Read luganda Zabbuli 106 Bible Online

Zabbuli 106 - luganda bible

Zabbuli 106

¹ Mumutendereze Mukama. Kale mumwebaze Mukama; kubanga mulungi: Kubanga okusaasira kwe kubeerera emirembe gyonna.

²Ani ayinza okwatula ebikolwa eby'amaanyi ebya Mukama, Oba okwolesa ettendo lye lyonna?

³ Balina omukisa abakwata omusango, N'oyo akola eby'obutuukirivu mu biro byonna.

⁴ Onjijukire, ai Mukama, n'ekisa ky'olina eri abantu bo; Nkwegayiridde, onjijire n'obulokozi bwo:

⁵Ndabe abalonde bo nga balaba omukisa, Nsanyukire essanyu ery'eggwanga lyo. Neenyumirize wamu n'obusika bwo.

⁶ Twayonoona ffe ne bajjajjaffe, Twakola ebitali bya butuukirivu, twakola obubi.

⁷ Bajjajjaffe tebaategeera bya magero byo mu Misiri; Ne batajjukira kusaasira kwo okungi; Naye ne bajeemera ku nnyanja, ku Nnyanja Emmyufu.

⁸ Era naye n'abalokola olw'erinnya lye, Amanyise obuyinza bwe obungi.

⁹ Era n'anenya Ennyanja Emmyufu, n'ekalira: Awo n'abayisa mu buziba, nga mu ddungu.

¹⁰ N'abalokola eri omukono gw'oyo eyabakyawa, N'abanunula mu mukono gw'omulabe.

¹¹ Amazzi ne gabikka ku balabe baabwe: Ne watasigalawo n'omu.

¹² Ne balyoka bakkiriza ebigambo bye; Ne bayimba okumutendereza.

¹³ Beerabira mangu emirimu gye; Tebaalindirira kuteesa kwe:

¹⁴ Naye ne beegombera nnyo mu lukoola, Ne bakemera Katonda mu ddungu.

¹⁵ N'abawa bye baasaba; Naye n'aleeta obukovvu mu mmeeme yaabwe.

¹⁶ Era obuggya ne bubakwatira Musa mu lusiisira, Ne Alooni omutukuvu wa Mukama.

¹⁷ Ensi n'eyasama n'emira Dasani. N'ebikka ku kibiina kya Abiraamu.

¹⁸ Omuliro ne gwaka mu kibiina kyabwe; Ennimi zaagwo ne zookya ababi.

¹⁹ Ne bakolera ennyana mu Kolebu, Ne basinza ekifaananyi ekisaanuuse.

²⁰ Bwe batyo ne bawaanyisa ekitiibwa kyabwe Okuba ekifaananyi ky'ente erya omuddo.

²¹ Ne beerabira Katonda omulokozi waabwe, Eyakolera ebikulu mu Misiri;

²²Eby'amagero mu nsi ya Kaamu, N'eby'entiisa ku Nnyanja Emmyufu.

²³ Kyeyava ayogera ng'alibazikiriza, Singa Musa omulonde we teyayimirira mu maaso ge mu kituli, Okuzzaayo obusungu bwe, aleme okubazikiriza.

²⁴ Weewaawo, baanyooma ensi ey'okwesiima, Tebakkiriza kigambo kye;

²⁵ Naye ne beemulugunya mu weema zaabwe, Ne batawulira ddoboozi lya Mukama.

²⁶ Kyeyava ayimusa omukono gwe gye bali, Ng'alibasuulira mu ddungu:

²⁷Era ng'aligwisa ezzadde lyabwe mu mawanga, Era ng'alibasaasaanya mu nsi.

²⁸ Era ne beegatta ne Baalipyoli, Ne balya ssaddaaka ez'abafu.

²⁹ Bwe batyo bwe baamusunguwazanga n'ebikolwa byabwe; Kawumpuli n'agwa mu bo.

³⁰Finekaasi n'alyoka ayimirira n'atuukiriza omusango: Kawumpuli n'aziyizibwa bw'atyo.

³¹ Ekyo ne kimubalirwa okuba obutuukirivu, Okutuusa emirembe gyonna egitaliggwaawo.

³² Era ne bamunyiigiza ku mazzi ag'e Meriba, N'okulaba Musa n'alaba obubi ku lwabwe:

³³Kubanga baali baagala okujeemera omwoyo gwe, N'ayogera ebitali bya magezi n'emimwa gye.

³⁴ Tebaazikiriza mawanga, Nga Mukama bye yabalagira;

³⁵ Naye ne beegatta n'amawanga, Ne bayiga emirimu gyabwe:

³⁶ Ne baweereza ebifaananyi byabwe; Ebyabafuukira ekyambika.

³⁷ Weewaawo, baawangayo batabani baabwe ne bawala baabwe eri bassetaani.

³⁸ Ne bayiwa omusaayi ogutaliiko kabi, gwe musaayi gwa batabani baabwe ne bawala baabwe, Be baawangayo eri ebifaananyi bya Kanani; Ensi n'eyonooneka n'omusaayi.

³⁹ Bwe batyo ne babaako empitambi olw'emirimu gyabwe, Ne bagenda bayenda mu bikolwa byabwe.

⁴⁰ Obusungu bwa Mukama kyebwava bubuubuuka eri abantu be, N'atamwa obusika bwe.

⁴¹N'abawaayo mu mukono gw'amawanga; N'abo abaabakyawa ne babafuga.

⁴² Era abalabe baabwe ne babajooga, Ne bajeemulwa wansi w'omukono gwabwe.

⁴³ Emirundi emingi yabawonya; Naye ne baagala okujeema mu kuteesa kwabwe, Ne bajeezebwa mu butali butuukirivu bwabwe.

⁴⁴ Era naye n'atunuulira ennaku zaabwe, Bwe yawulira okukaaba kwabwe:

⁴⁵ N'abajjuukirira endagaano ye, Ne yejjusa ng'okusaasira kwe bwe kuli okungi.

⁴⁶ Era n'ababasaasiza Bonna abaabatwalanga mu busibe.

⁴⁷ Otulokole, ai Mukama Katonda waffe, Otukuŋŋaanye tuve mu mawanga, Okwebazanga erinnya lyo ettukuvu, N'okujagulizanga ettendo lyo.

⁴⁸Yeebazibwenga Mukama, Katonda wa isiraeri, Okuva emirembe gyonna okutuuka mu mirembe gyonna. Era abantu bonna boogere nti Amiina. Mumutendereze Mukama.