Read lubukusu 1 Sam. 29 Bible Online

1 Sam. 29 - lubukusu bible

1 Sam. 29

¹Nono Bafilisiti babuusia banamae babwe boosi e Afeki. Ne Baisiraeli baapa ekambi a sebele eli e Yesireeli.

²Babaami be Bafilisiti babira ne banamae babwe mu bipupu bie chimia ne chielefu. Ne Daudi ne babaandu bewe babiranga enyuma ne Akishi.

³Banamae babemeelesi be Bafilisiti bareeba bali, “Siina nisio Baeburania bano balikho bakhola ano?” Nio Akishi areeba babemeelesi be kamae ke Bafilisiti ali, “Oyuno se ali Daudi, omukholi owa Saulo omwami owa Isiraeli? Abeele ne nase siise sileeyi ne khukhwama nga elukhila ewase, ekhamunyoolakho ne libi tawe khukhwola luno.”

⁴Ne kakhali babemeelesi be kamae ke Bafilisiti bamuambila lirima. Ne bamuboolela bali, “Kobosiayo omundu oyo akobole khu milimo nikio wamuelesia. Se alacha ne nafwe mwiie tawe busa anyala ekela omusiku wefwe. Anyala akhola kumuleembe akari wewe ne omwami wewe khulwe khukhwira efwe.

⁵ Se ali Daudi niye bembelanga bali, ‘Saulo erire chielefu chewe, ne Daudi chielefu kamakhumi ne kamakhumi?’ ”

⁶Nio Akishi alaanga Daudi mala amuboolela ali, “Nga Wele Omunyali Owa Bioosi ne amenyile mindali, ewe wabeele omundu owa Ng'ali. Ne khwise liekesia lili okhoya oche ne nase buli abuundu e liie. Sikila se nanyoolakho libi liosi liosi khwiwe tawe khukhwama endaalo niyo wechela khukhwola luno. Ne kakhali babemeelesi be kamae se bakhufukiilile ewe tawe.

⁷Nono khe okoboleyo siise sino mala cha mu muleembe nio okhakhola sisiindu siosi siosi siikhasiimisia babemeelesi be kamae ke Bafilisiti tawe.”

⁸Ne Daudi areeba Akishi ali, “Ne ese nakholile siina? Siina nisio onyoolile khu mukholi wowo khukhwama endaalo niyo narakikha khukhukholela khukhwola siise sino? Siina sikila ne ekhacha mala ekhupane ne basiku bo mwami wase tawe?”

⁹Ne Akishi akobosia Daudi ali, “Ese manyile ndi ewe se oli nende liosi liosi nilio wikiichibwakho mumoni mwase tawe, oli nga malaika owa Wele. Ne kakhali babemeelesi be kamae balomile bali, ‘Se alacha ne nafwe mwiie tawe.’

¹⁰Nono, yinyokha kumutikhinyi makhelebeende ne bakholi bo mwami wowo niye mwecha ne nabo enje ne bulikho busia.”

¹¹Nio Daudi ne babaandu bewe barekukha makhelebeende khu kobola mu maloba ke Bafilisiti. Ne kakhali Bafilisiti bacha e Yesireeli.