Read luganda Zabbuli 107 Bible Online

Zabbuli 107 - luganda bible

Zabbuli 107

¹ Mumwebaze Mukama; kubanga mulungi: Kubanga okusaasira kwe kubeerera emirembe gyonna.

² Abanunule ba Mukama boogera bwe batyo, Be yanunula mu mukono gw'omulabe;

³ N'abakuŋŋaanya mu nsi nnyingi, Mu buvanjuba ne mu bugwanjuba, Mu bukiika obwa kkono ne mu bwa ddyo.

⁴ Baakyamira mu ddungu mu kkubo omutali bantu; Ne batalaba kibuga kya kutuulamu.

⁵Baalumibwa enjala n'ennyonta, Emmeeme yaabwe n'ezirika mu bo.

⁶ Ne balyoka bakaabira Mukama mu nnaku zaabwe, N'abawonya mu kweraliikirira kwabwe.

⁷ Era n'abaluŋŋamiza mu kkubo eggolokofu, Batuuke mu kibuga eky'okutuulamu.

⁸Kale singa abantu batendereza Mukama olw'obulungi bwe, N'olw'eby'amagero bye eri abaana b'abantu!

⁹ Kubanga akkusa emmeeme eyeegomba, N'emmeeme erumwa ennyonta agijjuza ebirungi.

¹⁰ Abo abaatuula mu kizikiza ne mu kisiikirize eky'okufa, Nga basibibwa n'ennaku n'ekyuma;

¹¹ Kubanga baajeemera ebigambo bya Katonda, Ne banyooma okuteesa kw'oyo ali waggulu ennyo:

¹² Kyeyava azitoya omutima gwabwe n'okutegana; Ne bagwa, so nga tewali anaabayamba.

¹³Ne balyoka bakaabira Mukama mu nnaku zaabwe, N'abalokola mu kweraliikirira kwabwe.

¹⁴ N'abaggya mu kizikiza n'ekisiikirize eky'okufa, N'amenyaamenya enjegere zaabwe.

¹⁵Kale singa abantu batendereza Mukama olw'obulungi bwe, N'olw'eby'amagero bye eri abaana b'abantu!

¹⁶ Kubanga yamenya enzigi ez'ebikomo, N'atemera ddala ebisiba eby'ebyuma.

¹⁷Abasirusiru olw'okwonoona kwabwe, N'olw'obutali butuukirivu bwabwe, babonyaabonyezebwa.

¹⁸ Emmeeme yaabwe etamwa emmere yonna yonna; Ne basemberera emiryango egy'okufa.

¹⁹Ne balyoka bakaabira Mukama mu nnaku zaabwe, N'abalokola mu kweraliikirira kwabwe.

²⁰ Atuma ekigambo kye, n'abawonya, N'abaggya mu kuzikirira kwabwe.

²¹Kale singa abantu batendereza Mukama olw'obulungi bwe, N'olw'eby'amagero bye eri abaana b'abantu!

²² Era bawengayo ssaddaaka ez'okwebaza, Era batenderenga ebikolwa bye n'okuyimba.

²³ Abaserengetera ku nnyanja mu maato, Abakola emirimu awali amazzi amangi;

²⁴Abo balaba ebikolwa bya Mukama, N'eby'amagero bye mu buziba.

²⁵ Kubanga alagira, n'akunsa omuyaga, Oguyimusa amayengo gaagwo.

²⁶ Balinnya mu ggulu, ne bakka nate mu ddubi: Emmeeme yaabwe esaanuuka olw'ennaku.

²⁷ Beesunda eruuyi n'eruuyi, era batagatta ng'omutamiivu, N'amagezi gonna nga gababuze.

²⁸Ne balyoka bakaabira Mukama mu nnaku zaabwe, N'abaggya mu kweraliikirira kwabwe.

²⁹ Alaaza omuyaga, Amayengo gaagwo ne gateeka.

³⁰Ne balyoka basanyuka kubanga bawummula; N'alyoka abaleeta mu mwalo gwe baagala okutuukamu.

³¹Kale singa abantu batendereza Mukama olw'obulungi bwe, N'olw'eby'amagero bye eri abaana b'abantu!

³² Era bamugulumizenga mu kkuŋŋaaniro ery'abantu, Era bamutenderezenga awali ekituuti eky'abakadde.

³³ Afuula emigga eddungu, N'enzizi azifuula ettaka ekkalu;

³⁴ Ensi ebala agifuula olukoola olw'omunnyo, Olw'obubi bwabo abatuula omwo.

³⁵ Eddungu alifuula ekidiba eky'amazzi, N'ensi enkalu ensulo ez'amazzi.

³⁶Omwo mw'atuuza abalumwa enjala, Balongoosenga ekibuga eky'okutuulamu;

³⁷Era basigenga ennimiro, basimbenga emizabbibu, Beefunirenga ebibala eby'ekyengera.

³⁸ Era n'abawa omukisa, n'okweyongera ne beeyongeranga nnyo; N'ataganya nte zaabwe okukendeera.

³⁹Nate, ne baweebuuka ne bajeezebwa Olw'okujoogebwa, n'okweraliikirira, n'okunakuwala.

⁴⁰ Anyoomesa nnyo abalangira, Era abakyamiza mu nsiko omutali kkubo.

⁴¹ Era naye agulumiza omwavu okuva mu nnaku. N'amukolera ebika ng'ekisibo.

⁴² Abatuukirivu balibiraba, balisanyuka; N'obutali butuukirivu bwonna buliziba akamwa kaabwo.

⁴³ Buli alina amagezi anaalowoozanga ebyo, Era banaafumiitirizanga okusaasira kwa Mukama.