Read luganda Olubereberye 5 Bible Online

Olubereberye 5 - luganda bible

Olubereberye 5

¹ Kino kye kitabo eky'okuzaalibwa kwa Adamu. Olunaku Katonda lwe yatonderamu omuntu, mu kifaananyi kya Katonda mwe yamukolera;

²omusajja n'omukazi bwe yabatonda; n'abawa omukisa, n'abatuuma erinnya lyabwe Adamu ku lunaku lwe baatonderwamu.

³Adamu n'amala emyaka kikumi mu asatu, n'azaala omwana ow'obulenzi mu kifaananyi kye, mu ngeri ye; n'amutuuma erinnya lye Seezi:

⁴ennaku za Adamu bwe yamala okuzaala Seezi emyaka lunaana, n'azaala abaana ab'obulenzi n'ab'obuwala.

⁵ Ennaku zonna eza Adamu ze yamala ne ziba emyaka lwenda mu asatu; n'afa.

⁶Seezi n'amala emyaka kikumi mu ataano, n'azaala Enosi.

⁷Seezi n'awangaala bwe yamala okuzaala Enosi emyaka lunaana mu musanvu, n'azaala abaana ab'obulenzi n'ab'obuwala;

⁸ennaku zonna eza Seezi ne ziba emyaka lwenda mu kkumi n'ebiri; n'afa.

⁹Enosi n'amala emyaka kyenda, n'azaala Kenani:

¹⁰Enosi n'awangaala bwe yamala okuzaala Kenani emyaka lunaana mu kkumi n'etaano, n'azaala abaana ab'obulenzi n'ab'obuwala:

¹¹ennaku zonna eza Enosi ne ziba emyaka lwenda mu etaano; n'afa.

¹²Kenani n'amala emyaka nsanvu, n'azaala Makalaleri:

¹³Kenani n'awangaala bwe yamala okuzaala Makalaleri emyaka lunaana mu ana, n'azaala abaana ab'obulenzi n'ab'obuwala:

¹⁴ennaku zonna eza Kenani ne ziba emyaka lwenda mu kkumi; n'afa.

¹⁵Makalaleri n'amala emyaka nkaaga mu etaano, n'azaala Yakedi:

¹⁶Makalaleri n'awangaala bwe yamala okuzaala Yaledi emyaka lunaana mu asatu, n'azaala abaana ab'obulenzi n'ab'obuwala:

¹⁷ennaku zonna eza Makalaleri ne ziba emyaka lunaana mu kyenda mu etaano; n'afa.

¹⁸ Yaledi n'amala emyaka kikumi mu nkaaga mu ebiri, n'azaala Enoka;

¹⁹Yaledi n'awangaala bwe yamala okuzaala Enoka emyaka lunaana, n'azaala abaana ab'obulenzi n'ab'obuwala:

²⁰ennaku zonna eza Yaledi ne ziba emyaka lwenda mu nkaaga mu ebiri; n'afa.

²¹Enoka n'amala emyaka nkaaga mu etaano, n'azaala Mesuseera:

²² Enoka n'atambulira wamu ne Katonda bwe yamala okuzaala Mesuseera emyaka bisatu, n'azaala abaana ab'obulenzi n'ab'obuwala:

²³ennaku zonna eza Enoka ne ziba emyaka bisatu mu nkaaga mu etaano:

²⁴ Enoka n'atambulira wamu ne Katonda: so n'atabeerawo; kubanga Katonda yamutwala.

²⁵Mesuseera n'amala emyaka kikumi mu kinaana mu musanvu, n'azaala Lameka:

²⁶Mesuseera n'awangaala bwe yamala okuzaala Lameka emyaka lusanvu mu kinaana mu ebiri, n'azaala abaana ab'obulenzi n'ab'obuwala:

²⁷ennaku zonna eza Mesuseera ne ziba emyaka lwenda mu nkaaga mu mwenda; n'afa.

²⁸Lameka n'amala emyaka kikumi mu kinaana mu ebiri, n'azaala omwana ow'obulenzi:

²⁹ n'amutuuma erinnya lye Nuuwa, ng'ayogera nti Ono ye alitusanyusa mu mulimu gwaffe ne mu kutegana okw'emikono gyaffe olw'ensi Mukama gye yakolimira.

³⁰Lameka n'awangaala bwe yamala okuzaala Nuuwa emyaka bitaano mu kyenda mu etaano, n'azaala abaana ab'obulenzni n'ab'obuwala:

³¹ennaku zonna eza Lameka ne ziba emyaka lusanvu mu nsanvu mu musanvu; n'afa.

³²Nuuwa yali nga yaakamala emyaka bitaano: Nuuwa n'azaala Seemu, Kaamu, ne Yafeesi.