Read lubukusu 1 Sam. 30 Bible Online

1 Sam. 30 - lubukusu bible

1 Sam. 30

¹Nono Daudi ne babaandu bewe bacha Sikilaki endaalo eye khataru. Baamaleki baba bebwakaale ebunafubo owa Yuda ne Sikilaki. Baba baulile lukoba lwa Sikilaki mala balwosiisie.

²Lundi baba babukule embaambe bakhasi ne abo boosi ba babamo batiiti ne baboofu. Se beerakho omundu tawe ne kakhali bababukula busa bacha ne nabo.

³Ne nga Daudi ne babaandu bewe becha mu lukoba, balunyoola lwayiile mala bakhasi babwe ne babaana babwe be sisoleeli nende be siikhaana babukulibwe mu mbaambe.

⁴Nio Daudi ne babaandu bewe balila khukhwola nga bawamo kamaani ke khulila.

⁵ Ba mukha Daudi babili, bosi baba babukulibwe embaambe. Bakhasi abo baba Ahinoamu owa Yesireeli ne Abikaili owaba namulekhwa owa Nabali, khukhwama Karimeli.

⁶Nio Daudi aba ne butinyu bukali sikila babaandu baloma bali bamupe kamabaale. Babaandu boosi babeelela mu miooyo buli mundu sikila babaana bewe be sisoleeli nende be siikhaana. Ne kakhali Daudi anyoola mu kamaani Wele Omunyali Owa Bioosi, Wele wewe.

⁷ Ne Daudi aboolela Abiatari omusaayi okhwa Ahimeleki ali, “Ndereere efodi.” Nio Abiatari arerera Daudi efodi.

⁸Ne Daudi areeba Wele Omunyali Owa Bioosi ali, “Ndime khu banuuli bano? Ndabatiila ku?” Wele Omunyali Owa Bioosi akobosia ali, “Batimekho sikila ng'ali olabatiila mala olasikula.”

⁹Nio Daudi arekukha ne babaandu chimia sita ba baaba ne naye. Bacha bola khu kheechi kha Besori mala babaandu chimia chibili basikala ebweeneyo.

¹⁰Sikila baba baluile lukali khwambukha tawe. Ne Daudi ne babaandu chimia chine bachiililila ne lukeendo.

¹¹Nga boola khu lukoongo, banyoola Omumisiri mala bamuyila khu Daudi. Bamuelesia kumukaati alia, bamua kameechi anywa. Ne bamua e keeki eye chinduli ne bisusuuchu bibili.

¹²Ne nga Omumisiri oyo amala khulia, anyoola kamaani sikila aba se alilekho kumukaati namwe kameechi khulwe chindaalo chitaru siilo ne kumuusi tawe.

¹³Ne Daudi amureeba ali, “Ewe oli omukholi owa naanu ne wama waena?” Omumisiri oyo amukobosia ali, “Ese ndi omusoleeli khukhwama Misiri. Endi omukholi owo omuamaleki. Ne omwami wase andekhile enyuma sikila naba omulwale khulwe chindaalo chitaru.

¹⁴Khwaba khwebwakaale ebunafubo owa Cheriti ne ebunafubo owa Yuda ne Kalebu. Ne khwosia lukoba lwa Sikilaki.”

¹⁵Ne Daudi amureeba ali, “Onyala wambila niio banuuli abo bali?” Ne omumisiri oyo amukobosia ali, “Njechubile mu lisina lia Wele oli se olanjira namwe unjakanisie khu mwami wase tawe ne ese endakhuyila niio bali.”

¹⁶Nio ayila Daudi. Nga ne bolayo, banyoola banuuli abo basalanile buli abuundu balikho balia ne banywa ne bakhina sikila bibiindu nibio banuula khukhwama khu Bafilisiti ne mu maloba ka Yuda.

¹⁷Nio Daudi abebwaakala khukhwama enje ne bukhasia tawe khukhwola ekolooba eye endaalo eyaloondakho. Omundu se aonakho tawe ne bakhali basoleeli chimia chine ba baniina khu ngamia mala belukha.

¹⁸Daudi akobosia bioosi nibio Baamaleki baba ne babukula mala asikula ne bakhasi bewe babili.

¹⁹Se siliio siikhanyoolekha tawe, sikeekhe namwe siboofu, babaana be sisoleeli nende be siikhaana ne buli sisiindu nisio baba ne banuula biakobola.

²⁰Daudi akobosia bioosi. Daudi lundi abukula kiminyele ne kamatuuli ke bibiaayo mala babaandu baloonda chikhaafu echo ebweeni wa Daudi ne baloma bali, “Bino nibio Daudi anuulile.”

²¹Nio Daudi acha niio babaandu chimia chibili abo baba. Babaandu abo baba baluwa ne se baloonda khu Daudi tawe nono baba balekhwa a sebele eya Besori. Ne bacha bakaanana Daudi ne babaandu nibo aba nabo. Ne Daudi abembiia, abakheesia.

²²Ne kakhali babaandu balala ba baaba ne bacha ne Daudi baba bamayaanu ne chinge. Nono baloma bali, “Sikila se bachile ne nafwe tawe, se khulabawakho bibiindu bioosi bioosi khu nibio khukobosie tawe. Ne kakhali buli mundu alabukula omukhasi wewe ne babaana bewe mala ache.”

²³Ne kakhali Daudi ababoolela ali, “Bawandaayase, se mulakhola murio khu nibio Wele Omunyali Owa Bioosi akhuelesie efwe tawe. Akhuliindile efwe mala ara banuuli babechile khukhwibwaakala mu bunyali bwefwe.

²⁴Naanu okana aulile kamalilo kenywe? Ba bachile mwiie ne abo ba basikale baliinda kimifuko boosi balanyoola bilekhaane.”

²⁵Daudi akhola lino liaba lilaka mu Isiraeli khukhwama endaalo eyo khukhwola luno.

²⁶Nga Daudi acha Sikilaki, aaruma bibiindu bilala khu bie liie khu basaale bewe basaakhulu ba Yuda ne aloma ali, “siianwa siowo nisio sino khukhwama khu biindu bie liie bie basiku ba Wele Omunyali Owa Bioosi.”

²⁷Aarumania bibiindu ebio khu baandu ba Beteli, Ramoti ne ebunafubo owa Yuda. Aarumanisilia akhaba Yatiri,

²⁸Aroeri, Sifimoti, Esitemoa,

²⁹ne Rakali. Arumanisilia ne chingoba cha Yeraimeeli, ne Bakenayi,

³⁰Horima, Borashani, Atachi ne

³¹Heburoni. Aarumanisilia akhaba babaandu abuundu oosi niio niye ne babaandu bewe bakeenda.