Read luganda Olubereberye 11 Bible Online

Olubereberye 11 - luganda bible

Olubereberye 11

¹N'ensi zonna zaalina olulimi lumu n'enjogera emu.

² Awo, bwe baali batambula ebuvanjuba, ne balaba olusenyi mu nsi Sinali; ne batuula omwo.

³Ne bagambagana nti Kale nno, tukole amatoffaali, tugookere ddala. Awo ne baba n'amatoffaali mu kifo ky'amayinja, n'ebitosi mu kifo ky'ennoni.

⁴ Ne boogera nti Kale nno, twezimbire ekibuga, n'ekigo, (ekirituusa) entikko yaakyo mu ggulu, era twefunire erinnya; tuleme okusaasaanira ddala ewala mu nsi zonna.

⁵ Mukama n'akka okulaba ekibuga n'ekigo, abaana b'abantu bye bazimba.

⁶Mukama n'ayogera nti Laba, abo lye ggwanga limu, era bonna balina olulimi lumu; era kino kye batanula okukola: ne kaakano tewali ekigenda okubalema, kye baagala okukola.

⁷ Kale nno, tukke, tutabuliretabulire eyo olulimi lwabwe, baleme okutegeera enjogera yaabwe bokka na bokka.

⁸Bw'atyo Mukama n'abasaasaanyiza ddala okuva eyo okubuna ensi zonna: ne baleka okuzimba ekibuga.

⁹Erinnya lyakyo kye lyava lituumibwa Baberi; kubanga eyo Mukama gye yatabuliratabulira olulimi lw'ensi zonna: n'okuva eyo Mukama n'abasaasaanyiza ddala okubuna ensi zonna.

¹⁰ Kuno kwe kuzaala kwa Seemu. Seemu yali yaakamaze emyaka kikumi, n'azaala Alupakusaadi amataba nga gaakamaze emyaka ebiri okubaawo:

¹¹Seemu n'awangaala bwe yamala okuzaala Alupakusaadi emyaka bitaano, n'azaala abaana ab'obulenzi n'ab'obuwala.

¹²Alupakusaadi n'amala emyaka asatu mu etaano, n'azaala Seera:

¹³Alupakusaadi n'awangaala bwe yamala okuzaala Seera emyaka bina mu esatu, n'azaala abaana ab'obulenzi n'ab'obuwala.

¹⁴Seera n'amala emyaka asatu, n'azaala Eberi:

¹⁵Seera n'awangaala bwe yamala okuzaala Eberi emyaka bina mu esatu, n'azaala abaana ab'obulenzi n'ab'obuwala.

¹⁶Eberi n'amala emyaka asatu mu ena, n'azaala Peregi:

¹⁷Eberi n'awangaala bwe yamala okuzaala Peregi emyaka bina mu asatu n'azaala abaana ab'obulenzi n'ab'obuwala.

¹⁸Peregi n'amala emyaka asatu, n'azaala Leewo:

¹⁹Peregi n'awangaala bwe yamala okuzaala Leewo emyaka bibiri mu mwenda, n'azaala abaana ab'obulenzi n'ab'obuwala.

²⁰Leewo n'amala emyaka asatu mu ebiri, n'azaala Serugi;

²¹Leewo n'awangaala bwe yamala okuzaala Serugi emyaka bibiri mu musanvu, n'azaala abaana ab'obulenzi n'ab'obuwala.

²²Serugi n'amala emyaka asatu, n'azaala Nakoli:

²³Serugi n'awangaala bwe yamala okuzaala Nakoli emyaka bibiri, n'azaala abaana ab'obulenzi n'ab'obuwala.

²⁴Nakoli n'amala emyaka abiri mu mwenda, n'azaala Teera:

²⁵Nakoli n'awangaala bwe yamala okuzaala Teera emyaka kikumi mu kkumi mu mwenda, n'azaala abaana ab'obulenzi n'ab'obuwala.

²⁶ Teera n'amala emyaka nsanvu, n'azaala Ibulaamu, Nakoli ne Kalani.

²⁷Era kuno kwe kuzaala kwa Teera. Teera yazaala Ibulaamu, Nakoli, ne Kalani; Kalani n'azaala Lutti.

²⁸Kalani n'afiira awali kitaawe mu nsi mwe yazaalirwa, mu Uli, y'ensi ey'Abakaludaaya.

²⁹ Ne Ibulaamu ne Nakoli ne beewasiza abakazi: omukazi wa Ibulaamu erinnya lye Salaayi; n'omukazi wa Nakoli erinnya lye Mirika, omwana wa Kalani, ye kitaawe wa Mirika, era kitaawe wa Isika.

³⁰Era Salaayi yali mugumba; teyalina mwana.

³¹ Teera n'atwala Ibulaamu omwana we, ne Lutti, omwana wa Kalani, omuzzukulu we, ne Salaayi muka mwana we, omukazi w'omwana we Ibulaamu; ne bavaayo nabo mu Uli, ye ensi ey'Abakaludaaya, okuyingira mu nsi ya Kanani; ne batuuka e Kalani ne batuula eyo.

³²N'ennaku za Teera zaali emyaka bibiri mu etaano: Tera n'afiira mu Kalani.