Read lubukusu 1 Sam. 8 Bible Online

1 Sam. 8 - lubukusu bible

1 Sam. 8

¹Nga Samweli ne asaakhuluwa, akhola basoleeli bewe baaba bakhalaki mu Isiraeli.

²Omusoleeli wewe omubele aaba bali Yoeli, ne okhola khabili aaba bali Abicha. Baba bakhalaki e Beerisheba.

³Ne kakhali babaana ba Samweli se baloonda liiba lilayi lia raarawabwe tawe. Bayimanga bukhala nende asooya ne se bakholanga ke bung'ali tawe.

⁴Nio basaakhulu ba Isiraeli babuusiana alala, bacha khu Samweli e Rama.

⁵ Mala bamuboolela bali, “Lola, ewe oli omusaakhulu, ne basoleeli bowo se bali ne liiba lilayi nga liliowo tawe. Nono robora omwami akhwamiie efwe nga bibala bibiindi bioosi.”

⁶Ne kakhali likhuwa lino se liasiimisia Samweli nga baloma bali, “Khuelesie omwami akhwamiie efwe” tawe. Mala Samweli asaba khu Wele Omunyali Owa Bioosi.

⁷Ne Wele Omunyali Owa Bioosi aamuboolela ali, “Rekeeresia nga babaandu ne baloma sikila se bakhulobile ewe tawe. Ne kakhali bandobile ese nga Omwami khu nibo.

⁸Balikho bakhola nga ne bakholanga buli lwosi. Nga ne nabarusia e Misiri, bandekha mala bakholela bawele babaandi. Balikho bakhukholela wesi bario.

⁹Nono rekeeresia kakabwe, obakaambile ne kamaani mala obekesie liiba lio mwami okhabamiie.”

¹⁰Nono Samweli aaboola kamakhuwa ka Wele Omunyali Owa Bioosi koosi khu baandu ba baaba ne bamureeba bali abaelesie omwami.

¹¹Aaloma ali, “lino nilio liiba lio mwami okhamwaamie enywe: akhabukule babaana benywe be sisoleeli abarobore bakhole khu makaari kewe ne lundi babe batimia chifarasi ne babaandi barangirira kamakaari kewe.

¹²Aliroborera babemeelesi bipupu chielefu ne babemeelesi bipupu kamakhumi karaano. Balala bakhamulimile kimikuunda kiewe ne bakesa biakhulia biewe ne khung'oona bulwaani bwewe bwe liie ne bibiindu bie kamakaari kewe.

¹³Akhabukule babaana benywe bakhaana bamung'oonele bibiindu biiunya bulayi ne khuba bateekhi ne bakhupi be kimikaati.

¹⁴Alibukula ne kamaani kimikuunda kienywe kimilayi, kimikuunda kie kimisabibu nende kie kimiseituni nende kie chimbande mala aelesie bakholi bewe.

¹⁵Alibukula ne kamaani ekhumi eye biakhulia bienywe ne kimikuunda kienywe kie kimisabibu aelesie babemeelesi bewe ne bakholi bewe.

¹⁶Alibukula bakholi benywe be siseecha nende be siikhasi ne chikhaafu chenywe chindayi lukali ne chipunda chenywe khumukholela enywe kimilimo.

¹⁷Alibukula sitonyi silala khwikhumi sie bibiaayo bienywe ne enywe mukhabe banasioobi bewe.

¹⁸Ne siise esio mukhalile sikila omwami wenywe niye mwabeene mweroborera. Ne kakhali Wele Omunyali Owa Bioosi se akhamukobosie enywe siise esio tawe.”

¹⁹Ne kakhali babaandu baloba khuulila ka Samweli. Baloma bali, “Tawe! Efwe khulaba ne omwami akhwamiie,

²⁰nio fwesi khube nga chikholo chichiindi. Lundi nio omwami wefwe akhwamiie lundi akhwimeelele efwe ne khu khuupana kamae kefwe.”

²¹Nga Samweli ne aulila kamakhuwa ke babaandu koosi, akakobolelamo khu Wele Omunyali Owa Bioosi.

²²Ne Wele Omunyali Owa Bioosi aboolela Samweli ali, “Ulila kakabwe mala obaroborere omwami.” Nio Samweli aaboolela babaandu ba Isiraeli ali, “Cha buli mundu mu lukoba lwewe.”