Read lubukusu 1 Sam. 31 Bible Online

1 Sam. 31 - lubukusu bible

1 Sam. 31

¹Nono Bafilisiti bapana liie ne Baisiraeli. Ne babaandu ba Isiraeli belukha Bafilisiti mala beererwa khu sikulu sia Kiliboa.

²Bafilisiti lundi bapana lukali ne Saulo mala bera Yonasani ne Abinatabu ne Malikishua ba okhwa Saulo.

³Bukhupani bwaba burafu, khu Saulo alaswa buyiingo mala achunisibwa lukali.

⁴Nio Saulo aboolela omusuti owe bulwaani wewe ali, “Choola embalu yowo mala unjire, nio Bafilisiti basiinde bano bakhanjira mala banjinyailakho tawe.” Ne omusuti owe bulwaani bwewe se amwiira tawe sikila aria lukali. Nono Saulo abukula embalu yewe eng'ene mala akikwakho.

⁵Ne omusuti owe bulwaani bwewe nga ne abona ali Saulo afwiile, yesi abukula embalu yewe mala akikwakho mala afwa ne Saulo.

⁶Khwako, Saulo ne basoleeli bewe bataru ne omusuti owe bulwaani bwewe bafwiila khulala endaalo eyo.

⁷Babaandu ba Isiraeli ba baaba engelekha we Litooma lia Yesireeli nende be ebukwe we luluuchi lwa Yoritani babona bali babaandu ba Isiraeli baba belukhe. Lundi baulila bali Saulo ne basoleeli bewe baba bafwiile. Boosi balekha chingoba chabwe mala belukha. Ne Bafilisiti becha mala bamenya mu chingoba echo.

⁸Endaalo eyaloondakho, nga Bafilisiti ne bacha khuyaaya bie bafu, banyoola kimibili kia Saulo ne babaandu bewe bataru kialambaalile khu sikulu sia Kiliboa.

⁹Nio bakhala kumurwe kwa Saulo, bamufwarura bulwaani bwewe. Nio baruma barumwa mu sibala sie Bafilisiti sioosi khuboolela bifwaani biabwe ne babaandu babwe kamakhuwa kamalayi ako.

¹⁰Bara bulwaani bwa Saulo mu Lukaangu lwa wele bali Asitaroti mala babambila kumubili kwewe khwisiisi lia Betisiani bakukhomelakho.

¹¹Babaandu ba Yabesi-Kileati, baulila niko Bafilisiti bakhola khu Saulo.

¹²Ne babaandu banyindaafu boosi barura bakeenda siilo sioosi bola Betishani bekhisia kimibili kia Saulo ne babaandu khukhwama khwisiisi. Bakobola nakio e Yabesi, mala bakioselia ebweeneyo.

¹³Mala, babukula bikuumba mala babisiikha asi we kumurongooro mu lukoba lwa Yabesi mala balekha khulia khulwe chindaalo saba.