Read luganda Yobu 20 Bible Online

Yobu 20 - luganda bible

Yobu 20

¹Awo Zofali Omunaamasi n'addamu n'ayogera nti

²Ebirowoozo byange kyebiva binziramu, Olw'okwanguyiriza okuli mu nze.

³Mpulidde okunenya okunswaza, Omwoyo ogw'okutegeera kwange ne gunziramu.

⁴ Ekyo tokimanyi obw'edda, Omuntu kasookedde ateekebwa ku ttaka,

⁵ Ng'okuwangula kw'ababi kwa kuggwaawo mangu, Era ng'essanyu ly'abatamanyi Katonda lya kiseera buseera?

⁶ Obukulu bwe newakubadde nga bulinnya okutuuka mu ggulu, N'omutwe gwe gutuuka mu bire;

⁷ Naye anaabulanga emirembe gyonna ng'empitambi ye ye: Abo abaamulabanga banaayogeranga nti Ali ludda wa?

⁸ Anaavangawo ng'ekirooto, so taalabikenga: Weewaawo, anaagoberwanga ddala ng'okwolesebwa okw'ekiro.

⁹ Eriiso eryamulabanga teriimulabenga nate; So n'ekifo kye tekiimutunuulirenga nate.

¹⁰Abaana be baneegonzanga eri abaavu, N'emikono gye ginaakomyangawo obugagga bwe.

¹¹ Amagumba ge gajjudde obuvubuka bwe, Naye bunaagalamiranga naye mu nfuufu.

¹² Obubi newakubadde nga bumuwoomera mu kamwa ke, Newakubadde ng'abukweka wansi w'olulimi lwe;

¹³Newakubadde ng'abusonyiwa n'ataganya kubuta, Naye ng'akyaguguba nabwo mu kamwa ke;

¹⁴ Naye emmere ye mu byenda bye efuuse, Bwe busagwa bwe mbalasaasa munda ye.

¹⁵Yamira obugagga, era anaabusesemanga nate: Katonda anaabuggyanga mu lubuto lwe.

¹⁶ Anaanuunanga obusagwa bw'embalasaasa: Olulimi lw'omusota lunaamuttanga.

¹⁷ Taatunuulirenga migga, Emigga egikulukuta egy'omubisi gw'enjuki n'omuzigo.

¹⁸Kye yateganira anaakizzanga, so taakimirenga; So taasanyukenga ng'ebintu bwe biri by'afunye.

¹⁹Kubanga yajooga abaavu n'abaleka; Yaggyawo ennyumba olw'amaanyi so taagizimbenga.

²⁰ Kubanga teyamanya kutereera munda ye, Taawonyenga kintu ku ebyo by'asanyukira.

²¹Tewasigala kintu ky'atalya; Omukisa gwe kyegunaavanga gulema okuba ogw'olubeerera.

²²Mu lufulube lw'ebintu bye ebisukkirira anaalabanga ennaku: Omukono gwa buli muntu aliko obuyinike gunaamutuukangako.

²³ Bw'aba ng'anaatera okukkusa olubuto lwe, Katonda anaamusuulangako ekiruyi kye ekingi, Era anaakitonnyesanga ku ye ng'alya.

²⁴ Anaddukanga ekyokulwanyisa eky'ekyuma, N'omutego ogw'ekikomo gunaamufumitanga.

²⁵ Aguggyamu ne guva mu mubiri gwe: Weewaawo, omumwa gwagwo ogumasamasa guva mu mususa gwe; Ebitiisa bimuliko.

²⁶ Ekizikiza kyonna kyaterekerwa ebibye eby'obugagga: Omuliro ogutakumibwa bantu gunaamwokyanga; Gunaamalangawo ebyo ebisigadde mu weema ye.

²⁷Eggulu linaabikkulanga ku butali butuukirivu bwe, N'ensi eneemugolokokerangako.

²⁸Ekyengera eky'omu nnyumba ye kinaavangawo, Ebintu bye binaabuliranga ku lunaku olw'obusungu bwe.

²⁹ Ogwo gwe mugabo gw'omuntu omubi oguva eri Katonda, N'obusika Katonda bwe yamuteekerawo.