Read luganda Yobu 6 Bible Online

Yobu 6 - luganda bible

Yobu 6

¹Awo Yobu n'addamu n'ayogera nti

²Singa okweraliikirira kwange kupimiddwa, N'ennaku zange singa ziteekeddwa mu minzaani wamu!

³Kubanga kaakano zandisinze obuzito omusenyu ogw'ennyanja: Ebigambo byange kye bivudde bibeera eby'okwanguyiriza.

⁴ Kubanga obusaale bw'Omuyinza w'ebintu byonna buli munda yange, N'obusagwa bwabwo omwoyo gwange gubunywa: Eby'entiisa ebya Katonda bisimba ennyiriri okulwana nange.

⁵Entulege ekaaba bw'eba n'omuddo? Oba ente eŋooŋa awali emmere yaayo?

⁶Ekitaliimu nsa kiriika awatali munnyo? Oba olububi lw'eggi luliko bwe luwooma?

⁷Emmeeme yange egaana okubikomako; Biriŋŋanga ebyokulya eby'omuzizo gye ndi.

⁸Singa nnyinza okuweebwa kye nsaba; Katonda singa ampadde kye nneegomba!

⁹ Katonda singa asiimye okumbetenta; Singa ayanjuluzza engalo ze n'ammalawo!

¹⁰ Kale bwe nnandibadde n'okusanyusibwa nga mmaze Weewaawo, nandijaguzizza olw'okulumwa awatali kusaasirwa: Kubanga sigaananga bigambo bya Mutukuvu.

¹¹Amaanyi gange kye ki, nnindirire? N'enkomerero yange kye ki, ngumiikirize?

¹²Amaanyi gange maanyi ga mayinja? Oba omubiri gwange gwa kikomo?

¹³ Si kubanga sirina kinnyamba mu nze? N'okukola okw'amaanyi kugobeddwa ddala gye ndi?

¹⁴ Ayagala okuzirika agwana mukwano gwe okumukola eby'ekisa; Era n'oyo aleka okutya Omuyinza w'ebintu byonna.

¹⁵ Baganda bange balimbyerimbye ng'akagga, Ng'olusalosalo lw'obugga oluggwaawo:

¹⁶Obuddugala olw'amazzi agakutte, Era omuzira mwe gwekweka:

¹⁷Buli lwe bubuguma, ne bubula: Ebbugumu bwe libaawo, bumalibwawo okuva mu kifo kyabwo.

¹⁸ Essafaali ezitambula ku mabbali gaabwo ne zikyama; Bambuka mu ddungu ne bazikirira.

¹⁹ Essafaali z'e Tema zaatunula, Ebibiina eby'e Seeba byabulindirira.

²⁰ Baakwatibwa ensonyi kubanga baasuubira; Bajja eyo ne baswazibwa.

²¹Kubanga kaakano temuliiko kye muli; Mulaba ekitiisa ne mutya.

²²Nali mbagambye nti Mpa? Oba nti Muweeyo ku bintu byammwe ekirabo ku lwange?

²³Oba nti Mumponye mu mukono gw'omulabe? Oba nti Munnunule mu mukono gw'abajoozi?

²⁴Munjigirize nange naasirika: Era muntegeeze bwe kiri kye nnasobya.

²⁵Ebigambo eby'obugolokofu nga bya maanyi! Naye okuwakana kwammwe kunenya ki?

²⁶ Mulowooza okunenya ebigambo? Kubanga okwogera kw'oyo atalina ssuubi biriŋŋanga empewo.

²⁷ Weewaawo, mwandikubidde obululu atalina kitaawe, Ne mukwano gwammwe mwandimuviisizzaamu amagoba.

²⁸Kale nno mukkirize okuntunuulira; Kubanga mazima sijja kulimba mu maaso gammwe.

²⁹Muddeeyo, mbeegayiridde, waleme okubaawo ebitali bya nsonga; Weewaawo, muddeeyo nate, ensonga yange nnungi.

³⁰Ku lulimi lwange kuliko ebitali bya nsonga? Amatama gange tegayinza kwawula bigambo ebireeta akabi?