Read luganda Yobu 32 Bible Online

Yobu 32 - luganda bible

Yobu 32

¹ Awo abasajja abo abasatu ne baleka okuddamu Yobu, kubanga yali mutuukirivu mu maaso ge ye.

² Awo obusungu bwa Eriku, mutabani wa Balakeri Omubuzi, ow'omu kika kya Laamu ne bulyoka bubuubuuka eri Yobu, kubanga yeeyita mutuukirivu so si Katonda.

³ Era obusungu bwe ne bubuubuuka n'eri mikwano gye bonsatule kubanga tebaalaba kya kuddamu, naye ne basalira Yobu okumusinga.

⁴Era Eriku yali alindiridde okwogera ne Yobu, kubanga waaliwo abaamusinga obukulu.

⁵Awo Eriku bwe yalaba nga mu kamwa k'abasajja abo abasatu temuli kya kuddamu, obusungu bwe ne bubuubuuka.

⁶ Awo Eriku mutabani wa Balakeri Omubuzi n'addamu n'ayogera nti Nze ndi muto, nammwe muli bakadde nnyo; Kyennavudde nzibiikiriza ne ssaŋŋanga kubalaga kye ndowooza.

⁷Njogedde nti Ennaku ze zandyogedde, Olufulube lw'emyaka lwandiyigirizza amagezi.

⁸ Naye waliwo omwoyo mu bantu, N'omukka gw'Omuyinza w'ebintu byonna gubawa okutegeera.

⁹ Abakulu si be bagezi, So n'abakadde si be bategeera emisango.

¹⁰Kyenvudde njogera nti Mumpulire; Era nange naalaga kye ndowooza.

¹¹Laba, nnindiridde ebigambo byammwe, Mpulirizza ensonga zammwe, Nga munoonya bye muba mwogera.

¹²Weewaawo, nteze okutu eri mmwe, Era, laba, nga tewali asinze Yobu, Newakubadde azzeemu ebigambo bye ku mmwe.

¹³ Mwekuume muleme okwogera nti Tulabye amagezi; Mpozzi Katonda ayinza okumuwangula, si bantu:

¹⁴Kubanga ebigambo bye tabyolekezza nze; So ssiimuddemu na kwogera kwammwe.

¹⁵Basamaaliridde, tebakyayanukula: Tebalina kigambo kya kwogera.

¹⁶Nange naalindirira, kubanga teboogera, Kubanga bayimirira buyimirizi nga tebakyayanukula?

¹⁷Era nange naayanukula ebyange, Era nange naalaga kye ndowooza.

¹⁸Kubanga njijudde ebigambo; Omwoyo gwange oguli mu nze gumpaliriza.

¹⁹ Laba, olubuto lwange luliŋŋanga omwenge ogutaliiko we gufulumira; Ng'amaliba amaggya lwagala okwabika

²⁰ Naayogera ndyoke mpeereweere; Naayasama emimwa gyange ne nziramu.

²¹ Nkwegayiridde, nneme okusosola mu bantu eri omuntu yenna; So ssiiwe muntu yenna mannya ganyumiikiriza.

²²Kubanga simanyi kuwa mannya ganyumiikiriza; Omutonzi wange yandinziyeewo mangu.