Read lubukusu 1 Sam. 6 Bible Online

1 Sam. 6 - lubukusu bible

1 Sam. 6

¹Lisanduku lie Ndakaano eya Wele Omunyali Owa Bioosi liaba mu sibala sie Bafilisiti khu miesi saba.

²Ne Bafilisiti balaanga basaayi ne bafumu mala babareeba bali, “Khukhola khuriena ne Lisanduku lie Ndakaano eya Wele Omunyali Owa Bioosi? Khuboolele khukhalikobosieyo nende siina?”

³Bakobosia bali, “Ne mukobosiayo Lisanduku lie Ndakaano eya Wele owa Isiraeli, mukhaliyila busa tawe. Mukhoya mulikobosieyo ne siianwa sirusiao bubi. Ne muona bulwaale aba mu limanya muli mwanyoola butinyu sikila Lisanduku lie Ndakaano eya Wele Omunyali Owa Bioosi.”

⁴Nio bareeba bali, “siianwa siina sirusiao bubi nisio khukhoyeele khumukoboselia?” Basaayi ne bafumu bakobosia bali, “Bifwaani bie kamabiimba ke esahabu biraano ne bifwaani bie chimbeba bie esahabu biraano, khuloondekhana ne Babaami be Bafilisiti. Sikila butinyu nga obwo bwaba khwinywe ne Babaami benywe.

⁵Nono mukhoya mung'oone bifwaani bie kamabiimba ne bifwaani bie chimbeba bibionakanga liloba lundi mukhoya muelesie Wele owa Isiraeli luyali. Nio wakana Wele owa Isiraeli alirusia khwinywe kumunaanio ne khu bawele benywe ne khu maloba kenywe.

⁶Siina sikila mulumie kimiooyo kienywe nga Bamisiri ne Farao bakhola? Enyuma wa Wele khubaelesia kumunaanio, se balekhuula Baisiraeli bacha?

⁷Nono bukula mala murekekhe likaari liiya ne bisonga bibili bie chikhaafu nicho bakhaboakho khwichooki tawe. Chire khwichooki mala muchiboe khwikaari. Ne kakhali mukobosie chimoosi chacho engo, aleeyi ne chikhaafu.

⁸Bukula Lisanduku lie Ndakaano eya Wele Omunyali Owa Bioosi, mulire khwikaari. Mala mure mu Lisanduku liili siimbi ne nalio bifwaani bie sahabu nibio mulikho mu mukoboselia niye nga siianwa sirusiao bubi. Mala mulirume mulekhe liche.

⁹Nio muloleleele, ne liniina mu sibala sialio e Beti-shemesi, aba Wele owe Baisiraeli niye owakhureerere efwe butinyu bukali buno. Ne liaba ne likhacha lirio tawe, aba khulamanya khuli se ali niye owakhurereere efwe butinyu tawe, ne kakhali liakholekha matundubiikha.”

¹⁰Bakhola niko baboolelwa, mala babukula chikhaafu bisonga bibili mala bachiboa khwikaari, mala baboa chimoosi engo.

¹¹Baara Lisanduku lie Ndakaano mwikaari alala ne lisanduku liliabaamo bifwaani bie chimbeba ne bifwaani bie kamabiimba kabio.

¹²Chikhaafu chacha chaluungika busa khu kumuyila kwe e Beti-shemesi. Chaluungikha kumuyila mulala, kumuniina ne kumwiikha. Se chaukhakho kumukhono kumuseecha namwe kumukhasi tawe. Ne Babaami be Bafilisiti bachiloondakho khukhwola khu lwakha lwa Beti-shemesi.

¹³Nono babaandu ba Beti-shemesi baba balikho bakesa engaanu mwitooma. Nga basuta chimoni, babona Lisanduku lie Ndakaano, bekhoya khulibona.

¹⁴Likaari liecha mu mukuunda kwa Yoshua owamenyanga mu Beti-shemesi mala liema ebweeneyo. Lulwanda luboofu lwabaayo. Babaandu basaaka chiikhu che likaari mala beera bisonga ebio mala babiaana khu Wele Omunyali Owa Bioosi nga siianwa sie khukhwosia.

¹⁵Ne Balawi basuta Lisanduku lie Ndakaano eya Wele Omunyali Owa Bioosi ne lisanduku liliabamo bifwaani mala balira khu lwanda luboofu. Babaandu ba Beti-shemesi baana siianwa sie khukhwosia ne biianwa bie khuosia endaalo eyo khu Wele Omunyali Owa Bioosi.

¹⁶Babaami baraano be Bafilisiti nga babona lino bakobola Ekironi endaalo eyo.

¹⁷Bino nibio bifwaani bie kamabiimba bie esahabu nibio Bafilisiti bakalusia nga siianwa simala bubi khu Wele Omunyali Owa Bioosi. Biaba: silala khu lukoba lwa Ashitoti, silala khu Kasa, silala khu lukoba lwa Ashikeloni, silala khu lukoba lwa Katii ne sisiindi khu Ekironi.

¹⁸Lundi bifwaani bie sahabu bie chimbeba khuloondekhana ne chingoba choosi che Bafilisiti che Babaami baraano; birekere bibiasirwa nende biikhasirwa tawe. Lulwanda luboofu luli siimbi nende niio baara Lisanduku lie Ndakaano eya Wele Omunyali Owa Bioosi nilio liili buloli khukhwola luno mu mukuunda kwa Yoshua owe e Beti-shemesi.

¹⁹Wele Omunyali Owa Bioosi eera babaandu balala ba Beti-shemesi sikila balola mu Lisanduku lie Ndakaano eya Wele Omunyali Owa Bioosi. Eera babaandu kamakhumi saba. Mala babaandu balila sikila Wele Omunyali Owa Bioosi eera babaandu bakali.

²⁰Nio babaandu ba Beti-shemesi bareeba bali, “Naanu onyala eema ebweeni wa Wele Omunyali Owa Bioosi, Wele omutakatifu yuno? Acha owa naanu nio akhururemo?”

²¹Nio baruma barumwa khu bamenywa ba Kiriati-Yearimu ne baloma bali, “Bafilisiti bakaluusie Lisanduku lie Ndakaano eya Wele Omunyali Owa Bioosi. Yiikha mwiiche mala mulibukule.”