Read luganda Zabbuli 145 Bible Online

Zabbuli 145 - luganda bible

Zabbuli 145

¹Zabbuli ey'okutendereza; eya Dawudi. Naakugulumizanga, Katonda wange, ai Kabaka; Era neebazanga erinnya lyo emirembe n'emirembe.

²Buli lunaku naakwebazanga; Era naatenderezanga erinnya lyo emirembe n'emirembe.

³ Mukama mukulu, era agwana okutenderezebwa ennyo N'obukulu bwe tebunoonyezeka.

⁴Emirembe ginaasuutanga emirimu gyo eri emirembe, Era ginaatenderanga ebikolwa byo eby'amaanyi.

⁵Ku bukulu obw'ekitiibwa obw'ettendo lyo, Ne ku mirimu gyo egy'ekitalo, kwe nnaalowoozanga.

⁶ Era abantu banaayogeranga ku bikolwa byo eby'entiisa nga bya maanyi; Nange naategeezanga obukulu bwo.

⁷ Banaayatulanga obulungi bwo obungi bwe bujjukirwa, Era banaayimbanga ku butuukirivu bwo.

⁸ Mukama wa kisa ajjudde okusaasira; Alwawo okusunguwala era wa kusonyiwa kungi.

⁹ Mukama mulungi eri bonna; N'okusaasira kwe okulungi kubuna emirimu gye gyonna.

¹⁰ Emirimu gyo gyonna ginaakwebazanga, ai Mukama; N'abatukuvu bo banaakweyanzanga.

¹¹Banaayogeranga ku kitiibwa eky'obwakabaka bwo, Banaanyumyanga ku buyinza bwo;

¹² Okumanyisanga abaana b'abantu ebikolwa bye eby'amaanyi, N'ekitiibwa eky'obukulu obw'obwakabaka bwe.

¹³ Obwakabaka bwo bwe bwakabaka obutaliggwaawo, N'okufuga kwo kunaabeereranga emirembe gyonna.

¹⁴ Mukama awanirira abagwa bonna, Era ayimiriza abakutama bonna.

¹⁵ Amaaso g'ebintu byonna gakulindirira; Naawe obiwa emmere yaabyo mu ntuuko zaabyo.

¹⁶Oyanjuluza engalo zo, N'okkusa buli kintu kiramu bye kyagala.

¹⁷ Mukama mutuukirivu mu makubo ge gonna, Era wa kisa mu mirimu gye gyonna.

¹⁸ Mukama aba kumpi abo bonna abamukaabira, Bonna abamukaabira n'amazima.

¹⁹ Anaatuukirizanga abo kye baagala abamutya; Era anaawuliranga okukaaba kwabwe, anaabalokolanga.

²⁰ Mukama akuuma abo bonna abamwagala; Naye ababi bonna alibazikiriza.

²¹ Akamwa kange kanaayogeranga ettendo lya Mukama; Era ne byonna ebirina emibiri byebazenga erinnya lye ettukuvu emirembe n'emirembe.