Read luganda Yobu 5 Bible Online

Yobu 5 - luganda bible

Yobu 5

¹ Koowoola nno; waliwo anaakuyitaba? Era ani ku batukuvu gw'onookyukira?

²Kubanga okweraliikirira kutta omusirusiru, N'obuggya butta atalina magezi.

³ Nalaba omusirusiru ng'asimba emmizi: Naye amangu ago ne nkolimira ekifo ky'abeeramu.

⁴ Abaana be baba wala n'emirembe, Era babetentebwa mu mulyango, So tewali wa kubawonya.

⁵Omwaka gwabwe omuyala agulya, N'aguggya ne mu maggwa, N'omutego guwankirawankira ebintu byabwe.

⁶Kubanga okulaba ennaku tekuva mu nfuufu, So n'obuyinike tebuva mu ttaka;

⁷ Naye abantu bazaalirwa obuyinike, Ng'ensasi bwe zibuuka waggulu.

⁸Naye nze, njagala okunoonya Katonda, Era njagala okulekera Katonda ensonga yange:

⁹ Akola ebikulu ebitanoonyezeka; Eby'ekitalo ebitabalika:

¹⁰ Atonnyesa enkuba ku nsi, N'asindika amazzi ku nnimiro:

¹¹ Awo n'agulumiza abo abatoowazibwa; N'abo abali mu nnaku ne basitulibwa ne baba mirembe.

¹² Atta enkwe ez'abagerengetanya, Emikono gyabwe ne gitayinza kutuukiriza bye batandise.

¹³ Akwasa abagezi olukwe lwabwe bo: N'okuteesa kw'ab'ekyejo kumenyekera ddala.

¹⁴ Baba n'ekizikiza emisana, Era bawammanta mu ttuntu nga kiro.

¹⁵Naye alokola mu kitala eky'akamwa kaabwe, Alokola eyeetaaga mu mukono gw'ow'amaanyi.

¹⁶ Kale omwavu n'aba n'okusuubira, Obutali butuukirivu ne buziba akamwa kaabwo.

¹⁷ Laba, aweereddwa omukisa omuntu Katonda gw'akangavvula: Kale tonyooma kubuulirira kw'Omuyinza w'ebintu byonna.

¹⁸ Kubanga ye alumya, era ye anyiga; Ye afumita era engalo ze ze ziwonya.

¹⁹ Anaakuwonyanga mu buyinike omukaaga; Weewaawo, mu musanvu tewaabenga bubi obunaakukomangako.

²⁰ Mu njala anaakununulanga obutafa; Ne mu ntalo anaakuwonyanga mu maanyi g'ekitala.

²¹ Onookwekebwanga awali okubambula kw'olulimi; So tootyenga kuzikirira bwe kunajjanga.

²² Onoosekereranga okuzikirira n'enjala; So tootyenga nsolo za ku nsi.

²³Kubanga onoolagaananga endagaano n'amayinja ag'omu ttale; N'ensolo ez'omu nsiko zinaabanga n'emirembe gy'oli.

²⁴ Era onoomanyanga ng'eweema yo eri mirembe; Era onoolambulanga ekisibo kyo n'otobulwa kintu.

²⁵ Era onoomanyanga ng'ezzadde lyo linaabanga kkulu. N'enda yo ng'omuddo ogw'ettale.

²⁶Olituuka mu ntaana yo ng'owezezza emyaka mmingi. Ng'ekinywa ky'eŋŋaano bwe kijja mu ntuuko zaakyo.

²⁷ Laba, ekyo twakikenneenya, bwe kiri bwe kityo. Kiwulire okimanye olyoke obeere bulungi.