Read luganda Yobu 41 Bible Online

Yobu 41 - luganda bible

Yobu 41

¹ Oyinza okuggyangamu egoonya n'eddobo? Oba okunyigirizanga olulimi lwayo n'omugwa?

² Oyinza okuyingizanga omugwa mu nnyindo zaayo? Oba okuwummulanga oluba lwayo n'eddobo?

³Eneekwegayiriranga ebigambo bingi? Oba eneekugambanga ebigambo ebigonvu?

⁴ Eneeragaananga endagaano naawe, Ogitwalenga okuba omuddu emirembe gyonna?

⁵Onoozannyanga nayo nga bw'ozannya n'ennyonyi? Oba onoogisibiranga abawala bo?

⁶Ebibiina eby'abavubi binaagifuulanga obuguzi? Banaagigabaniranga mu basuubuzi?

⁷Oyinza okujjuzanga eddiba lyayo ebyuma ebiriko amalobo, Oba omutwe gwayo emiwunda egiswaga ebyennyanja?

⁸Giteekeko omukono gwo; Jjukira olutalo olemenga okweyongera okukola bw'otyo.

⁹Laba, essuubi lyayo lya bwereere: Omuntu taakeŋŋentererwenga bw'agiraba obulabi?

¹⁰Tewali mukambwe bw'atyo n'okwaŋŋanga n'ayaŋŋanga okugisaggula: Kale aluwa oyo ayinza okuyimirira mu maaso gange?

¹¹ Ani eyasooka okumpa, nze mmusasule? Byonna ebiri wansi w'eggulu lyonna byange.

¹²Siisirike olw'amagulu gaayo, Newakubadde amaanyi gaayo amangi, newakubadde okugattibwa kwayo okulungi.

¹³Ani ayinza okugyambula ekyambalo kyayo eky'okungulu? Ani anaatuuka munda w'enkoba zaayo ebbiri?

¹⁴Ani ayinza okuggulawo enzigi ez'amaaso gaayo? Entiisa yeetoolodde amannyo gaayo.

¹⁵Amagamba gaayo ag'amaanyi ge malala gaayo, Nga gasibaganye ng'akabonero bwe kanyweza.

¹⁶Erimu lyegatta n'ery'okubiri bwe lityo N'okuyinza empewo ne zitayinza kuyita wakati waago.

¹⁷Geegasse gokka na gokka; Gakwatagana ne gatayinzika kwawulibwa.

¹⁸Okwasimula kwayo kumyansaamu omusana, N'amaaso gaayo gafaanana ebikowe eby'enkya.

¹⁹Mu kamwa kaayo muva emimuli egyaka, N'ensasi ez'omuliro zibuuka okuvaamu.

²⁰Mu nnyindo zaayo muva omukka, Ng'ogw'entamu etokota n'ogw'ebitoogo ebiggya.

²¹Omukka gwayo gwasa amanda, Era omuliro guva mu kamwa kaayo.

²²Mu nsingo yaayo mubeera amaanyi, N'entiisa ezinira mu maaso gaayo.

²³Emiwula gy'ennyama yaayo gyegasse: Ginywerera ku yo: tegiyinza kusagaasagana.

²⁴Omutima gwayo guguma ng'ejjinja; Weewaawo, guguma ng'olubengo.

²⁵Bw'eyimuka ab'amaanyi batya: Olw'okwekanga nga baliko eddalu.

²⁶Bwe bagisimbako ekitala, tekiriiko kye kiyinza kukola; Newakubadde effumu newakubadde omuwunda newakubadde akasaale akasongovu.

²⁷Ebyuma ebiyita bisasiro, N'ebikomo miti mivundu.

²⁸Akasaale tekayinza kugiddusa: Amayinja agavuumuulibwa gafuuka ebiti eri yo.

²⁹Endoddo ziyitibwa ng'ebiti: Esekerera okuwulukuka kw'akasaale.

³⁰ Ebitundu byayo ebya wansi biriŋŋanga engyo eziriko obwogi: Eteeka ng'eggaali ewuula ku bitosi.

³¹Etokosa ennyanja ng'entamu: Efaananya ennyanja amafuta.

³²Emasamasisa ekkubo ennyuma waayo; Obuziba wandibulowoozezza okuba n'envi.

³³Tewali ekigyenkana ku nsi, Ekolebwa obutabaamu kutya.

³⁴Etunuulira buli kintu ekigulumivu: Ye kabaka w'abaana bonna ab'amalala.