Read luganda Yobu 28 Bible Online

Yobu 28 - luganda bible

Yobu 28

¹Mazima waliwo gye basimira ffeeza, N'ekifo kya zaabu gye balongoosa.

²Ekyuma kiggibwa mu ttaka, N'ekikomo bakisaanuusa okukiggya mu jjinja.

³Abantu babibira ekizikiza, Ne bakenneenya okutuuka ku nsalo ekomererayo Amayinja ag'ekizikiza ekikutte n'ag'ekisiikirize eky'okufa.

⁴Basima obunnya obuli ewala n'abantu we batuula; Beerabirwa ekigere ekiyitawo: Balengejjera wala n'abantu, bawuubibwawuubibwa eruuyi n'eruuyi.

⁵ Ensi ye evaamu emmere: Era wansi evuunikibwa ng'ekivuunikibwa n'omuliro.

⁶Amayinja gaayo kifo kya safiro, Era erina enfuufu eya zaabu.

⁷Ekkubo eryo tewali nnyonyi eyigga erimanyi, So n'amaaso ga kamunyi tegalirabanga.

⁸ Ensolo ezaamalala teziririnnyangamu, So n'empologoma enkambwe teriyitangamu.

⁹ Agolola omukono gwe ku jjinja ery'embaalebaale; Avuunika ensozi okuviira ddala we zisibuka.

¹⁰Atema ensalosalo mu njazi; N'amaaso ge galaba buli kintu eky'omuwendo omungi.

¹¹Asiba emigga gireme okukulukuta; N'ekigambo ekyakisibwa akireeta awalaba.

¹² Naye amagezi ganaalabikanga wa? N'ekifo eky'okutegeera we kubeera kiri ludda wa?

¹³Abantu tebamanyi muwendo gwago; So tegalabika mu nsi ey'abalamu.

¹⁴Obuziba bwogera nti Tegali mu nze: N'ennyanja eyogera nti Tegali we ndi.

¹⁵ Tegafunika lwa zaabu, So ne ffeeza teripimibwa okugagula.

¹⁶ Tegayinzika kwenkanyankanyizibwa ne zaabu eya Ofiri, Ne onuku ey'omuwendo omungi oba safiro.

¹⁷Zaabu n'endabirwamu tebiyinza kugenkana: So n'amakula aga zaabu ennungi tegaabenga buguzi bwago.

¹⁸ Tebaayogerenga ku kolali n'amayinja ag'endabirwamu: Weewaawo, omuwendo ogw'amagezi gusinga amayinja amatwakaavu.

¹⁹ Topazi eriva e Buwesiyopya teriigenkanenga, So tegenkanyankanyizibwenga ne zaabu ennungi.

²⁰Kale amagezi gava wa? N'ekifo okutegeera we kubeera kiri ludda wa?

²¹Kubanga gakwekebwa amaaso g'abalamu bonna, Era gakisibwa ennyonyi ez'omu bbanga.

²²Okuzikirira n'Okufa kwogera nti Twawulira ekigambo kyago n'amatu gaffe.

²³ Katonda ategeera ekkubo lyago, Era ye amanyi ekifo kyago.

²⁴ Kubanga atunuulira okutuuka ku nkomerero z'ensi, Era alaba ebiri wansi w'eggulu lyonna;

²⁵Okukolera empewo ekigera; Weewaawo, apima amazzi n'ekipima.

²⁶ Bwe yateekera enkuba etteeka, N'ekkubo ery'okumyansa okw'okubwatuka:

²⁷Awo n'alyoka agalaba n'agabuulira; Yaganyweza, weewaawo, n'agakenneenyeza ddala.

²⁸ Era n'agamba abantu nti Laba, okutya Mukama okwo ge magezi; N'okuleka obubi kwe kutegeera.