Read luganda Yobu 22 Bible Online

Yobu 22 - luganda bible

Yobu 22

¹Awo Erifaazi Omutemani n'addamu n'ayogera nti

² Omuntu ayinza okugasa Katonda? Mazima ow'amagezi yeegasa yekka.

³ Kiriko bwe kisanyusa Omuyinza w'ebintu byonna ggwe okubeera omutuukirivu? Oba kimugasa ggwe okutuukiriza amakubo go?

⁴ Kubanga omutya kyava akunenya, Kyava asala omusango gwo?

⁵Obubi bwo si bungi? So n'obutali butuukirivu bwo tebuliiko gye bukoma.

⁶ Kubanga waggya ku muganda wo emisingo egy'obwereere, N'oyambula abaali obwereere ebyambalo byabwe.

⁷ Tonywesanga mazzi omukoowu, Era wamma omuyala emmere.

⁸Naye ow'amaanyi ye yalya ensi; N'ow'ekitiibwa ye yagibeeramu.

⁹ Wasindika bannamwandu nga tebalina kintu, N'emikono gy'abatalina kitaabwe gyamenyeka.

¹⁰ Obukunizo kyebuva bukwetooloola, N'entiisa gy'otomanyiridde ekweraliikiriza,

¹¹ Oba ekizikiza n'otoyinza kulaba, Amazzi amangi ne gakubikkako.

¹² Katonda tali mu ggulu awagulumizibwa? Era laba emmunyeenye bwe zenkana obugulumivu!

¹³ Naawe oyogera nti Katonda amanyi ki? Ayinza okusala omusango ng'ayima mu kizikiza ekikutte?

¹⁴ Ebire ebiziyivu bimubikkako n'okulaba talaba; Era atambulira mu kwekulungirira kw'eggulu.

¹⁵Oyagala okukwata ekkubo ery'edda Abantu ababi bye baalinnyirangamu?

¹⁶Abaakwakulibwa entuuko zaabwe nga tezinnabaawo, Omusingi gwabwe ne gufukibwa ng'omugga:

¹⁷ Abaagambanga Katonda nti Tuveeko: Era nti Omuyinza w'ebintu byonna ayinza kutukolera ki?

¹⁸ Naye yajjuza ennyumba zaabwe ebirungi: Naye okuteesa kw'ababi kundi wala.

¹⁹ Abatuukirivu bakiraba ne basanyuka; N'ataliiko musango abasekerera nnyo:

²⁰Ng'ayogera nti Mazima abo abaatugolokokerako bamaliddwawo, N'abo abafisseewo omuliro gubookezza.

²¹ Yiga nno obeere n'emirembe: Bw'otyo bw'onoobanga n'ebirungi.

²² Nkwegayiridde, kkiriza amateeka eri akamwa ke, Era tereka ebigambo bye mu mutima gwo.

²³ Bw'onookomangawo eri Omuyinza w'ebintu byonna, onoozimbibwanga; Bw'onoggyangawo obutali butuukirivu okuba ewala n'eweema zo.

²⁴ N'oteeka ebibyo eby'obugagga mu nfuufu, Ne zaabu eya Ofiri mu mayinja ag'omu bugga;

²⁵Kale Omuyinza w'ebintu byonna ye anaabanga obugagga bwo, Era anaabanga ffeeza ya muwendo mungi gy'oli.

²⁶ Kubanga lw'onoosanyukiranga Omuyinza w'ebintu byonna, Era onooyimusanga amaaso go eri Katonda.

²⁷ Onoosabanga okusaba kwo eri ye, naye anaakuwuliranga; Era onoosasulanga obweyamo bwo.

²⁸ Era onoolagiranga ekigambo ne kinywera gy'oli; N'omusana gunaayakiranga amakubo go.

²⁹ Bwe bakusuula, onooyogeranga nti Waliwo okuyimusibwa; Era anaalokolanga eyeetoowaza.

³⁰ Anaawonyanga n'oyo aba taliiko musango: Weewaawo, anaawonyezebwanga olw'obulongoofu bw'engalo zo.