Read lubukusu 1 Sam. 4 Bible Online

1 Sam. 4 - lubukusu bible

1 Sam. 4

¹Likhuwa lia Samweli liecha khu Isiraeli yoosi. Nio[10] Isiraeli yacha mwiie ne Bafilisiti mala baapa ekambi e Beneseri. Ne Bafilisiti nabo baapa ekambi e Afeki.

²Bafilisiti bebwaakala Isiraeli ne nga liie liachiililila, baula Isiraeli. Bafilisiti beera embi babaandu chielefu chine mwiie.

³Ne nga banamae ba Isiraeli bakobola mu kambi basaakhulu ba Isiraeli bareeba bali, “Siina sikila Wele Omunyali Owa Bioosi ne alekhile efwe khwabunisibwa ne Bafilisiti endaalo yino? Lekha khuche khureere eno Lisanduku lie Ndakaano eya Wele Omunyali Owa Bioosi khukhwama Shilo. Nio Wele Omunyali Owa Bioosi eche abe alala ne nafwe mala akhuonie efwe khukhwama khu maani ke basiku befwe.”

⁴ Nio Babaandu barumania e Shilo mala bareera Lisanduku lie ndakaano eyo Omwami Wele Omunyali Owa Bioosi Wele owe Banamae ooli mu ndebe eye chikerubi. Ba okhwa Eli babili, Hofini ne Fineasi babaayo ne Lisanduku lie Ndakaano.

⁵Nga Lisanduku lie Ndakaano ne liola mu kambi, Baisiraeli boosi bekhoya lukali sibala siareenga.

⁶Bafilisiti baulila luyoka mala baloma bali, “Luyoka luno lwoosi mu kambi eye Baeburania lwekesia siina?” Nga ne bamanya bali Lisanduku lie Ndakaano eya Wele Omunyali Owa Bioosi liaba liechile mu kambi,

⁷Bafilisiti baria sikila baloma bali, “Bawele bechile mu kambi.” Lundi baloma bali, “Efwe khwabuna! Sisiindu siri abeele siikhakhwekholekhakho tawe.

⁸Efwe khwabuna! Naanu onyala akhuonia efwe khukhwama khu maani ke bawele be kamaani abo? Nibo bawele babarerera Bamisiri buli butinyu mu sichiimi.

⁹Bafilisiti mube banyindaafu mala mwirekekhe nga baseecha. Mwalekha khukhola murio tawe aba khulekela ba nasioobi be Baeburania nga nibo ne babeelenge banasioobi khwinywe. Nono yirekekha nga baseecha mala mupane.”

¹⁰Nono Bafilisiti bapana mala baula Baisiraeli. Baisiraeli bacha buli mundu mungo mwewe. Ne bwabao bubwiri bukali. Sikila banamae ba Isiraeli chielefu kamakhumi kataru ba bakeendelanga khu bikele beerwa.

¹¹Lisanduku lie Ndakaano eya Wele liabukulwa mala ba okhwa Eli Hofini ne Fineasi boombi beerwa.

¹²Omundu khukhwama mu kholo eya Benjamini aatima chimbilo khukhwama abuundu niio liie liaba oola Shilo endaalo eyo ne eng'ene, chingubo chewe chaba chatabukhaake ne lipukhuulu liaba khumurwe kwewe.

¹³Nga ne oola, Eli aba ekhaale khu ndebe yewe a muyila. Eli aba aunguusile busa sikila aba ne buuri khulwe Lisanduku lie Ndakaano eya Wele. Nga omundu oyo ne eecha mu lukoba aboola kakekholekha, lukoba lwoosi lwalila.

¹⁴Nga Eli ne aulila bililo, areeba ali, “Luyoka luno lwoosi lwa siina?” Omundu oyo acha khangu niio Eli aaba amuboolela kamakhuwa kakekholekha.

¹⁵Nono Eli aba ali ne bukhulu bwe kimiiko kamakhumi tisa ne kimiiko munaane. Ne aba abofuliile elala.

¹⁶Omundu oyo aboolela Eli ali, “Ese niye owamile mwiie. Ese nilukhe khukhwama mwiie luno.” Eli aamureeba ali, “Mwana wase liie libeele liriena?”

¹⁷Omurumwa oyo aamukobosia ali, “Isiraeli yilukhe Bafilisiti. Ne lundi babaandu bafwiile bakali. Ne basoleeli bowo Hofini ne Fineasi bafwiile. Ne Lisanduku lie Ndakaano eya Wele liabukuliibwe!”

¹⁸Nga omundu oyo ne aloma ke Lisanduku lie Ndakaano, Eli akwila kumukoongo khukhwama khu ndebe yewe a silibwa. Aba asaakhuluwe lukali, mala omusiro nono aafunikha likosi mala aafwa. Aaba emeelele Isiraeli khulwe kimiiko kamakhumi kane.

¹⁹Nono omukhaana owa Eli, mukho musaani wewe Fineasi aba ne enda mala siise sie khusaala omwana siaba siimbi. Mukha Fineasi aulila bali Lisanduku lie Ndakaano eya Wele liaba liabukuliibwe. Lundi aaulila bali masalaawe ne omuseecha wewe bafwiile. Enama mala asaala, sikila arakikha khulumwa.

²⁰Siise siewe sie khufwa ne sili siimbi, omukhasi owamusaasia amuboolela ali, “Okharia tawe, sikila wasaalile omwana omusoleeli.” Ne kakhali niye se amukobosia namwe aulila tawe.

²¹Atiuukha omwana ali Ikabodi[11] ne aloma ali, “Luyali lwarurire khu Isiraeli!” Aloma ario sikila Lisanduku lie Ndakaano eya Wele liaba liabukuliibwe ne lundi sikila lifwa lia masalaawe nende lio museecha wewe.

²²Mala aaloma ali, “Luyali lwarurire khu Isiraeli, sikila Lisanduku lie Ndakaano eya Wele liabukuliibwe.”