Read luganda Zabbuli 104 Bible Online

Zabbuli 104 - luganda bible

Zabbuli 104

¹ Weebaze Mukama, ggwe emmeeme yange. Ai Mukama Katonda wange, oli mukulu nnyo; Oyambadde ekitiibwa n'obukulu.

² Eyeebikka omusana ng'ekyambalo; Atimba eggulu ng'eggigi:

³ Asimba empagi ez'enju ze mu mazzi; Afuula ebire eggaali lye; Atambulira ku biwaawaatiro by'empewo:

⁴ Afuula ababaka be empewo; N'abaweereza be omuliro ogwaka:

⁵ Eyasimba emisingi gy'ensi, Ereme okusagaasagananga emirembe gyonna.

⁶ Wagibikkako ennyanja ng'ekyambalo; Amazzi ne gayimirira waggulu w'ensozi.

⁷ Ggwe bwe wanenya ne gadduka; Eddoboozi ery'okubwatuka kwo bwe lyawulirwa ne ganguwa okugenda;

⁸ Gaalinnya ku nsozi, gaaserengetera mu biwonvu, Ne gatuuka mu kifo kye wagateekerawo.

⁹ Wagalagira ensalo gye gatayinza kusukkako; Galeme okudda nate okubikka ku nsi.

¹⁰Aleeta enzizi mu biwonvu; Zikulukuta mu nsozi:

¹¹Zinywesa ensolo zonna ez'omu nsiko; Entulege ziwona ennyonta.

¹²Ennyonyi ez'omu ggulu kwe zituula ku ezo, Ziyimbira mu matabi.

¹³ Afukirira amazzi ensozi ng'ayima mu nju ze: Ensi n'ekkuta ebibala eby'emirimu gyo.

¹⁴ Amereza ente essubi, N'omuddo okuweereza abantu; Balyoke baggyenga emmere mu ttaka;

¹⁵ N'omwenge ogusanyusa omutima gw'abantu, N'amafuta ganyirizenga amaaso ge, N'emmere ewa omuntu amaanyi omutima gwe.

¹⁶ Emiti gya Mukama gikkuta; Emivule gya Lebanooni gye yasimba;

¹⁷Ennyonyi gye zikoleramu ebisu byazo: Kasida, emiberoosi ye nnyumba ye.

¹⁸ Ensozi empanvu ziba za mbulabuzi; Amayinja kye kiddukiro ky'obumyu.

¹⁹ Yateekerawo omwezi ebiro: Enjuba emanyi okugwa kwayo.

²⁰ Ggwe oleeta ekizikiza, ekiro ne kibaawo; Ensolo zonna ez'omu kibira mwe zifulumira nga zisooba.

²¹ Empologoma ento zivuumira gye zinaalya, Era zinoonya emmere yaazo eri Katonda.

²²Enjuba n'evaayo, ne zigenda, Ne zeebaka mu mpuku zaazo.

²³ Abantu ne bagenda ku mulimu gwabwe N'okutegana kwabwe okutuusa akawungeezi.

²⁴ Ai Mukama, emirimu gyo nga gya ngeri nnyingi! Wagikola gyonna mu magezi: Ensi ejjudde obugagga bwo.

²⁵Ennyanja eri, ennene engazi, Omuli ebyewalula ebitabalikika, Ebisolo ebitono era n'ebinene.

²⁶ Eri amaato gye gayitako; Lukwata mwali, gwe wakola okuzannyira omwo.

²⁷ Ebyo byonna bikulindirira ggwe, Obiwe emmere yaabyo mu ntuuko zaayo.

²⁸ Gy'obiwa gye bikuŋŋaanya; Oyanjuluza engalo, ne bikkuta ebirungi.

²⁹ Okisa amaaso go, ne byeraliikirira; Obiggyamu omukka gwabyo, ne bifa, Ne bidda mu nfuufu yaabyo.

³⁰ Otuma omwoyo gwo, ne bitondebwa; Era ofuula obuggya amaaso g'ettaka.

³¹ Ekitiibwa kya Mukama kibeere kya kubeerera; Mukama asanyukire emirimu gye:

³² Atunuulira ensi, n'ekankana; Akwata ku nsozi, ne zinyooka.

³³ Naayimbiranga Mukama nga nkyali mulamu: Naayimbanga okutendereza Katonda wange nga nkyaliwo.

³⁴Okulowooza kwange kumuwoomerenga: Naasanyukiranga Mukama.

³⁵ Ababi bazikirire baggweewo kunsi, Aboonoonye baleme okubeerawo nate. Weebaze Mukama, ggwe emmeeme yange. Mumutendereze Mukama.