Read luganda Yobu 14 Bible Online

Yobu 14 - luganda bible

Yobu 14

¹Omuntu azaalibwa omukazi Wa nnaku si nnyingi, era ajjude abuyinike.

² Amulisa ng'ekimuli n'atemebwa: Era adduka ng'ekisiikirize so tabeerera.

³ Naawe omuzibulira amaaso go afaanana bw'atyo, N'ondeeta mu musango nze naawe?

⁴ Ani ayinza okuggya ekintu ekirongoofu mu kitali kirongoofu? tewali n'omu.

⁵ Kubanga ennaku ze zaateesebwa, omuwendo gw'emyezi gye guli naawe, Era wamuteekerawo ensalo ze z'atayinza kusukkako;

⁶ Muggyeeko amaaso go awummule, Okutuusa lw'alimala olunaku lwe ng'akolera empeera.

⁷Kubanga waliwo essuubi ery'omuti bwe gutemebwa nga guliroka nate, Era ng'ettabi lyagwo etto teririfa.

⁸ Ekikolo kyagwo newakubadde nga kikaddiwa mu ttaka, N'ekikonge kyagwo ne kifiira mu nsi;

⁹Naye olw'akaloosa k'amazzi gulimulisa, Ne gusuula amatabi ng'ekisimbe.

¹⁰ Naye omuntu afa era ayongobera: Weewaawo, omuntu ata omukka, kale ali ludda wa?

¹¹ Ng'amazzi bwe gaggweerera mu nnyanja, N'omugga nga bwe guggwaawo ne gukalira;

¹² Bw'atyo n'omuntu agalamira n'atayimuka: Okutuusa eggulu lwe litalibaawo nate, tebalizuukuka, So tebalizuukuzibwa mu tulo twabwe.

¹³ Singa onkwese mu magombe, Singa onkisa kyama okutuusa obusungu bwo lwe buliyita, Singa onteekeddewo ekiseera ekiragiddwa, n'onjijukira!

¹⁴ Omuntu bw'afa aliba mulamu nate? Nandirindiridde ne mmala ennaku zonna ez'olutabaalo lwange, Okutuusa okuteebwa kwange lwe kwandizze.

¹⁵ Wandimpise, nange nandikuyitabye: Wandibadde n'okwegomba eri omulimu gw'emikono gyo.

¹⁶ Naye kaakano obala ebigere byange: Tolabirira kwonoona kwange?

¹⁷ Okusobya kwange kuteekeddwako akabonero mu nsawo, Era osibira ddala obutali butuukirivu bwange.

¹⁸ Era mazima olusozi olugwa luggwaawo, N'olwazi luggibwawo mu kifo kyalwo;

¹⁹Amazzi gasiriiza amayinja; Okwanjaala kwago kufumbiikiriza enfuufu ey'oku nsi: Era ozikiriza essuubi ery'omuntu.

²⁰Ennaku zonna ng'omuwangula, n'ayitawo; Owaanyisa amaaso ge n'omusindika.

²¹ Batabani be batuuka mu kitiibwa, ye nga takimanyi; Bakkakkanyizibwa, naye ye nga tategeera bwe bali.

²²Naye omubiri gwe oguli ku ye gulumwa, N'emmeeme ye eri munda ye enakuwala.