Read luganda Yobu 18 Bible Online

Yobu 18 - luganda bible

Yobu 18

¹Awo Birudaadi Omusuki n'addamu n'ayogera nti

² Mulituusa wa okuteega ebigambo? Musooke okulowooza, ne tulyoka twogera.

³ Ekituyisa ensolo kiki, Ne tufuuka abatali balongoofu mu maaso go?

⁴ Ggwe eyeetaagula olw'obusungu bwo, Ensi erirekebwa ku lulwo? Oba olwazi luliggibwa mu kifo kyalwo?

⁵ Weewaawo, omumuli gw'omubi gunaazikizibwanga, So n'olusasi olw'omuliro gwe terwakenga.

⁶Omumuli gunaabanga kizikiza mu weema ye, N'ettabaaza ye eri waggulu we eneezaamizibwanga.

⁷ Ebigere eby'amaanyi ge binaafundikirwanga, N'okuteesa kwe ye kunaamusuulanga.

⁸ Kubanga ebigere bye ye bimusudde mu kitimba, Era atambulira ku mutego.

⁹Ekyambika kinaamukwatanga ekisinziiro, N'akakunizo kinaamunywezanga.

¹⁰Akamasu kamukwekeddwa mu ttaka, N'ekigu kimukwekeddwa mu kkubo.

¹¹ Entiisa eneemukanga enjuyi zonna, Era eneemuyigganyanga ku bisinziiro bye.

¹² Amaanyi ge ganaalumwanga enjala, N'obuyinike bunaamubangako ng'asejjera.

¹³Bunaalyanga ebitundu by'omubiri gwe, Weewaawo, omubereberye w'okufa anaalyanga ebitundu bye.

¹⁴ Anaasimbulwanga mu weema ye gye yeesiga; Era anaaleetebwanga eri kabaka w'ebitiisa.

¹⁵ Ekitali kikye n'akatono kinaabanga mu weema ye: Ekibiriiti kinaamansirwanga ku kifo mwe yabeeranga,

¹⁶ Ekikolo kye kinaakaliranga ddala wansi, Ne waggulu ettabi lye linaatemebwangawo.

¹⁷ Ekijjukizo kye kinaabulanga ku nsi, So taabenga na linnya mu luguudo.

¹⁸ Anaagoberwanga mu kizikiza okuva mu musana, Era anaayigganyizibwanga okuva mu nsi.

¹⁹ Taabenga na mwana newakubadde omuzzukulu mu bantu be, Newakubadde omuntu yenna asigadde gye yabeeranga.

²⁰ Abanaddangawo baneewuunyanga olunaku lwe, Ng'abo abaasooka bwe baatiisibwa.

²¹ Mazima ennyumba z'atali mutuukirivu bwe zifaanana bwe zityo, Era kino kye kifo ky'oyo atamanyi Katonda.