Read luganda Zabbuli 112 Bible Online

Zabbuli 112 - luganda bible

Zabbuli 112

¹ Mumutendereze Mukama. Alina omukisa oyo atya Mukama, Asanyukira ennyo amateeka ge.

² Ezzadde lye linaabanga lya maanyi ku nsi: Ezzadde ly'abatuukirivu linaabanga n'omukisa.

³ Ebintu n'obugagga biri mu nnyumba ye: N'obutuukirivu bwe bubeerera emirembe gyonna.

⁴ Eri omutuukirivu omusana gujja awali ekizikiza: Oyo wa kisa, ajjudde okusaasira, era ye mutuukirivu.

⁵ Alaba ebirungi oyo akola eby'ekisa, awola; Alinyweza ensonga ye bw'alisalirwa omusango.

⁶ Kubanga taasagaasaganenga emirembe gyonna; Omutuukirivu anajjukirwanga ennaku zonna ezitaliggwaawo.

⁷ Taatyenga bigambo bya bubi: Omutima gwe gunywera, nga gwesiga Mukama.

⁸ Omutima gwe gutereera, taatyenga, Okutuusa lw'aliraba by'ayagala nga bituuse ku balabe be.

⁹ Agabye, awadde abaavu; Obutuukirivu bwe bubeerera emirembe gyonna: Ejjembe lye lirigulumizibwa n'ekitiibwa.

¹⁰ Omubi alibiraba, alirumwa omwoyo; Aliruma obujiji n'amannyo ge, alinyolwa: Omubi by'ayagala birifa.