Read luganda Yobu 8 Bible Online

Yobu 8 - luganda bible

Yobu 8

¹Awo Birudaadi Omusuki n'addamu n'ayogera nti

² Olituusa wa okwogera ebyo? Era ebigambo eby'omu kamwa ko birituusa wa okuba ng'empewo ey'amaanyi?

³ Katonda anyoola omusango? Oba Omuyinza w'ebintu byonna anyoola ensonga?

⁴ Abaana bo oba nga baamwonoona, Ye n'abagabula mu mukono gw'okusobya kwabwe:

⁵ Bw'onokkiriza okunoonyeza ddala Katonda, Ne weegayirira Omuyinza w'ebintu byonna;

⁶ Singa obadde mulongoofu era wa mazima; Teyandiremye nno okukuzuukukira, N'awa omukisa ekifo omubeera obutuukirivu bwo.

⁷ Okusooka kwo newakubadde nga kwali kutono, Naye enkomerero yo ey'oluvannyuma yandyeyongedde nnyo.

⁸ Kubanga buuza ab'emirembe egyasooka, nkwegayiridde, Okenneenye ebyo bajjajjaabwe bye baanoonyeza ddala:

⁹(Kubanga tuli ba jjo, so tetuliiko kye tumanyi, Kubanga ennaku zaffe ze tumala ku nsi kisiikirize:)

¹⁰Bo tebalikuyigiriza ne bakubuulira, Ne boogera ebigambo ebiva mu mutima gwabwe?

¹¹ Ekitoogo kiyinza okukula awatali bitosi? Olulago luyinza okumera awatali mazzi?

¹²Nga lukyali lubisi nga terunnatemebwa. Luwotoka okusooka omuddo omulala gwonna.

¹³ Bwe gatyo bwe gabeera amakubo ga bonna abeerabira Katonda; N'essuubi ly'oyo atatya Katonda binaabulanga:

¹⁴ Obwesige bwe bunaakutukanga, N'ekyo kye yeesiga ngoye za nnabbubi.

¹⁵ Aneesigamanga ku nnyumba ye, naye teeyimirirenga: Anaaginywererangako, naye teegumenga.

¹⁶ Ayerera mu maaso g'enjuba, N'amalagala ge galanda okubuna olusuku lwe.

¹⁷Emmizi gye gikwata ku kifunvu, Alaba ekifo eky'amayinja.

¹⁸ Bw'anaazikirizibwanga okuva mu kifo kye, Awo kinaamwegaananga nga kyogera nti Sikulabangako.

¹⁹Laba, eryo lye ssanyu ery'ekkubo lye, N'abalala baliroka okuva mu ttaka.

²⁰Laba, Katonda taasuulenga muntu eyatuukirira, So taawanirirenga abo abakola obubi.

²¹ Bw'alimala alijjuza akamwa ko enseko, N'emimwa gyo okwogerera waggulu.

²² Abakukyawa balyambala ensonyi; N'eweema ey'ababi teribaawo nate.