Read luganda Yobu 37 Bible Online

Yobu 37 - luganda bible

Yobu 37

¹Era n'ekyo kikankanya omutima gwange, Ne gunyeenyezebwa okuva mu kifo kyagwo.

²Muwulire okuwuuma kw'eddoboozi lye, N'okududuma okuva mu kamwa ke.

³Akusindika wansi w'eggulu lyonna, N'okumyansa kwe kubuna enkomerero z'ensi.

⁴ Oluvannyuma lwakwo eddoboozi ne liwuluguma; Abwatuka n'eddoboozi ery'obukulu bwe: So tabiziyiza eddoboozi lye bwe liwulirwa.

⁵ Katonda abwatuka kitalo n'eddoboozi lye; Akola ebikulu bye tutayinza kutegeera.

⁶Kubanga agamba omuzira nti Gwa ku nsi; Era bw'atyo bw'agamba oluwandaggirize, N'empandaggirize ez'enkuba ye ey'amaanyi.

⁷ Assa akabonero ku mukono gwa buli muntu; Abantu bonna be yatonda balyoke bakimanye.

⁸ Awo ensolo ne zigenda mu bwekwekero, Ne zibeera mu mpuku zaazo,

⁹ Mu kisenge eky'obukiika obwa ddyo mwe muva omuyaga: Empewo ne ziva mu bukiika obwa kkono.

¹⁰ Omukka gwa Katonda gwe guleeta omuzira: N'amazzi bwe genkana obugazi ne gakwata.

¹¹Weewaawo, ajjuza ekire ekiziyivu amazzi; Abamba ekire eky'enjota ze:

¹² Era okuluŋŋamya kwe kwe kukikyusakyusa eruuyi n'eruuyi, Bikolenga byonna by'abiragira Kungulu ku nsi yonna okubeereka:

¹³ Oba nga kya kubuulirira, oba nga kya nsi ye, Oba nga kya kusaasira, kyava akireeta.

¹⁴Ekyo kiwulire, ggwe Yobu: Yimirira buyimirizi, olowooze ebikolwa bya Katonda eby'ekitalo.

¹⁵Omanyi Katonda bw'abikuutira, N'ayasa enjota ez'omu kire kye?

¹⁶ Omanyi okutereezebwa kw'ebire, Ebikolwa eby'ekitalo eby'oyo eyatuukirira mu kumanya?

¹⁷Ebyambalo byo bwe bibuguma, Ensi ng'esirise olw'embuyaga ez'obukiika obwa ddyo?

¹⁸ Oyinza okubambira eggulu awamu naye, Amaanyi gaalyo genkana endabirwamu ensaanuuse?

¹⁹ Tuyigirize bye tuba tumugamba; Kubanga tetuyinza kuliraanya kwogera kwaffe olw'ekizikiza.

²⁰Anaabuulirwa nga njagala okwogera? Oba omuntu yandyagadde okumirwa?

²¹Era kaakano abantu tebalaba musana ogumasamasa mu ggulu: Naye embuyaga ne ziyita ne ziryerula.

²² Mu bukiika obwa kkono mwe muva okuyakaayakana okuli nga zaabu: Katonda ayambadde ekitiibwa ekikanga.

²³ Omuyinza w'ebintu byonna tetuyinza kumunoonya; asinga bonna obuyinza: Era mu musango ne mu butuukirivu obusukkirivu talibonyabonya.

²⁴ Abantu kyebava bamutya: Tabassaako mwoyo abo bonna abalina emitima egy'amagezi.