Read luganda Yobu 15 Bible Online

Yobu 15 - luganda bible

Yobu 15

¹Awo Erifaazi Omutemani n'addamu n'ayogera nti

² Ow'amagezi yandizzeemu n'okumanya okutaliimu, N'ajjuza olubuto lwe n'embuyaga ez'ebuvanjuba?

³Yandiwakanye n'ebigambo ebitaliiko kye bigasa, Oba ng'ayogera ebitaliiko kye biyinza?

⁴Weewaawo, omalawo okutya, Era oziyiza okwagala Katonda mu maaso ge.

⁵Kubanga obutali butuukirivu bwo bwe buyigiriza akamwa ko, Era weeroboza olulimi lw'abagerengetanya.

⁶ Akamwa ko ggwe ke kakusalira omusango okukusinga so si nze; Weewaawo, emimwa gyo ggwe ye mujulirwa eri ggwe.

⁷ Ggwe wasooka abantu bonna okuzaalibwa? Oba ggwe baakuzaala ensozi nga tezinnabaawo?

⁸ Wali owulidde okuteesa kwa Katonda okw'omu kyama? Era weeyita wa magezi wekka omu?

⁹ Kiki ky'omanyi ffe kye tutamanyi? Kiki ky'otegeera ekitali mu ffe?

¹⁰ Abameze envi n'abakadde ennyo bali wamu naffe, Abasinga ennyo kitaawo obukadde.

¹¹Okusanyusa kwa Katonda kutono, tekukumala, N'ekigambo ekyogera naawe empola?

¹²Omutima gwo gukutwalira ki? N'amaaso go gatemeza ki?

¹³ N'okukyusa omwoyo gwo okulwana ne Katonda, N'oleka ebigambo ebiri bwe bityo okuva mu kamwa ko.

¹⁴ Omuntu kye kiki abeere omulongoofu? N'oyo azaalibwa omukazi abeere omutuukirivu?

¹⁵ Laba, teyeesiga batukuvu be; Weewaawo, eggulu si ddongoofu mu maaso ge.

¹⁶ Omugwagwa era omuvundu si ye asinga nnyo obutaba mulongoofu, Omuntu anywa obutali butuukirivu ng'amazzi!

¹⁷Naakwolesa, mpulira; N'ekyo kye ndabye kye nnaabuulira:

¹⁸(Ab'amagezi kye baabuuliranga Okuva ku bajjajjaabwe, ne batakikweka;

¹⁹ Abaaweebwa ensi bokka, So tewali munnaggwanga eyayita mu bo:)

²⁰ Omubi aba lubuto lwa buyinike ennaku ze zonna, Gwe muwendo gw'emyaka egyamuterekerwa omujoozi.

²¹ Eddoboozi ery'entiisa liba mu matu ge; Bw'aba ng'alabye omukisa omunyazi alimugwako:

²²Takkiriza ng'alidda okuva mu kizikiza, Era ekitala kimulindirira:

²³ Atambuliratambulira ekyokulya ng'ayogera nti Kiri ludda wa? Amanyi ng'olunaku olw'ekizikiza lweteeseteese, luli ku mukono gwe.

²⁴Okweraliikirira n'obubalagaze bimutiisa; Bimuwangula nga kabaka eyeeteeseteese okulwana:

²⁵Kubanga agolodde omukono gwe eri Katonda, N'agirira Omuyinza w'ebintu byonna eby'ekyejo;

²⁶ Amufubutukirako ng'akakanyazizza ensingo ye, N'amakundi amanene ag'oku ngabo ze:

²⁷ Kubanga abisse ku maaso ge obugevvu bwe, Era aleese ebifi by'amasavu ku mbiriizi ze;

²⁸Era yabeeranga mu bibuga eby'amatongo, Mu nnyumba omutali muntu, Ezaali zaagala okufuuka ebifunvu.

²⁹Taagaggawalenga so n'ebintu bye tebiibenga bya lubeerera, So n'ebibala byabwe tebiikutamenga okutuuka ku ttaka.

³⁰ Taavenga mu kizikiza; Omuliro gunaakazanga amatabi ge, Era anaavangawo olw'omukka ogw'omu kamwa ke.

³¹ Aleme okwesiga ebitaliimu nga yeerimbalimba: Kubanga ebitaliimu bye binaabanga empeera ye.

³² Eneekomekkerezebwanga ebiro bye nga tebinnatuukirira, N'ettabi lye teriggumizenga.

³³Anaakunkumulanga ezabbibu ze ezitannaba kwengera ng'omuzabbibu, Era anaasinsimulanga ekimuli kye ng'omuzeyituuni.

³⁴ Kubanga ekibiina ky'abatatya Katonda kinaabanga kigumba, Era omuliro gunaayokyanga eweema ezinaalwangamu enguzi.

³⁵ Baba mbuto za bubi, ne bazaala obutali butuukirivu, N'olubuto lwabwe luteekateeka bukuusa.