Read lubukusu 1 Sam. 7 Bible Online

1 Sam. 7 - lubukusu bible

1 Sam. 7

¹ Nio babaandu ba Kiriati-Yearimu bacha babukula Lisanduku lie Ndakaano eya Wele Omunyali Owa Bioosi, mala baliyila munju eya Abinatabu, owamenyanga khu lukulu. Baula omusoleeli wewe Eliesa khukhwimeelela Lisanduku lie Ndakaano eya Wele Omunyali Owa Bioosi.

²Lisanduku lie Ndakaano liamenya Kiriati-Yearimu siise sileeyi, kimiiko kamakhumi kabili. Ne mu siise sino enju eya Isiraeli yekoomba Wele Omunyali Owa Bioosi.

³Nio Samweli aboolela enju eya Isiraeli yoosi ali, “Mwaaba ne mukobola khu Wele Omunyali Owa Bioosi ne kumwoyo kwenywe kwoosi, aba rusiao bawele be chikholo chichiindi ne Ashitoreti khukhwama mwinywe. Mure kimiooyo kienywe khu Wele Omunyali Owa Bioosi, mala mukholele niye yeng'ene. Niye akhamusikule khukhwama khu Bafilisiti.”

⁴Nio Baisiraeli barusiao ba Baali ne Ashitoreti mala bakholela Wele Omunyali Owa Bioosi yeng'ene.

⁵Nio Samweli aloma ali, “Buusia Baisiraeli boosi e Misipa mala ese ndamusabila enywe khu Wele ebweeneyo.”

⁶Nio bebuusia e Misipa Bataa kameechi mala bakachukha aasi ebweeni wa Wele Omunyali Owa Bioosi mala basila khulia endaalo eyo yoosi. Baloma bali, “Khwakhola bumayaanu khu Wele Omunyali Owa Bioosi.” Nio Samweli emeelela babaandu ba Isiraeli e Misipa.

⁷Nono nga Bafilisiti baulila bali Baisiraeli baba bebuusiisie e Misipa, babaami be Bafilisiti bacha khukhwibwaakala Isiraeli. Nga Baisiraeli baulila, baria Bafilisiti.

⁸Mala baboolela Samweli bali, “Okhalekha khukhulilila efwe khu Wele Omunyali Owa Bioosi, Wele wefwe tawe, wakana akhuonia khukhwama khu Bafilisiti.”

⁹Nono Samweli aabukula limeeme linuuna mala aliaana nga siianwa sie khukhwosia simuufu khu Wele Omunyali Owa Bioosi. Samweli alilila Wele Omunyali Owa Bioosi khulwa Isiraeli mala Wele Omunyali Owa Bioosi aamukobosia.

¹⁰Nga Samweli aaba ne alikho aana siianwa sie khukhwosia, Bafilisiti besenda siimbi khukhwibwaakala Isiraeli. Ne kakhali Wele Omunyali Owa Bioosi aulukhumila Bafilisiti ne kumumilo kwe kamaani endaalo ng'ene eyo, mala aabakoyaania. Beerwa ne Baisiraeli.

¹¹Nio Baisiraeli barura e Misipa mala batimania Bafilisiti ne babeera khukhwola e Beti-kari.

¹²Samweli aabukula libaale aliimia akari wa Misipa ne Chesana mala alilaanga lisina ali Ebenesa, sikila aloma ali, “Khukhwola luno Wele Omunyali Owa Bioosi akhuyeetile efwe.”

¹³Nono Bafilisiti bakhilwa mala se bengilakho lundi mu sibala sia Isiraeli tawe. Wele Omunyali Owa Bioosi aabiila Bafilisiti mu ndaalo cha Samweli choosi.

¹⁴Chingoba nicho Bafilisiti baba ne baamba khukhwama khu Isiraeli chabakobolela, khukhwama Ekironi khukhwola Katii. Baisiraeli basikula kamaloba kabwe khukhwama khu Bafilisiti. Lundi kumuleembe kwabao akari wa Isiraeli ne Baamori.

¹⁵Samweli emeelela Baisiraeli mu bulamu bwewe bwoosi.

¹⁶Buli mwiiko akeendelelanga Beteli, Kilikali ne Misipa. Emeelelanga Isiraeli abuundu ao oosi.

¹⁷Nio yaba anyala akobola engo Rama sikila mungo mwewe mwaba ebweeneyo. Ne ebweeneyo yosi emeelelanga Isiraeli mala ombakhilayo Wele Omunyali Owa Bioosi alutare.