Read luganda Yobu 39 Bible Online

Yobu 39 - luganda bible

Yobu 39

¹ Omanyi ebiro embulabuzi ez'oku njazi mwe zizaalira? Oba oyinza okutegeera empewo bwe ziba n'amawako?

²Oyinza okubala emyezi gye zimala? Oba omanyi ebiro mwe zizaalira?

³Zikutama, zizaala abaana baazo, Zeggyamu obubalagaze bwazo.

⁴Abaana baazo bagejja, bakulira ebweru ku ttale; Bafuluma ne batadda.

⁵ Ani eyata entulege okuba ey'eddembe? Oba ani eyasumulula enkoba ez'entulege?

⁶ Nafuula ensiko okuba ennyumba yaayo, N'ensi ey'omunnyo okuba ekifo w'ebeera.

⁷ Enyooma oluyoogaano olw'omu kibuga, So tewulira kuleekaana kwa mugobi.

⁸Ensozi bwe zenkana obugazi lye ddundiro lyayo, Era enoonya buli kintu ekibisi.

⁹ Embogo enekkirizanga okukuweereza? Oba eneebeeranga awali ekisibo kyo?

¹⁰Oyinza okusiba embogo n'olukoba lwayo ku kibibi? Oba eneerimanga ebiwonvu ng'ekuvaako ennyuma?

¹¹Onoogyesiganga kubanga amaanyi gaayo mangi? Oba onoogirekeranga omulimu gwo?

¹²Onoogyesiganga okukomyawo ewuwo ensigo zo, N'okukuŋŋaanyanga eŋŋaano ey'omu gguuliro lyo?

¹³Ekiwaawaatiro kya maaya kisanyuka; Naye ebiwaawaatiro bye n'ebyoya birina ekisa?

¹⁴Kubanga aleka amagi ge ku ttaka, N'egabugumya mu musenyu,

¹⁵Ne yeerabira ng'ekigere kiyinza okugabetenta, Oba ensolo ey'omu nsiko eyinza okugalinnyirira.

¹⁶ Akakanyalira abaana be ng'abatali babe: Newakubadde ng'ateganira bwereere talina kutya;

¹⁷ Kubanga Katonda yamuggyako amagezi, So tamuwadde kutegeera.

¹⁸Bw'aba nga yeegulumizizza, Anyooma embalaasi n'oyo agyebagala.

¹⁹Wawa embalaasi amaanyi gaayo? Wayambaza obulago bwayo n'olugiŋŋirima olukankana?

²⁰ Wagibuusa ng'enzige? Ekitiibwa ky'okufugula kwayo kya ntiisa.

²¹Etakulira mu kiwonvu, n'esanyukira amaanyi gaayo: Efuluma okusisinkana n'abasajja abakutte ebyokulwanyisa.

²²Esekerera okutya so tekeŋŋentererwa; So tedda nnyuma awali ekitala.

²³Omufuko guwulungutira ku yo, Effumu erimasamasa n'akasaale.

²⁴ Emira ettaka n'obusungu n'ekiruyi; So tekkiriza nga lye ddoboozi ery'ekkondeere.

²⁵Ekkondeere buli lwe livuga, n'eyogera nti Bw'otyo! N'ekonga olutalo nga lukyali wala, Okubwatuka kw'abaami n'okuleekaana.

²⁶Magga atumbiira na magezi go, N'abamba abiwaawaatiro bye eri obukiika obwa ddyo?

²⁷ Empungu erinnya na kiragiro kyo, N'ekola ekisu kyayo waggulu?

²⁸Ebeera ku jjinja, n'ennyumba yaayo eri okwo, Ku linnyo ly'ejjinja n'ekifo eky'amaanyi.

²⁹Erengera omuyiggo ng'eyima okwo; Amaaso gaayo gagulaba nga guli wala.

³⁰ Era n'abaana baayo banuuna omusaayi: Era awaba emirambo, gy'ebeera eyo.