Read luganda Yobu 40 Bible Online

Yobu 40 - luganda bible

Yobu 40

¹Era nate Mukama n'addamu Yobu n'ayogera nti

² Aleeta ensonga ezitaliimu anaayombesa Omuyinza w'ebintu byonna? Awakanya Katonda akiwoze.

³Awo Yobu n'alyoka addamu Mukama n'ayogera nti

⁴ Laba, siriimu ka buntu; n'akuddamu ntya? Nteeka omukono gwange ku kamwa kange.

⁵ Njogedde omulundi gumu, so ssiddemu; Weewaawo, emirundi ebiri, naye sseeyongere nate.

⁶Awo Mukama n'addamu Yobu ng'ayima mu mbuyaga ez'akazimu n'ayogera nti

⁷ Weesibe nno ekimyu ng'omusajja: Naakubuuza, naawe onziremu.

⁸ N'okujjulula onojjulula omusango gwe nsala? Ggwe ononsalira nze omusango obeere n'obutuukirivu?

⁹ Oba olina omukono nga Katonda? Era oyinza okubwatuka n'eddoboozi erifaanana erirye?

¹⁰ Weeyonje nno n'okuwooma n'okutiibwa; Yambala ekitiibwa n'obukulu.

¹¹ Fuka obusungu bwo obusukkiridde: Otunuulire buli muntu ow'amalala omujeeze.

¹² Tunuulira buli muntu ow'amalala omukkakkanye; Olinnyirire ababi we bayimirira.

¹³ Bakise wamu mu nfuufu; Siba amaaso gaabwe mu kifo ekikisibwa.

¹⁴ Kale nange ne ndyoka nzikiriza ku ggwe Ng'omukono gwo gwe guyinza okukulokola.

¹⁵Laba nno envubu gye nnatondera awamu naawe; Erya omuddo ng'ente.

¹⁶Laba nno amaanyi gaayo gali mu kiwato kyayo, N'amawaggali gaayo gali mu binywa eby'omu lubuto lwayo.

¹⁷Yeesagga omukira ng'omuvule: Ebinywa eby'omu kiwato kyayo byegatta wamu.

¹⁸Amagumba gaayo galiŋŋanga enseke ez'ebikomo; Amagulu gaayo galiŋŋanga ebyuma ebisiba.

¹⁹Ye ekulira amakubo ga Katonda: Ye yekka eyagitonda ayinza okugisembereza ekitala kye.

²⁰ Mazima ensozi zigizaalira ebyokulya; Ensolo zonna ez'omu nsiko we zizannyira.

²¹ Egalamira wansi w'ebisiikirize by'emiti, Mu bwekwekero obw'omu ndago ne mu bitosi.

²²Ebisiikirize by'emiti bigibikkako; Emyerebu egy'omu bugga gigyetooloola.

²³Laba, omugga bwe gwanjaala, tekankana: Eguma omwoyo Yoludaani newakubadde nga gujjula ne gutuuka ku kamwa kaayo.

²⁴Waliwo anaagikwata bw'eba ng'etunula, Oba anaawummula ennyindo zaayo n'ekyambika?