Read luganda Zabbuli 102 Bible Online

Zabbuli 102 - luganda bible

Zabbuli 102

¹Okusaba kw'oyo aliko obuyinike, nga bwagala okumutta, n'afuka okwemulugunya kwe mu maaso ga Mukama. Wulira okusaba kwange, ai Mukama, Okukaaba kwange kutuuke gy'oli.

²Tonkisa maaso go ku lunaku olw'okunakuwala kwange: Otege okutu kwo we ndi; Ku lunaku lwe nkoowoolerako ompitabe mangu.

³ Kubanga ennaku zange ziggwaawo ng'omukka, N'amagumba gange gookebwa ng'omumuli.

⁴ Omutima gwange gwokeddwa, guwotose ng'omuddo; Kubanga neerabira okulya emmere yange.

⁵ Olw'eddoboozi eryokusinda kwange Amagumba gange geegasse n'omubiri gwange.

⁶ Nninga kimbala ow'omu ddungu; Nfuuse ng'ekiwuugulu eky'omu nsiko.

⁷Ntunula, era nfuuse Ng'enkazaluggya etuula ku kitikkiro yokka.

⁸ Abalabe bange bazibya obudde okunvuma; Abandalukidde bandayira.

⁹ Kubanga ndidde evvu ng'omugaati, Era ntabudde kye nnywedde n'amaziga.

¹⁰Olw'okunyiiga kwo n'obusungu bwo: Kubanga wannonda n'onsuula.

¹¹ Ennaku zange ziri ng'ekisiikirize ekiggwaawo; Era mpotose ng'omuddo.

¹² Naye ggwe, ai Mukama, onoobeereranga ennaku zonna: N'ekijjukizo kyo okutuusa emirembe gyonna.

¹³ Oligolokoka, olisaasira Sayuuni: Kubanga obudde butuuse okumusaasira, Weewaawo, obudde obwalagirwa butuuse.

¹⁴ Kubanga abaddu bo basanyukira amayinja ge, Era basaasira enfuufu ye.

¹⁵ Bwe gatyo amawanga gonna galitya erinnya lya Mukama, Ne bakabaka bonna ab'ensi balitya ekitiibwa kyo:

¹⁶ Kubanga Mukama azimbidde ddala Sayuuni, Alabikidde mu kitiibwa kye;

¹⁷Olowoozezza okusaba kw'abo abafiiriddwa, So tanyoomye kusaba kwabwe.

¹⁸ Ekyo kiriwandiikirwa emirembe egirijja: N'eggwanga eriritondebwa liritendereza Mukama.

¹⁹ Kubanga atunuulidde wansi ng'ayima ku watukuvu we awagulumivu; Mukama yalaba ensi ng'ayima mu ggulu;

²⁰ Okuwulira okusinda kw'omusibe; Okusumulula abo abateekerwawo okufa;

²¹ Abantu balyoke batenderenga erinnya lya Mukama mu Sayuuni, N'ettendo lye mu Yerusaalemi;

²² Amawanga bwe galikuŋŋaana awamu, N'amatwale, okuweereza Mukama.

²³ Yakendeeza ku maanyi gange mu kkubo; Yasala ku nnaku zange.

²⁴ Ne njogera nti Ai Katonda wange, tontwalira ddala ng'ennaku zange tezinnaggwaawo: Emyaka gyo gibeerera emirembe gyonna.

²⁵ Edda n'edda watandika ensi; N'eggulu gwe mulimu gw'emikono gyo.

²⁶ Ebyo biriggwaawo, naye ggwe onoobeereranga: Weewaawo, ebyo byonna birikaddiwa ng'ekyambalo; Olibiwaanyisa ng'ekyambalo, n'ebyo biriwaanyisibwa:

²⁷ Naye ggwe oba bumu, N'emyaka gyo tegirikoma.

²⁸ Abaana b'abaddu bo banaabeerangawo. N'ezzadde lyabwe linaanywezebwanga mu maaso go.