Read luganda Yobu 9 Bible Online

Yobu 9 - luganda bible

Yobu 9

¹Awo Yobu n'addamu n'ayogera nti

² Mazima mmanyi nga bwe kiri bwe kityo: Naye omuntu ayinza atya okuba n'obutuukirivu eri Katonda?

³ Bw'aba nga ayagadde okuwakana naye, Tayinza kumuddamu kigambo na kimu mu lukumi.

⁴ Omutima gwe gwa magezi, era amaanyi ge mangi: Ani eyali yeekakanyazizza eri ye n'alaba omukisa?

⁵Ajjulula ensozi ne zitamanya, Bw'azivuunisa obusungu bwe.

⁶ Anyeenya ensi okuva mu kifo kyayo, Empagi zaayo ne zikankana.

⁷Alagira enjuba n'etevaayo; Era ateekako akabonero ku mmunyeenye.

⁸ Abamba eggulu yekka, Era alinnyirira amayengo ag'ennyanja.

⁹ Akola Nabaliyo, Entungalugoye, ne Kakaaga, N'ebisenge eby'obukiika obwa ddyo.

¹⁰Akola ebikulu ebitanoonyezeka; Weewaawo, eby'ekitalo ebitabalika.

¹¹ Laba, ampitako, ne ssimulaba: Era yeeyongerayo mu maaso, naye ne ssimutegeera.

¹² Laba, akwata omuyiggo, ani ayinza okumuziyiza? Ani anaamugamba nti Okola ki?

¹³ Katonda taggyengawo busungu bwe; Ababeezi ba Lakabu bakutama wansi we.

¹⁴Nze sirisinga nnyo obutamuddamu, Ne nneeroboza ebigambo byange mpakane naye?

¹⁵ Gwe sandizzeemu newakubadde nga ndi mutuukirivu; Nandyegayiridde omulabe wange.

¹⁶Singa nkoowodde naye ng'ajitabye; Era naye sandikkirizza ng'awulidde eddoboozi lyange.

¹⁷ Kubanga ammenya ne kibuyaga, Era ayongera ebiwundu byange okunnanga obwereere.

¹⁸Taŋŋanyenga kussa mukka, Naye anjijuza obubalagaze.

¹⁹ Bwe twogera ku maanyi ag'omuyinza, laba, nga waali! Bwe twogera ku kusala omusango, ani ananteekerawo ekiseera?

²⁰ Newakubadde nga ndi mutuukirivu, akamwa kange nze ke kanansalira omusango okunsinga: Newakubadde nga natuukirira, kanantegeeza okuba omukyamu.

²¹ Nze ndi muntu eyatuukirira; seerowooza nzekka; Nnyooma obulamu bwange.

²² Bwonna bwe bumu; kyenva njogera nti Azikiriza oyo eyatuukirira n'omubi.

²³Ekibonyoobonyo bwe kitta amangu ago, Alikudaalira okusalirwa omusango okw'abataliiko kabi.

²⁴ Ensi eweereddwayo mu mukono gw'omubi: Abikka ku maaso g'abalamuzi baayo; Oba nga si ye, kale ye ani?

²⁵ Ennaku zange nno ziwulukuka mangu okusinga omubaka: Zidduka, teziriiko bulungi bwe ziraba.

²⁶ Ziyise ng'amaato agatambula embiro: Ng'empungu ekka ku muyiggo.

²⁷ Bwe njogera nti Nneerabira okwemulugunya kwange, Naasanyusa amaaso gange aganakuwadde ne ŋŋumya omwoyo:

²⁸ Awo nga ntidde obuyinike bwange bwonna, Mmanyi nga tolimpita ataliiko musango.

²⁹Omusango gulinsinga; Kale kiki ekinteganyisa obwereere?

³⁰ Bwe nnaaba amazzi ag'omuzira, Engalo zange newakubadde nga nzitukuza ntya;

³¹Era naye olinsuula mu lusalosalo, N'engoye zange nze zirintamwa.

³²Kubanga ye si muntu nga nze bwe ndi, nze okumuddamu, Ffe okulabagana okuwoza omusango.

³³ Tewali mulamuzi ali wakati waffe, Eyandiyinzizza okuteeka omukono gwe ku ffe ffembi.

³⁴ Anziyeeko omuggo gwe, So entiisa ye ereme okunkanga:

³⁵Kale bwe nnandyogedde ne simutya: Kubanga si bwe ntyo bwe ndi nze nzekka.