Read lubukusu 1 Sam. 9 Bible Online

1 Sam. 9 - lubukusu bible

1 Sam. 9

¹Abao omundu owe ekholo eya Benjamini bali Kishi. Kishi aba okhwa Abieli. Abieli aba okhwa Serori. Serori aba okhwa Bekorati. Bekorati aba okhwa Afia. Kishi aba omuiinda.

²Kishi aba ne omwana lisina liewe bali Saulo owe lukoondo lulayi. Se abao omundu mu Isiraeli owaba ne lukoondo lulayi khukhila Saulo tawe. Khukhwama khu mabeka kewe khuniina aba omuleeyi khukhila babaandu boosi.

³Nono chipunda cha Kishi chindala chatiba nio aboolela Saulo omwana wewe ali, “Bukula omukholi mulala, mala oche oenje chipunda.”

⁴Ne bacha babirira mu sibala sie bikulu sia Efuraimu ne mu sibala sia Salisa ne se bachinyoola tawe. Babirira mu sibala sia Siaalimu, ne chipunda se chabaayo tawe. Nio babirira mu sibala sia Benjamini, ne se bachinyoola tawe.

⁵Nga ne boola mu sibala sia Sufu, Saulo aaboolela omukholi wewe owaba ne naye ali, “Lekha khukoboleyo, busa Paapa akhola ario alekha khukhwibaasia ke chipunda mala aarakikha khukhwiembeelela efwe.”

⁶Omukholi aakobosia ali, “Aliio omundu owa Wele mu lukoba luno. Ne ali omundu niye babaandu baelesia lukoosi sikila buli siindu nisio aboolanga sibechanga ng'ali. Lekha khucheyo wakana anyala aakhuboolela ke lukeendo nilwo khukeendile.”

⁷Nio Saulo areeba omukholi wewe ali, “Ne khwaaba ne khucha khulayilila omundu oyo siina? Sikila siakhulia nisio khwasutile siaweele mala se khuli ne sisiindu nisio khunyala khwayilila omundu owa Wele tawe. Khuli nende siina?”

⁸Omukholi oyo akobosia lundi Saulo ali, “Ese ndi ne khafwesa khatiiti khari. Ndakhaelesia khu mundu owa Wele akhuboolele ke lukeendo lwefwe.”

⁹(Siise esio mu Isiraeli omundu yaba ne enya khuyima bungali bwe sisiindu khukhawama khu Wele alomanga ali, “Yiicha khuche khu muloli.” Sikila olaangwa luno bali omung'oosi abechanga khaale omuloli.)

¹⁰Nio Saulo akobosia omukholi wewe ali, “Ewe walomile bulayi. Yiicha khuche.” Nio bacha mu lukoba nimwo omundu owa Wele aaba.

¹¹Nga baba ne baniina a sikulu khucha mu lukoba, bakaanana ne bakhaana ba baaba ne balikho barura ne bacha khutaa kameechi. Mala bareeba bakhaana abo bali, “Omuloli ali ano?”

¹²Bakhaana abo bakobosia bali, “Yee aliio. Ali busa ebweeni wenywe eyi siimbi khola khangu. Aama khwola siise sino mu lukoba, sikila babaandu bali ne siianwa sie khukhwosia abuundu aesuta.

¹³Nga ne mulengila mu lukoba, mulamunyoolamo ne akhaniina aacha abuundu aesuta khulia tawe. Sikila babaandu se balarakikha khulia tawe, nabwila echa. Ne niye akhoya aabiita chikhabi embosio nio babaandu balangiilwe balie. Nono niina sikila mulamunyoola khangu.”

¹⁴Nio Saulo ne omukholi wewe baniina boola mu lukoba. Nga baba ne balikho bengilamo, babona Samweli alikho arura eecha khubakaanana khu lukeendo lwewe lwe khucha abuundu aesuta.

¹⁵Nono endaalo nio busie Saulo ache, Wele Omunyali Owa Bioosi aba amanyisie Samweli ali,

¹⁶“Muchuli embi khu siise nga sino siri, khakhurumire omundu khukhwama mu kholo eya Benjamini, okhamuchukhekho kamafura abe omwami owe babaandu base Isiraeli. Akhasikule babaandu base khukhwama khu Bafilisiti. Sikila Naboone khunaanisibwa khwe babaandu base ne khulila khwabwe khwanjoleele.”

¹⁷Nga Samweli ne abona Saulo, Wele Omunyali Owa Bioosi amuboolela ali, “Yuno niye omundu niye nakhubooleele. Niye olamiia babaandu base.”

¹⁸Nio Saulo aacha siimbi ne Samweli asilibwa mala aamureeba ali, “Mboolele, enju eyo muloli eli waena?”

¹⁹Samweli aamukobosia ali, “Ese niye omuloli. Rangira oche ebweeni wase abuundu aesuta. Endaalo yino olalia ne nase. Ne muchuli makhelebeende khakhulekhuule oche mala khakhuboolele koosi kaali mu nganakani chowo.

²⁰Ne mukhara chinganakani chenywe khu punda chichaatibile chindaalo chitaru chichabirire tawe. Sikila chanyoolekhaane khale. Ne naanu niye enju eya Isiraeli elikho eyima lukali? Se oli ewe ne enju yoosi eya paapa wowo?”

²¹Saulo aakobosia ali, “Ese ndi omutiiti mu kholo eya Benjamini ekholo endiiti lukali mu kholo cha Isiraeli. Siina sikila nono ne olomaloma khwise mu ngila yino?”

²²Nio Samweli abukula Saulo ne omukholi wewe aabengisia mu bwelu mala aabaelesia bubwangu ebweeni nende abo ba baaba ne balangiilwe. Ba baba ne balangiilwe baba babaandu kamakhumi kataru.

²³Nio Samweli aboolela omuteekhi ali, “Reera sitonyi nisio nakhuelesia ne khuboolela ndi ‘Sire alubeka.’ ”

²⁴Nono omuteekhi areera enyama eye sinama ne lia siiso mala abira ebweeni wa Saulo. Ne Samweli aboolela Saulo ali, “Lola, nisio babiikha bareere ebweeni wowo lia, sikila siabiikhilwa ewe khukhwola siise sisiaroborwa, nio olie ne bakeni.” Saulo, aalia ne Samweli endaalo eyo.

²⁵Nga ne bekha mu lukoba khukhwama abuundu aesuta sitaanda siaba sialiilwe khulwa Saulo, khu silama

²⁶mala aakonakho. Nio nga bwasia, Samweli alaanga Saulo khukhwama khunju khungaaki ali, “Yinyokha ekhuroongie.” Nono Saulo enyokha mala niye ne Samweli barura bechela khu ngila eye mu lukoba.

²⁷Nga ne baba ne balikho barura mu lukoba, Samweli aboolela Saulo ali, “Boolela omukholi arangire ebweeni wefwe. Ne amalile khubira, ewe sikalakho enyuma atiiti. Nio khumanyisie likhuwa lia Wele.”