Read luganda Yobu 3 Bible Online

Yobu 3 - luganda bible

Yobu 3

¹Awo Yobu n'alyoka ayasama akamwa n'akolimira olunaku lwe.

²Yobu n'addamu n'ayogera nti

³ Olunaku luzikirire kwe nnazaalirwa, N'ekiro ekyayogera nti Omwana ow'obulenzi ali mu lubuto.

⁴Olunaku olwo lube ekizikiza; Katonda aleme okulutunuulira ng'ayima waggulu, So n'omusana guleme okulwakira.

⁵ Ekizikiza n'ekisiikirize eky'okufa biruyite olw'abyo; Ekire kirutuuleko: Byonna ebiddugaza obudde birutiise.

⁶Ekiro ekyo ekizikiza ekikutte kikinyage: So luleme okusanyukira mu nnaku ez'omu mwaka; Luleme okutuuka mu muwendo gw'emyezi.

⁷Laba, ekiro ekyo kibe kigumba; Luleme okujjirwa eddoboozi ery'essanyu.

⁸ Abo balukolimire abakolimira obudde, Abeeteeseteese okusaggula goonya.

⁹ Emmunyeenye ez'ekiro kyalwo zibeeko ekizikiza: Lunoonye omusana, naye lugubulwe; So terutunuulira bikowe bya nkya:

¹⁰Kubanga terwaggala nzigi za lubuto lwa mmange, So terwakisa maaso gange obuyinike.

¹¹ Kiki ekyandobera okufa okuva mu lubuto? Kiki ekyandobera okuta obulamu bwe nnava mu byenda?

¹² Amaviivi ganzikiririza ki? Oba amabeere, okugayonka?

¹³Kubanga kaakano nandigalamidde ne nsirika; Nandyebase; bwe ntyo bwe nnandiwummudde:

¹⁴ Wamu ne bassekabaka n'abakungu b'ensi, Abeezimbira mu matongo;

¹⁵Oba wamu n'abalangira abaalina ezaabu, Abajjuzanga ennyumba zaabwe effeeza:

¹⁶ Oba ng'omwana omusowole akwekebwa sandibaddewo; Ng'abaana abawere abatalabanga ku musana n'akatono,

¹⁷ Eyo ababi bakoma okuteganya; Era eyo abakoowu gye bawummulira.

¹⁸ Eyo abasibe gye bessiza awamu; Tebawulira ddoboozi lya mukoza.

¹⁹Omuto n'omukulu bali eyo; N'omuddu aba wa ddembe eri mukama we.

²⁰ Alaba obuyinike aweerwa ki omusana? N'obulamu abuweerwa ki oyo alumiddwa omwoyo;

²¹ Abeegomba okufa, naye ne kutajja; Ne bakusima okusinga obugagga obukwekeddwa;

²²Abasanyuka ennyo nnyini, Ne bajaguza, bwe bayinza okulaba entaana?

²³ Omuntu akwekeddwa ekkubo lye aweerwa ki omusana, Era Katonda gw'akomedde olukomera?

²⁴ Kubanga okusinda kwange kujja nga sinnalya, N'okuwuluguma kwange kufukibwa ng'amazzi.

²⁵ Kubanga kye ntidde kinjijako, N'ekyo kye nkankanira kijja gye ndi.

²⁶Sessa so sitereera so siwummula; Naye ennaku zijja.