Read luganda Olubereberye 24 Bible Online

Olubereberye 24 - luganda bible

Olubereberye 24

¹ Ibulayimu yali akaddiye, ng'ayitiridde obukadde: era Mukama yawanga Ibulayimu omukisa mu bigambo byonna.

² Ibulayimu n'agamba omuddu we, omukulu w'ennyumba ye, eyafuganga byonna bye yalina, nti Nkwegayiridde, ssa omukono gwo wansi w'ekisambi kyange:

³ nange naakulayiza Mukama, Katonda w'eggulu era Katonda w'ensi, nga toliwasiza mwana wange mukazi aliva mu bawala aba Bakanani, be ntuulamu:

⁴ naye oligenda mu nsi yange, era eri baganda bange, omuwasize omwana wange Isaaka omukazi.

⁵Omuddu n'amugamba nti Mpozzi omukazi talikkiriza kujja nange okutuuka mu nsi eno: kiriŋŋwanira okuzza omwana wo mu nsi gye wavaamu?

⁶Ibulayimu n'amugamba nti Tozzangayo mwana wange n'akatono.

⁷ Mukama, Katonda w'eggulu, eyanziya mu nnyumba ya kitange, ne mu nsi mwe nnazaalirwa, era eyayogera nange, nandayirira, ng'agamba nti Ezzadde lyo ndiriwa ensi eno; oyo alituma malayika we okukukulembera, naawe oliwasiza omwana wange omukazi aliva eyo.

⁸ N'omukazi bw'aliba nga takkirizza kujja naawe, kale nga toliiko musango olw'ekirayiro kyange kino; kino kyokka, obutamuzzaayo mwana wange.

⁹ Omuddu n'assa omukono gwe wansi w'ekisambi kya Ibulayimu mukama we, n'amulayirira mu kigambo ekyo.

¹⁰ Omuddu n'atwala eŋŋamira kkumi, ez'omu ŋŋamira za mukama we, ne yeegendera; ng'alina ebintu byonna ebirungi ebya mukama we mu ngalo ze: n'agolokoka, n'agenda mu Mesopotamiya, mu kibuga kya Nakoli.

¹¹ N'afukamiza eŋŋamira ebweru w'ekibuga awali oluzzi lw'amazzi obudde nga buwungeera, obudde nga butuuse abakazi we baafulumiranga okusena amazzi.

¹² N'ayogera nti Ai Mukama, Katonda wa mukama wange Ibulayimu, ompe, nkwegayiridde, omukisa leero, olage ekisa mukama wange Ibulayimu.

¹³Laba, nnyimiridde ku nsulo z'amazzi; n'abaana abawala b'ab'omu kibuga bafuluma okusena amazzi:

¹⁴ kale kibeere bwe kiti; omuwala gwe nnaagamba nti Sena ensuwa yo, nkwegayiridde, nnywe; naye anaagamba nti Nnywa, nange nnaanywesa n'eŋŋamira zo: oyo abeere oyo gwe walagirira omuddu wo Isaaka; era bwe ntyo bwe nnaategeera ng'olaze ekisa mukama wange.

¹⁵ Kale olwatuuka, bwe yali ng'akyayogera, laba, Lebbeeka n'afuluma, eyazaalirwa Bessweri omwana wa Mirika, mukazi wa Nakoli, muganda wa Ibulayimu, ng'alina ensuwa ye ku kibegabega kye.

¹⁶ N'omuwala yali mulungi nnyo okulaba, omuwala omuto, so nga tewali musajja eyamumanya: n'aserengeta ku nsulo, n'ajjuza ensuwa ye, n'ayambuka.

¹⁷Omuddu n'addukana mbiro okumusisinkana, n'ayogera nti Onnywese, nkwegayiridde, otuzzi mu nsuwa yo.

¹⁸N'ayogera nti Nywa, mukama wange: n'ayanguwa n'assa ensuwa ye ku mukono gwe, n'amunywesa.

¹⁹Awo bwe yamala okumunywesa, n'ayogera nti Nnaasenera n'eŋŋamira zo zinywe zikkute.

²⁰N'ayanguwa n'afuka ensuwa ye mu kyesero, n'addukana nate ku luzzi okusena, n'asenera eŋŋamira ze zonna.

²¹Omusajja n'amwekaliriza amaaso, ng'asirise, okutegeera nga Mukama awadde olugendo lwe omukisa oba nga tawadde.

²²Awo olwatuuka, eŋŋamira bwe zaamala okunywa, omusajja n'addira empeta eya zaabu obuzito bwayo kitundu kya sekeri, n'emisagga egy'okubanga ku mikono gye obuzito bwagyo sekeri kkumi eza zaabu;

²³n'ayogera nti Ggwe oli mwana w'ani? mbuulira nkwegayiridde. Mu nnyumba ya kitaawo mulimu ebbanga ffe okusula omwo?

²⁴N'amugamba nti Nze ndi mwana wa Bessweri omwana wa Mirika, gwe yazaalira Nakoli.

²⁵Era nate n'amugamba nti Tulina essubi era n'ebyokulya ebinaazimala, era n'ebbanga ery'okusulamu.

²⁶ Omusajja n'akutama, n'asinza Mukama.

²⁷ N'ayogera nti Mukama yeebazibwe, Katonda wa mukama wange Ibulayimu, ataleka kusaasira kwe n'amazima ge eri mukama wange: nze, Mukama annuŋŋamizza mu kkubo eri ennyumba ya baganda ba mukama wange.

²⁸Omuwala n'addukana, n'abuulira ab'omu nnyumba ya nnyina ng'ebigambo ebyo bwe biri.

²⁹ Era Lebbeeka yalina mwannyina erinnya lye Labbaani: Labbaani n'afuluma n'adduka okusisinkana omusajja awali oluzzi.

³⁰Awo olwatuuka, bwe yalaba empeta, n'emisagga egyali ku mikono gya mwannyina, era bwe yawulira ebigambo bya Lebbeeka mwannyina, ng'ayogera nti Bw'atyo omusajja bw'aŋŋambye; n'ajja eri omusajja; era, laba, yali ng'ayimiridde mu mbiriizi z'eŋŋamira awali ensulo.

³¹ N'ayogera nti Yingira ggwe Mukama gw'awadde omukisa; kiki ekikuyimirizza ebweru? kubanga nteeseteese ennyumba, n'ekifo eky'eŋŋamira.

³² Omusajja n'ayingira mu nnyumba, n'asumulula eŋŋamira; n'awa essubi n'ebyokulya eby'eŋŋamira, n'amazzi okunaaza ebigere bye n'ebigere by'abasajja abaali naye.

³³Ne bateeka emmere mu maaso ge alye: naye n'ayogera nti Siirye nga sinnayogera bye nnatumibwa. N'ayogera nti Yogera.

³⁴N'ayogera nti Nze ndi muddu wa Ibulayimu.

³⁵ Era Mukama yawanga mukama wange omukisa mungi; era afuuse omukulu: era yamuwa embuzi n'ente, ne ffeeza ne zaabu, n'abaddu n'abazaana, n'eŋŋamira n'endogoyi.

³⁶ Ne Saala mukazi wa mukama wange n'azaalira mukama wange omwana bwe yali ng'akaddiye: era oyo n'amuwa byonna by'alina.

³⁷ Ne mukama wange n'andayiza, ng'ayogera nti Toliwasiza mwana wange mukazi aliva mu bawala aba Abakanani, be ntuulira mu nsi yaabwe:

³⁸naye oligenda eri ennyumba ya kitange, n'eri baganda bange, owasize omwana wange omukazi.

³⁹Ne ŋŋamba mukama wange nti Mpozzi omukazi talikkiriza kujja nange.

⁴⁰ N'aŋŋamba nti Mukama, gwe ntambulira mu maaso ge, alituma malayika we wamu naawe, aliwa olugendo lwo omukisa; naawe oliwasiza omwana wange omukazi aliva mu baganda bange, ne mu nnyumba ya kitange:

⁴¹ bw'otyo tolibaako musango olw'ekirayiro kyange, bw'olituuka mu baganda bange; nabo bwe batalikuwa mukazi, ggwe nga toliiko musango olw'ekirayiro kyange.

⁴² Leero ne njija awali oluzzi, ne njogera nti Ai Mukama, Katonda wa mukama wange Ibulayimu, bw'onoowa kaakano omukisa olugendo lwange lwe ŋŋenda:

⁴³ laba, nnyimiridde awali ensulo y'amazzi; kale kibeere bwe kiti; omuwala anaafuluma okusena, gwe nnaagamba nti Ompe, nkwegayiridde, otuzzi mu nsuwa yo nnywe:

⁴⁴naye anaŋŋamba nti nywa ggwe era nze naasenera n'eŋŋamira zo: oyo abeere oyo Mukama gwe yalagirira omwana wa mukama wange.

⁴⁵ Bwe mbadde nga nkyayogera mu mutima gwange, laba, Lebbeeka n'afuluma ng'alina ensuwa ye ku kibegabega kye: n'aserengeta ku nsulo, n'asena: ne mmugamba nti Nnywe, nkwegayiridde.

⁴⁶ N'ayanguwa, n'assa ensuwa ye okuva ku kibegabega kye, n'ayogera nti Nywa, nange naanywesa n'eŋŋamira zo: ne nnywa, naye n'anywesa n'eŋŋamira.

⁴⁷ Ne mmubuuza ne njogera nti Ggwe oli mwana w'ani? N'ayogera nti Mwana wa Bessweri, omwana wa Nakoli, Mirika gwe yamuzaalira: ne nnaanika empeta mu nnyindo ye, n'emisagga ku mikono gye.

⁴⁸ Ne nkutama, ne nsinza Mukama, ne nneebaza Mukama, Katonda wa mukama wange Ibulayimu, eyannuŋŋamya mu kkubo lyennyini okuwasiza omwana we omwana wa mwannyina mukama wange.

⁴⁹ Ne kaakano bwe munakkiriza okukolera mukama wange eby'ekisa n'eby'amazima, mumbuulire; era bwe mutakkirize, mumbuulire; ndyoke nkyukire ku mukono ogwa ddyo, oba ku gwa kkono.

⁵⁰ Labbaani ne Bessweri ne balyoka baddamu ne boogera nti Ekigambo ekyo kivudde eri Mukama: tetuyinza kukubuulira bibi newakubadde ebirungi.

⁵¹ Laba, Lebbeeka ali mu maaso go, mutwale, ogende, abeere mukazi w'omwana wa mukama wo, Mukama nga bw'ayogedde.

⁵² Awo olwatuuka, omuddu wa Ibulayimu bwe yawulira ebigambo ebyo, n'avuunama eri Mukama.

⁵³Omuddu n'aleeta amakula aga ffeeza n'amakula aga zaabu n'ebyambalo, n'abiwa Lebbeeka: era n'awa ne mwannyina ne nnyina ebintu eby'omuwendo omungi.

⁵⁴Ne balya ne banywa; ye n'abasajja abaali naye, ne basula ne bakeesa obudde; ne bagolokoka enkya, n'ayogera nti Munsiibule ŋŋende eri mukama wange.

⁵⁵Ne mwannyina ne nnyina ne boogera nti Omuwala abeere naffe amale ennaku si nnyingi, ekkumi oba kusingawo; alyoke agende.

⁵⁶N'abagamba nti Tondwisa, kubanga Mukama awadde omukisa olugendo lwange; munsiibule ŋŋende eri mukama wange.

⁵⁷Ne boogera nti Tunaayita omuwala, tumubuuze mu kamwa ke.

⁵⁸Ne bayita Lebbeeka, ne bamugamba nti Onoogenda n'omusajja ono? N'ayogera nti Nnaagenda.

⁵⁹ Ne basiibula Lebbeeka mwannyinaabwe, n'omulenzi we, n'omuddu wa Ibulayimu, n'abasajja be.

⁶⁰ Ne basabira Lebbeeka omukisa, ne bamugamba nti Mwannyinaffe, beeranga nnyina w'abantu obukumi enkumi, n'ezzadde lyo liryenga omulyango gw'abo ababakyawa.

⁶¹Lebbeeka n'agolokoka n'abazaana be, ne beebagala ku ŋŋamira, ne bagenda n'omusajja: omuddu n'atwala Lebbeeka, ne yeegendera.

⁶² Isaaka n'ajja ng'ava mu kkubo ery'e Beerirakairoi; kubanga yali atuula mu nsi ey'obukiika obwa ddyo.

⁶³Isaaka n'afuluma okufumiitiriza mu nnimiro akawungeezi: n'ayimusa amaaso ge, n'atunula, era, laba, eŋŋamira nga zijja.

⁶⁴Lebbeeka n'ayimusa amaaso ge, era bwe yalaba Isaaka, n'ava ku ŋŋamira.

⁶⁵N'agamba omuddu nti Musajja ki oyo atambulira mu nnimiro okutusisinkana? Omuddu n'ayogera nti Ye mukama wange: n'addira olugoye lwe olubikka mu maaso ne yeebikkako.

⁶⁶Omuddu n'abuulira Isaaka byonna bye yakola.

⁶⁷ Isaaka n'amuleeta mu weema ya nnyina Saala, n'awasa Lebbeeka, n'aba mukazi we; n'amwagala: Isaaka n'asanyusibwa nnyina bwe yamala okufa.