Read lubukusu 1 Sam. 3 Bible Online

1 Sam. 3 - lubukusu bible

1 Sam. 3

¹Nono omusoleeli Samweli akholelanga Wele Omunyali Owa Bioosi asi owa Eli. Ne likhuwa khukhwama khu Wele Omunyali Owa Bioosi se liasalanga tawe, ne buloli bwosi se bwabechangao lukali tawe.

²Siise esio chimoni cha Eli chaba charakiikhe khubofula, abeele se abona tawe. Aaba alikho akona abuundu wewe.

³Etaa eya Wele Omunyali Owa Bioosi yaba ekhasima tawe. Ne Samweli aba akonile munju eya Wele Omunyali Owa Bioosi niio Lisanduku lie ndakaano eya Wele liaba.

⁴Nio Wele Omunyali Owa Bioosi alaanga ali, “Samweli! Samweli!” Samweli aakobosia ali, “Ee omwami!”

⁵Mala aatima acha khu Eli aaloma ali, “Ese niye oyu. Unaangile!” Ne Eli amukobosia ali, “Se ekhulangile tawe, kobolayo okone.” Nio Samweli akobolayo akona.

⁶Ne Wele Omunyali Owa Bioosi alaanga lundi ali, “Samweli!” Mala Samweli enyokha aacha khu Eli mala aaloma ali, “Ese niye oyu. Unaangile?” Ne kakhali Eli aamukobosia ali, “Mwana wase ese se nakhulangilekho tawe. Khe okone lundi.”

⁷Nono Samweli abeele akhamanya Wele Omunyali Owa Bioosi tawe; ne likhuwa lia Wele Omunyali Owa Bioosi abeele likhafunulibwakho khu niye tawe.

⁸Wele Omunyali Owa Bioosi alaanga Samweli lundi lukhola khataru. Nio enyokha acha khu Eli mala aloma ali, “Ese niye oyu. Unaangile?” Nio Eli amanya ali Wele Omunyali Owa Bioosi niye owaba ne alikho alanga omusoleeli.

⁹Nono Eli amuboolela ali, “Khe oche okone, ne akhulaanga lundi loma oli, ‘Wele Omunyali Owa Bioosi lomaloma omukholi wowo arekereesie.’ ” Nio Samweli akobola akona abuundu wewe.

¹⁰Ne Wele Omunyali Owa Bioosi echa eema, alaanga bulayi bwene nga ne alaanga lutaayi ali, “Samweli! Samweli!” Ne Samweli akobosia ali, “Lomaloma. Sikila omukholi wowo aarekeereesie.”

¹¹Nio Wele Omunyali Owa Bioosi aaboolela Samweli ali, “Ndikho nja khukhola sisiindu khu baandu ba Isiraeli sie khuukia. Buli mundu oulilakho akhauke lukali.

¹²Khu ndaalo eyo khakhole niko naloma khunju eya Eli, khukhwama mu khurakikha khukhwola esiakamo.

¹³Namuboolela[9] ndi endi siimbi khuelesia enju yewe kumunaanio kwa mindali na mindali. Kakhabe kario sikila kamakhiikha niko basoleeli bewe bakholelanga Wele Omunyali Owa Bioosi. Babaana ba Eli bakholela Wele Omunyali Owa Bioosi embelekeu, ne se aabakaania tawe.

¹⁴Nono nechubila enju eya Eli ndi se elio embosio namwe siianwa silinyala khurusiao kamakhiikha kabwe mindali na mindali tawe.”

¹⁵Samweli aakona khukhwola nga ne bwasia nio ekula kimiliango kie nju eya Wele Omunyali Owa Bioosi. Samweli aba ne buuri khuboolela Eli ke buloli.

¹⁶Ne kakhali Eli alaanga Samweli ne aloma ali, “Samweli, mwana wase.” Samweli aakobosia ali, “Ese niye oyu.”

¹⁷Ne Eli amureeba ali, “Siina nisio Wele Omunyali Owa Bioosi akhuboolele? Okhangisa tawe. Wele akhoya aakhuwa ewe kumunaanio kumukali kaaba bali ungisa ese sisiindu siosi siosi nisio niye akhubooleele ewe.”

¹⁸Nio Samweli amuboolela buli siindu, ne se amukisa sisiindu siosi siosi tawe. Eli aaloma ali, “Ali Wele Omunyali Owa Bioosi. Lekha akhole lili lilayi khu niye.”

¹⁹Nio Samweli achoa mala Wele Omunyali Owa Bioosi aba ne naye. Wele Omunyali Owa Bioosi se aalekhakho buli siindu nisio Samweli aloma sialekha khwikholekha tawe.

²⁰Nio Isiraeli yoosi khukhwama Dani khukhwola Beerisheba bamanya bali ng'ali Samweli ali omung'oosi owa Wele Omunyali Owa Bioosi.

²¹Ne Wele Omunyali Owa Bioosi achiililila khubonekhana e Shilo. Wele Omunyali Owa Bioosi emanyisia omwene khu Samweli e Shilo khubirira khu likhuwa lia Wele Omunyali Owa Bioosi.