Read luganda Olubereberye 26 Bible Online

Olubereberye 26 - luganda bible

Olubereberye 26

¹ Ne wagwa enjala mu nsi endala so si eyo ey'olubereberye eyagwa mu nnaku za Ibulayimu. Isaaka n'agenda eri Abimereki kabaka wa Abafirisuuti mu Gerali.

² Mukama n'amulabikira, n'ayogera nti Toserengeta mu Misiri; tuula mu nsi gye nnakugambako:

³ beera mu nsi eno, nange naabeeranga wamu naawe, era naakuwanga omukisa; kubanga ggwe n'ezzadde lyo ndibawa mmwe ensi zino zonna, era naanywezanga ekirayiro kye nnalayirira Ibulayimu kitaawo;

⁴ era naayazanga ezzadde lyo ng'emmunyeenye ez'omu ggulu, era ndiwa ezzadde lyo ensi zino zonna; ne mu zzadde lyo amawanga gonna ag'omu nsi mwe galiweerwa omukisa;

⁵ kubanga Ibulayimu yawuliranga eddoboozi lyange, ne yeekuumanga bye nnamukuutiranga, ebigambo byange, amateeka gange, n'ebiragiro byange.

⁶Isaaka n'atuula mu Gerali:

⁷ abasajja baayo ne bamubuuza ku mukazi we; n'ayogera nti Ye mwannyinaze: kubanga yatya okwogera nti Mukazi wange; abasajja baawo baleme okunzita olwa Lebbeeka: kubanga yali mulungi okulaba.

⁸Awo olwatuuka, bwe yali yaakamalayo ebiro bingi, Abimereki kabaka wa Abafirisuuti n'atunuulira mu ddirisa, n'alaba, era laba, Isaaka yali ng'azannya ne Lebbeeka mukazi we.

⁹Abimereki n'ayita Isaaka, n'ayogera nti Laba, mazima ye mukazi wo: naawe wayogera otya nti Ye mwannyinaze? Isaaka n'amugamba nti Kubanga nali njogera nti Nneme okufa ku bubwe.

¹⁰ Abimereki n'ayogera nti Kino kiki ky'otukoze? omu ku bantu yandisuze ne mukazi wo nga talowoozezza, naawe wandituleeseeko omusango.

¹¹Abimereki n'akuutira abantu bonna, ng'ayogera Buli anaakwatanga ku musajja oyo oba mukazi we talirema kuttibwa.

¹² Isaaka n'asiga mu nsi eyo, n'afuna mu mwaka ogwo emirundi kikumi: Mukama n'amuwa omukisa.

¹³Omusajja n'akula ne yeeyongerayongeranga okutuusa bwe yali omukulu ennyo:

¹⁴ era yalina embuzi ze n'ente ze, n'abaddu bangi: n'akwasa Abafirisuuti obuggya.

¹⁵ Awo enzizi zonna abaddu ba kitaawe ze baasimira mu nnaku za Ibulayimu kitaawe, Abafirisuuti baali nga bazizibye era nga bazijjuzizza ettaka.

¹⁶Abimereki n'agamba Isaaka nti Genda tuveeko; kubanga otusinga nnyo amaanyi.

¹⁷Isaaka n'avaayo, n'asimba eweema ze mu kiwonvu eky'e Gerali, n'atuula omwo.

¹⁸ Isaaka n'ayerula enzizi z'amazzi, ze baasimira mu nnaku za Ibulayimu kitaawe; kubanga Abafirisuuti baaziziba Ibulayimu bwe yamala okufa: n'aziyita amannya gaazo ng'amannya bwe gaali kitaawe ge yazituuma.

¹⁹Abaddu ba Isaaka ne basima mu kiwonvu, ne balaba omwo oluzzi lw'amazzi amalamu.

²⁰ N'abasumba ab'e Gerali ne bawakanya abasumba ba Isaaka, nga boogera nti Amazzi gaffe: n'atuuma oluzzi erinnya lyalwo Eseki; kubanga baawakana naye.

²¹Ne basima oluzzi olulala, era n'olwo ne baluwakanira: balutuuma erinnya lyalwo Situna.

²²N'ajjulukuka okuvaayo, n'asima oluzzi olulala; n'olwo ne bataluwakanira; n'alutuuma erinnya lyalwo Lekobosi; n'ayogera nti Kubanga kaakano Mukama atugaziyizza, naffe tulyalira mu nsi.

²³N'avaayo n'ayambuka e Beeruseba.

²⁴ Mukama n'amulabikira ekiro ekyo, n'ayogera nti Nze Katonda wa Ibulayimu kitaawo: totya, kubanga nze ndi wamu naawe era naakuwanga omukisa, era naayongeranga ezzadde lyo ku bw'omuddu wange Ibulayimu.

²⁵ N'azimba ekyoto eyo, n'akoowoola erinnya lya Mukama, n'asimba eyo eweema ye: n'eyo abaddu ba Isaaka ne basimayo oluzzi.

²⁶ Abimereki n'alyoka ava mu Gerali n'agenda gy'ali, ne Akuzasi mukwano gwe, ne Fikoli omukulu w'eggye lye.

²⁷ Isaaka n'abagamba nti Kiki ekibaleese gye ndi, bwe muba nga munkyawa, era mwangoba gye muli?

²⁸ Ne boogera nti Twalabira ddala nga Mukama ali naawe: ne twogera nti Wabeere nno ekirayiro gye tuli, wakati waffe naawe, era tulagaane endagaano naawe;

²⁹ obutatukolerangako kabi, nga ffe bwe tutakukwatangako, era nga bwe tutakukoleranga kantu wabula ebirungi, era ne tukusindika n'emirembe; kaakano ggwe oyo Mukama gw'awa omukisa.

³⁰N'abafumbira embaga, ne balya ne banywa.

³¹ Ne bagolokoka enkya mu makya, ne balayiragana: Isaaka n'abasiibula, ne bamuvaako n'emirembe.

³²Awo olwatuuka ku lunaku olwo, abaddu ba Isaaka ne bajja, ne bamubuulira ku luzzi lwe baali basimye, ne bamugamba nti Tulabye amazzi.

³³N'alutuuma Siba; erinnya ly'ekibuga kyeriva libeera Beeruseba ne leero.

³⁴Esawu bwe yali nga yaakamaze emyaka ana n'awasa Yudisi omwana wa Beeri Omukiiti, ne Basimansi omwana wa Eromi Omukiiti:

³⁵ ne banakuwaza Isaaka ne Lebbeeka emmeeme zaabwe.