Read luganda Zabbuli 119 Bible Online

Zabbuli 119 - luganda bible

Zabbuli 119

¹ Balina omukisa abo abatuukirira mu kkubo, Abatambulira mu mateeka ga Mukama.

² Balina omukisa abo abeekuuma bye yategeeza, Abamunoonya n'omutima gwonna.

³Weewaawo, abo tebakola ebitali bya butuukirivu; Batambulira mu makubo ge.

⁴Watukuutira ebiragiro byo, Tubikwatenga nnyo.

⁵Singa amakubo gange ganywedde Okukwata amateeka go!

⁶ Bwe ntyo bwe siikwatibwenga nsonyi, Bwe nnaalowoozanga bye walagira byonna.

⁷Naakwebazanga n'omutima ogutalina bukuusa, Bwe ndiba nga njize emisango gyo egy'ensonga.

⁸ Naakwatanga amateeka go: Nkwegayiridde, tondekera ddala.

⁹ Omuvubuka anaalongoosanga atya ekkubo lye? Nga yeegendereza ng'ekigambo kyo bwe kiri.

¹⁰N'omutima gwange gwonna nkunoonyezza: Nkwegayiridde, nneme okukyama okuleka bye walagira.

¹¹ Nterese ekigambo kyo mu mutima gwange, Nneme okwonoona mu maaso go.

¹²Weebazibwa, ai Mukama: Onjigirizenga amateeka go.

¹³ N'emimwa gyange mbuulidde Emisango gyonna egy'akamwa ko.

¹⁴ Nsanyukidde ekkubo ly'ebyo bye wategeeza, Nga asanyukira obugagga bwonna.

¹⁵Naafumiitirizanga ebiragiro byo. Era naalowoozanga amakubo go.

¹⁶Naasanyukiranga amateeka go: Seerabirenga kigambo kyo.

¹⁷ Onkolere omuddu wo eby'ekisa ekingi, mbeerenga omulamu; Bwe ntyo bwe nnaakwatanga ekigambo kyo.

¹⁸Onzibule amaaso gange, ndabe Eby'ekitalo ebiva mu mateeka go.

¹⁹ Nze ndi mutambuze mu nsi: Tonkisa bye walagira.

²⁰ Emmeeme yange ekutuse olw'okuyaayaana Kw'eyaayaanira emisango gyo ebiro byonna.

²¹ Onenyezza ab'amalala abakolimirwa, Abakyama okuleka bye walagira.

²²Onzigyeko okuvumibwa n'okunyoomebwa; Kubanga neekuumye bye wategeeza.

²³Era n'abalangira batuula ne banjogerako obubi: Naye omuddu wo nafumiitiriza amateeka go.

²⁴ Era bye wategeeza bye nsanyukira, Era ebyo be bantu be nteesa nabo.

²⁵ Emmeeme yange yeegasse n'enfuufu: Onzuukize ng'ekigambo kyo bwe kiri.

²⁶Nayatula amakubo gange, naawe n'onziramu: Onjigirize amateeka go.

²⁷Ontegeeze ntegeere ekkubo ery'ebiragiro byo: Ne ndyoka nfumiitiriza emirimu gyo egy'ekitalo.

²⁸ Emmeeme yange esaanuuse olw'okunyiikaala: Ompe amaanyi ng'ekigambo kyo bwe kiri.

²⁹ Onziyeko ekkubo ery'obulimba: Era ompe amateeka go n'ekisa.

³⁰Neerobozezza ekkubo ery'obwesigwa: Emisango ngitadde mu maaso gange.

³¹Neegatta n'ebyo bye wategeeza: Ai Mukama, tonkwasa nsonyi.

³² Naddukiranga mu kkubo ly'ebyo bye walagira, Bw'oligaziya omutima gwange.

³³ Onjigirize, ai Mukama, ekkubo ery'amateeka go; Nange naalyekuumanga okutuusa enkomerero.

³⁴ Ompe amagezi, nange neekuumanga amateeka go; Weewaawo, naagakwatanga n'omutima gwange gwonna.

³⁵ Ompise mu kkubo ly'ebyo bye walagira: Kubanga mu eryo mwe nsanyukira.

³⁶ Okyuse omutima gwange eri ebyo bye wategeeza, So si eri kwegomba.

³⁷ Owunjule amaaso gange galemenga okulaba ebitaliimu, Era onzuukize mu makubo go.

³⁸Onyweze ekigambo kyo eri omuddu wo, Ky'eky'okutyanga ggwe.

³⁹Ompunjulire ekivume kye ntya; Kubanga emisango gyo mirungi

⁴⁰Laba, neegombanga ebiragiro byo: Onzuukirize mu butuukirivu bwo.

⁴¹ Era n'okusaasira kwo kutuuke gye ndi, ai Mukama, Bwe bulokozi bwo, ng'ekigambo kyo bwe kiri.

⁴² Bwe ntyo bwe ndiba n'eky'okuddamu eri oyo anvuma; Kubanga neesiga ekigambo kyo.

⁴³So toggiramu ddala kigambo kya mazima mu kamwa kange; Kubanga naasuubiranga emisango gyo.

⁴⁴Bwe ntyo bwe nnaakwatanga amateeka go ennaku zonna Emirembe n'emirembe.

⁴⁵ Era naatambulanga nga neeyabya; Kubanga nnoonyezza ebiragiro byo.

⁴⁶ Era naayogeranga ku ebyo bye wategeeza mu maaso ga bakabaka, Ne sikwatibwa nsonyi.

⁴⁷Era naasanyukiranga ebyo bye walagira, Bye nnaayagalanga.

⁴⁸ Era naayimusanga engalo zange eri ebyo bye walagira, bye nnaayagalanga: Era naafumiitirizanga amateeka go.

⁴⁹Ojjukire ekigambo eri omuddu wo, Kubanga wansuubiza.

⁵⁰ Eryo lye ssanyu lyange bwe mbonyaabonyezebwa: Kubanga ekigambo kyo kinzuukizizza.

⁵¹ Ab'amalala bansekeredde nnyo: Naye ne sseekooloobyanga okuva mu mateeka go.

⁵²Njijukidde emisango gyo egy'edda, ai Mukama, Ne nneesanyusa.

⁵³ Obusungu obubuubuuka bunkutte, Olw'ababi abaleka amateeka go.

⁵⁴Amateeka go ge nnyimbirako Mu nnyumba ey'okutambula kwange.

⁵⁵ Najjukiranga erinnya lyo ekiro, ai Mukama, Era nakwatanga amateeka go.

⁵⁶Ekigambo kino kyange, Okukuumanga ebiragiro byo.

⁵⁷ Mukama gwe mugabo gwange: Nayogera nga naakwatanga ebigambo byo.

⁵⁸Nasaba ekisa kyo n'omutima gwange gwonna: Onsaasire ng'ekigambo kyo bwe kiri.

⁵⁹ Nalowooza amakubo gange, Ne nkyusa ebigere byange eri ebyo bye wategeeza.

⁶⁰Nayanguwa ne sirwawo, Okukwata ebyo bye walagira.

⁶¹Emigwa egy'ababi gimbisse; Naye seerabidde mateeka go.

⁶² Mu ttumbi naagolokokanga okukwebaza Olw'emisango gyo egy'ensonga.

⁶³ Nze ndi munne w'abo bonna abakutya, N'abo abakwata ebiragiro byo.

⁶⁴ Ai Mukama, ensi ejjudde okusaasira kwo: Onjigirize amateeka go.

⁶⁵Okoledde ebirungi omuddu wo, Ai Mukama, ng'ekigambo kyo bwe kiri.

⁶⁶ Onjigirizenga okusala emisango egy'ensonga n'okutegeera; Kubanga nakkirizanga ebyo bye walagira.

⁶⁷ Nga sinnabonyaabonyezebwa, nakyama; Naye kaakano nkwata ekigambo kyo.

⁶⁸ Oli mulungi, era okola ebirungi; Onjigirizenga amateeka go.

⁶⁹ Ab'amalala banjiiyirizzaako eky'obulimba: N'omutima gwange gwonna neekuumanga ebiragiro byo.

⁷⁰ Omutima gwabwe gugezze ng'amasavu; Naye nze nsanyukira amateeka go.

⁷¹ Kwangasa okubonyaabonyezebwa; Ndyoke njige amateeka go.

⁷² Amateeka g'akamwa ko gampoomera nze Okusinga ebitundu eby'ezaabu n'effeeza enkumi n'enkumi.

⁷³ Engalo zo ze zankola, ze zammumba: Ompe amagezi, njigenga ebyo bye walagira.

⁷⁴ Abakutya banandabanga ne basanyuka; Kubanga naasuubiranga ekigambo kyo.

⁷⁵ Mmanyi, ai Mukama, ng'emisango gyo gya nsonga, Era nga wambonyaabonya olw'obwesigwa.

⁷⁶Nkwegayiridde, ekisa kyo ekirungi kinsanyuse, Ng'ekigambo kyo bwe kiri eri omuddu wo.

⁷⁷Okusaasira kwo okulungi kujje gye ndi, mbeerenga omulamu: Kubanga amateeka go ge gansanyusa.

⁷⁸ Ab'amalala bakwatibwe ensonyi; kubanga bammegga awatali nsonga. Naye naafumiitirizanga ebiragiro byo.

⁷⁹ Abakutya bankyukire, Era balitegeera bye wategeeza.

⁸⁰Omutima gwange gutuukirire mu mateeka go; Nnemenga okukwatibwa ensonyi.

⁸¹ Emmeeme yange ezirise olw'obulokozi bwo: Naye nsuubira ekigambo kyo.

⁸² Amaaso gange gakulukuse olw'ekigambo kyo, Nga njogera nti Olinsanyusa ddi?

⁸³ Kubanga nfuuse ng'eddiba eriwanikibwa mu mukka; Naye seerabira mateeka go.

⁸⁴ Ennaku ez'omuddu wo ziri mmeka? Olituukiriza ddi omusango ku abo abanjigganya?

⁸⁵ Ab'amalala bansimidde obunnya Abatagoberera mateeka go.

⁸⁶ Bye walagira byonna bya bwesigwa: Banjigganya awatali nsonga: ggwe onnyambe.

⁸⁷Baabulako katono banzikirize ku nsi; Naye ne sireka biragiro byo.

⁸⁸Onzuukize ng'ekisa kyo ekirungi bwe kiri; Bwe ntyo bwe nnaakwatanga akamwa ko bye kategeeza.

⁸⁹ Emirembe gyonna, ai Mukama, Ekigambo kyo kinyweredde mu ggulu.

⁹⁰ Obwesigwa bwo bubeerera emirembe gyonna: Wanyweza ensi, n'ebeererawo.

⁹¹Bikyaliwo leero nga bwe walagira; Kubanga ebintu byonna baddu bo.

⁹²Singa amateeka go si ge gansanyusa, Nandizikiridde bwe nnabonyaabonyezebwa.

⁹³Seerabirenga biragiro byo ennaku zonna; Kubanga wanzuukiza n'ebyo.

⁹⁴Nze ndi wuwo, ondokole; Kubanga naanoonyanga ebiragiro byo.

⁹⁵Ababi bannindiridde okunzikiriza; Naye nze naalowoozanga bye wategeeza.

⁹⁶Ndabye ebintu byonna ebyatuukirira gye bikoma; Naye ekiragiro kyo kigazi nnyo.

⁹⁷ Amateeka go nga ngaagala! Ago ge nfumiitiriza okuzibya obudde.

⁹⁸ Bye walagira bingeziwaza okusinga abalabe bange; Kubanga bali wamu nange ennaku zonna.

⁹⁹ Nnina okutegeera okusinga abayigiriza bange bonna; Kubanga bye wategeeza bye ndowooza.

¹⁰⁰ Ntegeera okukira abakadde, Kubanga neekuumanga ebiragiro byo.

¹⁰¹ Naaziyizanga ebigere byange obutatambula mu kkubo ebbi lyonna, Ndyoke nkwatenga ekigambo kyo.

¹⁰²Seekooloobyanga kuleka misango gyo; Kubanga ggwe wanjigirizanga.

¹⁰³ Ebigambo byo nga bimpoomera mu kibuno kyange! Bisinga omubisi gw'enjuki mu kamwa kange!

¹⁰⁴Ebiragiro byo bye binfunya okutegeera: Kyenvudde nkyawa buli kkubo ery'obulimba.

¹⁰⁵ Ekigambo kyo ye ttabaaza eri ebigere byange, N'omusana eri ekkubo lyange.

¹⁰⁶ Nalayira, era nkikakasizza kino, Nga naakwatanga emisango gyo egy'ensonga.

¹⁰⁷Mbonyaabonyezebwa nnyo; Onzuukize, ai Mukama, ng'ekigambo kyo bwe kiri.

¹⁰⁸ Okkirize, nkwegayiridde, ebyo akamwa kange bye kaakuwa, ai Mukama, nga tekaawalirirzibwa, Era onjigirizenga emisango gyo.

¹⁰⁹ Emmeeme yange eri mu mukono gwange ennaku zonna; Naye seerabira mateeka go.

¹¹⁰ Ababi bantegedde omutego; Naye sikyamanga kuleka biragiro byo.

¹¹¹ Bye wategeeza mbitutte okuba obusika obutaliggwaawo; Kubanga ebyo bye binsanyusa omutima gwange.

¹¹² Mpese omutima gwange okutuukiriza amateeka go, Emirembe gyonna, okutuusa enkomerero.

¹¹³ Nkyaye abo abalina emyoyo egy'obulimba; Naye amateeka go ge njagala.

¹¹⁴ Ggwe oli kifo kyange kye nneekwekamu, n'engabo yange: Nsuubira ekigambo kyo.

¹¹⁵ Mugende mumbeere wala, mmwe abakozi b'obubi; Ndyoke neekuumenga Katonda wange bye yalagira.

¹¹⁶ Ompanirire ng'ekigambo kyo bwe kiri, mbeerenga omulamu; Nneme okukwatibwanga ensonyi olw'essuubi lyange.

¹¹⁷Ggwe ompanirire, nange naabeerangawo mirembe, Era neegenderezanga amateeka go ennaku zonna.

¹¹⁸Onyoomye abo bonna abakyama okuleka amateeka go; Kubanga obukuusakuusa bwabwe bulimba.

¹¹⁹ Omalawo ababi bonna ab'ensi ng'amasengere: Kyenvudde njagala ebyo bye wategeeza.

¹²⁰ Omubiri gwange gukankana olw'okukutya; Era ntya emisango gyo.

¹²¹Nkoze eby'omusango n'eby'obutuukirivu: Tondekera abo abanjooga.

¹²² Weeyimirire omuddu wo olw'obulungi: Ab'amalala baleme okunjooganga.

¹²³ Amaaso gange ganzibye olw'obulokozi bwo, N'olw'ekigambo kyo ekituukirivu.

¹²⁴Okole omuddu wo ng'okusaasira kwo bwe kuli, Era onjigirizenga amateeka go.

¹²⁵ Nze ndi muddu wo, ompe okutegeera; Ndyoke mmanye ebyo bye wategeeza.

¹²⁶Obudde butuuse Mukama okukola emirimu; Kubanga badibizza amateeka go.

¹²⁷ Kyenvudde njagala ebyo bye walagira Okusinga ezaabu, weewaawo, okusinga ezaabu ennungi.

¹²⁸Kyenvudde ndowooza ebiragiro byo byonna eby'ebigambo byonna nga bya nsonga; Era nkyaye buli kkubo ery'obulimba.

¹²⁹Bye wategeeza bya kitalo: Emmeeme yange kyeva ebyekuuma.

¹³⁰ Ebigambo byo nga bigguliddwawo bireeta omusana; Biwa okutegeera abatalina magezi.

¹³¹ Nayasama nnyo akamwa kange ne mpeevuuma; Kubanga nayaayaanira ebyo bye walagira.

¹³² Onkyukire, onsaasire, Nga bw'oyisa okusaasira abo abaagala erinnya lyo.

¹³³ Oluŋŋamizenga ebigere byange mu kigambo kyo; So obutali butuukirivu bwonna buleme okunfuganga.

¹³⁴ Onnunule nneme okujoogebwanga abantu: Bwe ntyo bwe nnaakwatanga ebiragiro byo.

¹³⁵ Oyakize amaaso go omuddu wo; Era onjigirizenga amateeka go.

¹³⁶ Amaaso gange gakulukuta emigga gy'amazzi, Kubanga tebakwata mateeka go.

¹³⁷ Oli mutuukirivu, ai Mukama, N'emisango gyo gya nsonga.

¹³⁸ Walagira bye wategeeza mu butuukirivu Ne mu bwesigwa ddala ddala.

¹³⁹ Obuggya bwange bunzikirizza, Kubanga abalabe bange beerabidde ebigambo byo.

¹⁴⁰ Ekigambo kyo kirongoofu nnyo; Omuddu wo kyava akyagala.

¹⁴¹Nze ndi muto, nnyoomebwa: Naye seerabira biragiro byo.

¹⁴² Obutuukirivu bwo bwe butuukirivu obw'emirembe gyonna, N'amateeka go ge mazima.

¹⁴³ Ennaku n'okulumwa bindabye: Naye bye walagira bye binsanyusa.

¹⁴⁴ Bye wategeeza bya butuukirivu emirembe gyonna: Ompe okutegeera, nange naabeeranga mulamu.

¹⁴⁵ Nkoowodde n'omutima gwange gwonna; ompitabe, ai Mukama: Naakuumanga amateeka go.

¹⁴⁶Nkukoowodde; ondokole, Nange naakwatanga ebyo bye wategeeza.

¹⁴⁷ Nakeera emmambya nga tennasala, ne nkoowoola: Nasuubira ebigambo byo.

¹⁴⁸ Amaaso gange gaasooka ebisisimuka by'ekiro, Nfumiitirize ekigambo kyo.

¹⁴⁹Owulire eddoboozi lyange ng'ekisa kyo bwe kiri: Onzuukize, ai Mukama, ng'emisango gyo bwe giri:

¹⁵⁰Basembera abagoberera obubi; Bali wala amateeka go.

¹⁵¹ Ggwe oli kumpi, ai Mukama; Ne byonna bye walagira ge mazima.

¹⁵² Edda n'edda namanyanga olw'ebyo bye wategeeza, Nga wabinyweza emirembe gyonna.

¹⁵³ Olowoozenga okubonaabona kwange, omponye; Kubanga seerabira mateeka go.

¹⁵⁴ Ompolereze ensonga yange, onnunule: Onzuukize ng'ekigambo kyo bwe kiri.

¹⁵⁵ Obulokozi buba wala ababi; Kubanga tebanoonya mateeka go.

¹⁵⁶ Okusaasira kwo okulungi kungi, ai Mukama: Onzuukize ng'emisango gyo bwe giri.

¹⁵⁷ Abanjigganya n'abankyawa bangi: Naye seekooloobyanga kuleka bye wategeeza.

¹⁵⁸ Nalaba abo abakola eby'enkwe, ne nnakuwala; Kubanga tebakwata kigambo kyo.

¹⁵⁹Olowooze bwe njagala ebiragiro byo: Onzuukize, ai Mukama, ng'ekisa kyo bwe kiri.

¹⁶⁰ Ekigambo kyo kyonna kyonna mazima; N'emisango gyo egy'ensonga gyonna gyonna gibeerera emirembe gyonna.

¹⁶¹ Abalangira banjigganyizza awatali nsonga; Naye omutima gwange gutya nnyo ebigambo byo.

¹⁶² Nsanyukira ekigambo kyo, Ng'alaba omunyago omungi.

¹⁶³Nkyaye obulimba, mbutamwa; Naye amateeka go ge njagala.

¹⁶⁴Emirundi musanvu buli lunaku nkutendereza; Olw'emisango gyo egy'ensonga.

¹⁶⁵ Abaagala amateeka go balina emirembe mingi; So tebaliiko kibeesittaza.

¹⁶⁶ Nsuubidde obulokozi bwo, ai Mukama, Era nkoze bye walagira.

¹⁶⁷Emmeeme yange yakwatanga bye wategeeza; Era mbyagala kitalo.

¹⁶⁸ Naakwatanga ebiragiro byo n'ebyo bye wategeeza; Kubanga amakubo gange gonna gali mu maaso go.

¹⁶⁹ Okukaaba kwange kusemberenga mu maaso go, ai Mukama: Ompe okutegeeranga ng'ekigambo kyo bwe kiri.

¹⁷⁰Okwegayirira kwange kujjenga mu maaso go: Omponye ng'ekigambo kyo bwe kiri.

¹⁷¹ Emimwa gyange gyogere ettendo; Kubanga onjigiriza amateeka go.

¹⁷²Olulimi lwange luyimbe ku kigambo kyo; Kubanga bye walagira byonna bwe butuukirivu.

¹⁷³ Omukono gwo gube nga gweteeseteese okunnyamba; Kubanga nneerobozza ebiragiro byo.

¹⁷⁴ Njaayaanidde obulokozi bwo, ai Mukama; Era amateeka go ge gansanyusa.

¹⁷⁵Emmeeme yange ebeerenga ennamu, era eneekutenderezanga; N'emisango gyo ginnyambenga,

¹⁷⁶ Nakyama ng'endiga ebuze; noonya omuddu wo; Kubanga seerabira bye walagira.