela Daudi ali, “Bulayi! Ese ndakhukhola ewe obe omunamae wase ouniinda mu limenya liase lioosi.”

³ Nono Samweli aba afwa ne Baisiraeli boosi baba bamulilile mala bamusiikhile mu lukoba lwewe e Rama. Ne Saulo aba aoonile bafumu ne balakusi khukhwama mu sibala sia Isiraeli.

⁴Bafilisiti babuusiana alala mala baapa ekambi mu lukoba lwa Siunemu. Ne Saulo abuusia Baisiraeli baapa ekambi e Kiliboa.

⁵Nga Saulo ne abona banamae be Bafilisiti, aria mala kumwoyo kwewe kwesiindukha.

⁶ Ne nga Saulo ne areeba Wele Omunyali Owa Bioosi, Wele Omunyali Owa Bioosi se amukobosiakho akhaba mu marooro namwe khulwe khurumikhira Urimu namwe bang'oosi tawe.

⁷Nio Saulo aboolela bakholi bewe ali, “Mbenjele omukhasi omufumu mala ndacha mala mureebe.” Ne bakholi bewe bamukobosia bali, “Mulala ali mu Endori.”

⁸Nio Saulo ekaluukhasia, afwara chingubo chichiindi, mala oli musilo niye ne babaandu bewe babili bacha khubona omukhasi oyo. Saulo aboolela omukhasi oyo ali, “Ndakulile khulwe khurumikhira e roho. Ndereere ano omundu niye ndaloma lisina liewe.”

⁹Ne kakhali omukhasi oyo amukobosia ali, “Ng'ali ewe omanyile niko Saulo akhola. Aona bafumu ne balakusi khukhwama mu sibala sia Isiraeli. Siina sikila nono ewe ne olikho okhaka khu khundeka mala okile niirwe?”

¹⁰Ne kakhali Saulo echubila omukhasi oyo mu Wele Omunyali Owa Bioosi ne aloma ali, “Nga Wele Omunyali Owa Bioosi ne amenyile mindali, kumunaanio kwosi kwosi se kulikhwichakho khulwe khukhola kano tawe.”

¹¹Nio omukhasi oyo amureeba ali, “Khwinyoselie naanu?” Ne Saulo amukobosia ali, “Njinyoselie Samweli.”

¹²Nga omukhasi oyo ne abona Samweli, akukuula mala areeba Saulo ali, “Siina sikila ne umbea ese? Ewe Saulo!”

¹³Omwami aboolela omukhasi oyo ali, “Siina nisio oboone?” Omukhasi oyo amukobosia ali, “Naboone khawele khalikho kharura mu liloba.”

¹⁴Aamureeba ali, “Khafwaana khariena?” Omukhasi oyo amukobosia ali, “Omusaakhulu alikho arura, Eboyile engubo.” Ne, Saulo amanya ali aba Samweli, mala enama asi asikama.

¹⁵Nio Samweli areeba Saulo ali, “Siina sikila ewe ne unaania, ne unjinyosia?” Saulo amukobosia ali, “Ese ndi mu butinyu bukali. Bafilisiti balikho berekekha khu khuupana ne nase mala Wele andekhile ne se alikho angobosiakho lundi tawe. Se alikho angobosia khubirira mu bang'oosi namwe mu marooro tawe. Nono nakhulangile ewe umboolele nisio enyala nakhola.”

¹⁶Ne Samweli amureeba ali, “Siina sikila nono ewe ne undeeba ese, mala Wele Omunyali Owa Bioosi akhulekhile, mala ekeele omusiku wowo?

¹⁷ Wele Omunyali Owa Bioosi akhukholele niko aloma khubirira khwise. Wele Omunyali Owa Bioosi atabuule bubwami khukhwama khwiwe mala aelesie chirani wowo Daudi.

¹⁸ Wele Omunyali Owa Bioosi akhukholeele ewe lino endaalo yino sikila se wamuria mala wakhola nga lilaka liewe ne liaba, wabunisia Amaleki tawe.

¹⁹Khutasa khwako Wele Omunyali Owa Bioosi alira Isiraeli yosi ne nawe mu bunyali bwe Bafilisiti. Ne muchuli, ewe ne basoleeli bowo mukhabe alala ne nase. Wele Omunyali Owa Bioosi akhare akhaba banamae ba Isiraeli mu bunyali bwe Bafilisiti.”

²⁰Abwene ne abwene Saulo akwa asi, alambaala. Aaba ne buuri bukali khubeela kamakhuwa ka Samweli. Ne se aba ne kamaani tawe sikila aba se aliilekho sisiindu endaalo yoosi ne siilo sioosi tawe.

²¹Nio omukhasi oyo acha niio Saulo aba. Ne nga ne abona ali Saulo aba ariire lukali, amuboolela ali, “Lola omukholi wowo akhuriire. Neanile bulamu bwase mala nakhola niko waloma.

²²Nono, wesi rekeeresia ko omukholi wowo. Lekha ekhuelesie kumukaati olie nio obe ne kamaani khu lukeendo lwowo.”

²³Saulo aloba mala aloma ali, “Se endalia tawe.” Ne kakhali bakholi bewe ne omukhasi oyo bamwekoonjelela. Aulila kamakhuwa kabwe enyokha asi, mala ekhala khu sitaanda.

²⁴Nono omukhasi oyo aba ne emoosi munju. Ne akikhonya khangu, abukula bufu abukaanda mala apa kimikaati kikhalimo kamamela tawe.

²⁵Arekekha sisialwa ebweeni wa Saulo ne bakholi bewe mala balia. Nio benyokha bacha siilo esio.